សម្ដេចធិបតី ជួយសង់បញ្ជរលក់សំបុត្រថ្មីជូនសហគមន៍ធម្មជាតិកំពុងភ្លុក ដើម្បីកុំឱ្យពលរដ្ឋចំណាយលុយជួលដី

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចជួយសាងសង់បញ្ជរលក់សំបុត្រថ្មីជូនសហគមន៍ធម្មជាតិកំពុងភ្លុក ដើម្បីកុំឱ្យពលរដ្ឋក្នុងសហគមន៍ចំណាយលុយជួយដីដូចបច្ចុប្បន្ន។ សម្ដេចធិបតី ហ៊ុន ម៉ាណែត សម្រេចជួយដូច្នេះ គឺឆ្លើយតបទៅនឹងទុក្ខលំបាករបស់ប្រជាពលរដ្ឋក្នុងសហគមន៍ធម្មជាតិកំពុងភ្លុក ដែលសំណូមពរមកសម្ដេចគ្រាដែលសម្ដេចទៅពិនិត្យស្ថានភាពសហគមន៍ទេសចរណ៍ធម្មជាតិកំពុងភ្លុក នារសៀលថ្ងៃទី០១ ខែធ្នូ ឆ្នាំ២០២៤ បន្ទាប់ពីសម្ដេចធិបតី ចាកចេញពីកម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងអង្គរវត្តលើកទី២៩។

តាមសំណេរលើគណនីហ្វេសប៊ុកផ្លូវការ សម្ដេចធិបតី ហ៊ុន ម៉ាណែត​ បានឱ្យដឹងថា សម្ដេចក៏បានជួយសាងសង់ផ្លូវកៅស៊ូ ចម្ងាយ៨គីឡូម៉ែត្រ​ លើផ្លូវក្រាលគ្រួសក្រហម​ដែលមានស្រាប់ ដេីម្បីផ្តល់ភាពងាយស្រួលក្នុងការធ្វេីដំណេីរ​ទៅមក និងកាត់បន្ថយដីហុយ និងបានផ្តល់បន្ថែមនូវធុងសំរាមក្នុងសហគមន៍ ដើម្បីថែរក្សាអនាម័យ និងបរិស្ថាន នៅក្នុងតំបន់។

សហគមន៍ទេសចរណ៍ធម្មជាតិកំពង់ភ្លុក មានទីតាំងស្ថិតក្នុង ស្រុកប្រាសាទបាគង ខេត្តសៀមរាប  ​ ជាទីកន្លែងផ្តល់នូវទស្សនីយភាពបែបធម្មជាតិ ដែលអាចឱ្យភ្ញៀវទេសចរអាចទស្សនាជីវភាពរស់នៅប្រចាំថ្ងៃរបស់ប្រជាជន​ខ្មែរតាមបែបបទអ្នកទន្លេ នៅតាមមាត់បឹងទន្លេសាប, ទស្សនាផ្ទះសង់ខ្ពស់ៗ នៅលើផ្ទៃទឹក, អុំទូកទស្សនាក្នុងភូមិ, ទស្សនាព្រៃលិចទឹក, ទស្សនាផ្ទៃបឹងទន្លេសាបដ៏ធំល្វឹងល្វើយ, ភោជនីយដ្ឋានបណ្តែតទឹក, បែចិញ្ចឹមត្រី ជាពិសេសផ្តិតយកនូវរូបភាពស្អាតៗទិដ្ឋភាពថ្ងៃរៀបលិចដ៏ស្រស់ស្អាតនៅលើផ្ទៃបឹងទន្លេសាប​ និងសម្រស់ធម្មជាតិសម្បូរបែបរបស់បឹងទន្លេសាប​ផងដែរ។

សម្ដេចប្រមុខរាជរដ្ឋាភិបាលកម្ពុជា ក៏បានកោតសរសើរចំពោះប្រជាពលរដ្ឋនៅកំពុងភ្លុក ដែលបានរួមគ្នាចងក្រងជាសហគមន៍​ ដេីម្បីផ្តល់ជូននូវសេវាកម្មយ៉ាងល្អជូនភ្ញៀវទេសចរជាតិនិងអន្តរជាតិ បប្រកបដោយស្នាមញញឹមនិងសប្បាយរីករាយ​ ជាពិសេសក៏រួមចំណែកក្នុងការលេីកកម្ពស់ជីវភាពរស់នៅប្រចាំថ្ងៃ​ និងបង្កើតផលិតផលទេសចរណ៍បន្ថែមនៅក្នុងខេត្តសៀមរាប.

គួរឱ្យដឹងថា សហគមន៍ទេសចរណ៍ធម្មជាតិកំពង់ភ្លុក បានបង្កើតឡើងនៅឆ្នាំ២០១៣ ក្នុងគោលបំណងធ្វើឲ្យប្រសើរឡើងនូវជីវភាពរស់នៅរបស់ប្រជាជនក្នុងសហគមន៍ តាមរយៈការអភិវឌ្ឍ វិស័យទេសចរណ៍ប្រកបនិរន្តភាព និងមានការទទួលខុសត្រូវខ្ពស់។

ដោយ៖ ង៉ិល ណារ៉ាត់