ខេត្តព្រះសីហនុនៅតែបន្តបិទច្រកចេញចូលដដែល ទោះករណីឆ្លងកូវីដ១៩មានភាពធូរស្រាល

ទោះបីជាក្នុងរយៈពេលចុងក្រោយនេះ ស្ថានភាពឆ្លងជំងឺកូវីដ១៩នៅខេត្តព្រះសីហនុមានភាពធូរស្រាលបន្តិចក្តី រដ្ឋបាលខេត្តនៅតែបន្តបិទច្រកចេញចូលដដែល។ នេះបើតាមការបញ្ជាក់របស់លោក ឃាង ភារម្យ អ្នកនាំពាក្យសាលាខេត្តព្រះសីហនុ។

លោក ឃាង ភារម្យ មានប្រសាសន៍ថា៖ «ចំពោះការបិទច្រកចេញចូលខេត្តព្រះសីហនុនៅបន្តអនុវត្តដដែល មិនទាន់មានគោលការណ៍ថ្មីនៅឡើយទេ។ គិតរហូតមកដល់ព្រឹកថ្ងៃទី១៤មីនានេះ ខេត្តព្រះសីហនុមានករណីវិជ្ជមាន កូវីដ១៩សរុបចំនួន១៣៣នាក់។»

លោក ឃាង ភារម្យ បានឲ្យដឹងទៀតថា ចំពោះទីតាំងដែលបានបិទដោយសារមានជាប់ពាក់ព័ន្ធនឹងអ្នកឆ្លងជំងឺកូវីដ ១៩រដ្ឋបាលខេត្តបានអនុញ្ញាតឲ្យទីតាំងចំនួន៤បើកដំណើរការឡើងវិញ។ ប៉ុន្តែត្រូវបន្តអនុវត្តវិធានការសុខាភិបាល ឱ្យបានខ្ជាប់ខ្ជួន។ ចំណែកទីតាំងផ្សេងៗទៀតនៅបន្តបិទនៅឡើយ ហើយអាជ្ញាធរនឹងបន្តត្រួតពិនិត្យម៉ត់ចត់ជាទីបំផុត ហើយទីតាំងណាដែលអាចបើកឡើងវិញបានរដ្ឋបាលខេត្តនឹងអនុញ្ញាតឲ្យបើកជាបន្តបន្ទាប់ទៀត។

បន្ទាប់ពីខេត្តព្រះសីហនុបានបិទច្រកចេញចូលខេត្តរួចមកឃើញថាចំនួនឆ្លងជំងឺកូវីដ១៩ហាក់មានការថមថយចុះជាបន្តបន្ទាប់។

តាមក្រសួងសុខាភិបាលនៅថ្ងៃទី១០ខែមីនា ខេត្តព្រះសីហនុមានឆ្លងចំនួន២នាក់ក្នុងចំណោមឆ្លងសរុប៦៤នាក់។ ថ្ងៃទី១១មីនាមានឆ្លង១នាក់ក្នុងចំណោមឆ្លង៣៩នាក់។ថ្ងៃទី១២មីនាមិនមានអ្នកឆ្លងក្នុងចំណោមអ្នកឆ្លង៦០នាក់។ថ្ងៃទី១៣មីនាមានអ្នកឆ្លង១នាក់ក្នុងចំណោមអ្នកឆ្លង៣៩នាក់ និងថ្ងៃទី១៤មីនានេះមិនមានអ្នកឆ្លងថ្មីក្នុងចំណោមអ្នកឆ្លង៤១នាក់ខណៈកាលពីមុនមានឆ្លងច្រើនទី២បន្ទាប់ពីរាជធានីភ្នំពេញ។

អត្ថបទ៖ សំអឿន