កម្លាំងចម្រុះខេត្តសៀមរាប បន្តសហការគ្នា ចុះបង្ក្រាបបទល្មើសនៅស្រុកពួក និងក្រុងសៀមរាប

អភិបាលរងខេត្តសៀមរាប ដឹកនាំកម្លាំងចម្រុះ បន្តចុះបង្ក្រាបបទល្មើសនេសាទ ក្នុងភូមិសាស្ត្រស្រុកពួក និងក្រុងសៀមរាប ដើម្បីធ្វើការណែនាំដល់ប្រជានេសាទ កុំឱ្យប្រើប្រាស់ឧបករណ៍នេសាទខុសច្បាប់ស្តីពីជលផល និងធ្វើយ៉ាងណាឱ្យផលត្រីកើនឡើងវិញ។

លោក ធិននី សុទ្ធី នាយខណ្ឌរដ្ឋបាលជលផលសៀមរាប បានឱ្យដឹងថា នៅថ្ងៃទី២៨ ខែវិច្ឆិកា ឆ្នាំ២០២៤ លោក អ៊ឹង គឹមលាង អភិបាលរងខេត្តសៀមរាប បានដឹកនាំកម្លាំងចម្រុះ ចុះទប់ស្កាត់ និងបង្ក្រាបបទល្មើសជលផលក្នុងភូមិសាស្ត្រក្រុងសៀមរាប និងស្រុកពួក ដោយបានធ្វើការរុះរើ និងបំផ្លាញឧបករណ៍នេសាទល្មើសច្បាប់ស្តីពីជលផល នេសាទដោយឧបករណ៍លបរ៉ាវដែលមានក្រឡាតូចជាង ០,០៣ម៉ែត្រ បានចំនួន ១ករណី៖ ក្បាលលប ចំនួន ១២គ្រឿង-របាំងសាច់អួន ប្រវែង ១ ២០០ម៉ែត្រ-ចម្រឹង ចំនួន ៦០០ដើម-ព្រលែងត្រីចម្រុះ ចំនួន ៣០គីឡូក្រាម។

លោក ទា គឹមសុទ្ធ ប្រធានមន្ទីរកសិកម្ម រុក្ខប្រមាញ់ និងនេសាទខេត្តសៀមរាប បានឱ្យដឹងថា ជារឿយៗក្រុមការងារចម្រុះ បានបើកយុទ្ធនាការចុះទៅត្រួតពិនិត្យ និងបង្ក្រាបបទល្មើសនេសាទក្នុងតំបន់ដែននេសាទទាំងអស់នៅជាប់បឹងទន្លេសាប ដោយចាប់ផ្ដើមចុះអនុវត្តពីចំណុចសង្កាត់ចុងឃ្នៀស ឃុំកែវពណ៌ ឃុំកំពង់ភ្លុក ឃុំកំពង់ឃ្លាំង និងឃុំអន្លង់សំណរ ដែលជាតំបន់នៅជាប់មាត់បឹងទន្លេសាបនៃខេត្តសៀមរាប។

លោកបន្តថា «ការងារសំខាន់ គឺធ្វើការអប់រំសហគមន៍នេសាទ និងដើម្បីដាស់ស្មារតីមិនឱ្យគាត់ធ្វើនេសាទខុសច្បាប់ ហើយប្រសិនបើយើងមិនចុះទៅបង្ក្រាបទេ គាត់ចេះតែហ៊ាននេសាទលើសពីកម្រិតដែលយើងកំណត់ជូន ដូច្នេះវាអាចនឹងបាត់បង់ជីវចម្រុះទាំងអស់នោះក្នុងបឹងទន្លេសាប»។

ជាមួយគ្នានោះដែរ អាជ្ញាធរខេត្តសៀមរាប ក៏បានជំរុឱ្យមន្ត្រីជលផលក៏ដូចជាអាជ្ញាធរដែនដី ត្រូវបន្តយកចិត្តទុកដាក់សហការគ្នាចេញត្រួតពិនិត្យ និងបន្តចុះធ្វើការត្រួតពិនិត្យ ទប់ស្កាត់បទល្មើសជលផលក្នុងភូមិសាស្ត្ររបស់ខ្លួនឱ្យបានជាប្រចាំ៕

ដោយ៖ជុន កុសល