ព័ត៌មានជាតិ

ក្រុមហ៊ុនធំៗ ៥ នឹងផ្ដល់ឱកាសការងារ ៦៥០ កន្លែង ក្នុងវេទិកាការងាររបស់ NEA

បានផុស

២០ វិនាទី មុន

នៅ

ថ្ងៃអង្គារ ២៦ វិច្ឆិកា ២០២៤

ដោយ

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជាវិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ នឹងរៀបចំវេទិកាការងារ និងកម្មសិក្សាការងារ នៅថ្ងៃទី ២៨ ខែវិច្ឆិកា ឆ្នាំ ២០២៤ ខាងមុខនេះ ដោយនាំយកឱកាសការងារថ្មីបន្ថែមទៀត ចំនួន ៦៥០ កន្លែង ពីក្រុមហ៊ុនធំៗ ៥ សម្រាប់ផ្ដល់ជូនយុវជន សិស្ស/និស្សិត និងអ្នកកំពុងស្វែងរកការងារធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនធំៗ ទាំង ៥ ដែលនឹងចូលរួមក្នុងវេទិកាការងារនេះ មានដូចជា ៖ ក្រុមហ៊ុន អ៊ិនធើណេត ONLINE, ធនាគារ BIC BANK, សណ្ឋាគារ KVL, មីក្រូហិរញ្ញវត្ថុ JACCS និងក្រុមហ៊ុន TRUMP FITNES។ ចំពោះ យុវជន សិស្ស/និស្សិត និងអ្នកកំពុងតែស្វែងរកការងារធ្វើ ឬចង់ផ្លាស់ប្ដូរការងារ អាចយកប្រវត្តិរូបសង្ខេប (CV) ដើម្បីចូលរួមដាក់ពាក្យ និងសម្ភាសផ្ទាល់ជាមួយតំណាងក្រុមហ៊ុនទាំងនោះបាន ចាប់ពីម៉ោង ៨:០០ ព្រឹក ដល់ម៉ោង ០៥:០០ ល្ងាច នៅក្នុងបរិវេណក្រសួងការងារ និងបណ្ដុះបណ្ដាលវិជ្ជាជីវៈ។

លោក សួ ស៊ីវត្ថា ប្រធានគ្រប់គ្រងទូទៅ ក្រុមហ៊ុន TRUMP FITNESS លើកឡើងថា ជានិច្ចកាល ក្រុមហ៊ុនរបស់លោកតែងតែចូលរួមសហការជាមួយនឹង NEA ក្នុងព្រឹត្តិការផ្សេងៗ ដើម្បីផ្ដល់ឱកាសការងារដល់សិស្សនិស្សិតដែលចង់ស្វែងរកការងារធ្វើ។ ក្រោយពីការចូលរួមជាមួយ NEA ខាងក្រុមហ៊ុន តែងទទួលបានបុគ្គលិកទាន់ពេលវេលា និងមានគុណភាពតាមអ្វីដែលខាងក្រុមហ៊ុនមានតម្រូវការ។

លោកបញ្ជាក់ឱ្យដឹងថា ក្រុមហ៊ុន TRUMP FITNESS មានតម្រូវការបុគ្គលិកបន្ថែមជាច្រើននាក់ ដែលក្រុមហ៊ុននឹងផ្ដល់ការបណ្ដុះបណ្ដាលបន្ថែម ព្រមទាំងមានអត្ថប្រយោជន៍ជាច្រើនបន្ថែមទៀត។

លោក ស៊ីវត្ថា បញ្ជាក់បន្ថែមទៀតថា «យើងពិតជាសរសើរ NEA ណាស់ ដែលបានរកគ្រប់វិធីសាស្ត្រជាច្រើន សំដៅជួយដល់និស្សិតឱ្យបានស្គាល់ពីក្រុមហ៊ុន ពិសេសបានដឹងពីព័ត៌មានទីផ្សារ និងតម្រូវការការងារនាពេលបច្ចុប្បន្ន»។

សម្រាប់ព័ត៌មានបន្ថែម សូមទាក់ទងមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨ ៦៦ ៥៥ ឬ គេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕