រដ្ឋមន្ត្រីក្រសួងកិច្ចការនារី លើកទឹកចិត្តឱ្យស្ត្រីគ្រប់រូបផ្តោតសំខាន់លើសុខភាពខ្លួន ជាពិសេសគឺសុខភាពភ្នែក

លោកស្រី អុឹង កន្ថាផាវី រដ្ឋមន្រ្តីក្រសួងកិច្ចការនារី បានលើកទឹកចិត្តឱ្យស្ត្រីគ្រប់រូបត្រូវផ្តោតសំខាន់លើសុខភាពខ្លួនឱ្យបានច្រើន ជាពិសេសគឺសុខភាពភ្នែកតែម្តង ខណៈក្នុងចំណោមមនុស្សដែលមានអាយុ៥០ឆ្នាំឡើង គឺស្រ្តីមានអត្រាពិការភ្នែក២ដង ច្រើនជាងបុរស។

លោកស្រី លើកឡើងបែបនេះនៅថ្ងៃទី១ ខែធ្នូ ឆ្នាំ២០២៤ ក្នុងកម្មវិធីអប់រំផ្សព្វផ្សាយស្តីពី «សមភាពយេនឌ័រ និងសុខភាពភ្នែក»។ ក្នុងឱកាសនោះ រដ្ឋមន្ត្រីក្រសួងកិច្ចការនារី បានលើកឡើងពីការយកចិត្តទុកដាក់ថែទាំសុខភាពភ្នែកជាប្រចាំ និងការស្វែងរកសេវាប្រឹក្សា ការពិគ្រោះយោបល់ជាមួយគ្រូពេទ្យភ្នែកនៅពេលដែលភ្នែកមានភាពមិនប្រក្រតីណាមួយកើតឡើង។ ជាមួយគ្នានេះ លោកស្រី ក៏លើកទឹកចិត្តឱ្យស្រ្តីគ្រប់រូប ត្រូវយកចិត្តទុកដាក់លើសុខភាពរបស់ខ្លួនឱ្យបានច្រើន ជាពិសេសគឺសុខភាពភ្នែកនេះតែម្តង។

លោកស្រី អុឹង កន្ថាផាវី បានបញ្ជាក់ថា៖ «ក្នុងចំណោមមនុស្សចាស់ ៥០ឆ្នាំឡើង ស្ត្រីមានអត្រាពិការភ្នែក ២ដង ច្រើនជាងបុរស (បុរសមាន ១.៦% ចំណែកស្រ្តីមាន ៣.២%)។ ប៉ុន្តែបើយើងពិនិត្យមើលទៅលើតួលេខអ្នកជំងឺទទួលបានការព្យាបាល និងបកបាយភ្នែកវិញ គឺបុរសទទួលបាន ៧៨.៥% រីឯស្រ្តីទទួលបានត្រឹមតែ ៦៨.៥% ប៉ុណ្ណោះ។ បើយើងមើលទៅលើកត្តាឧបសគ្គប្រឈមក្នុងការទទួលបានសេវាព្យាបាល គឺ ១៥.៤%នៃស្រ្តី ឆ្លើយថាមិនមានថវិកាទៅទទួលការព្យាបាល រីឯបុរសវិញមានតែ ៩.៥%ទេ»។

សូមជម្រាបថា កម្មវិធីខាងលើ មានគោលបំណង ផ្សព្វផ្សាយអំពីវិធីសាស្រ្តនៃការថែទាំភ្នែក និងរួមចំណែកក្នុងការធានាបាននូវការទទួលបានសេវាថែទាំភ្នែកប្រកបដោយគុណភាព សមភាព និងនិរន្តរភាព សម្រាប់អ្នកដែលមានតម្រូវការចាំបាច់ ជាពិសេសសម្រាប់ស្រ្តី កុមារី ជនមានពិការភាព និងជនងាយរងគ្រោះនៅមូលដ្ឋាន រួមទាំងផ្តល់ជូននូវការពិនិត្យ ព្យាបាលជំងឺភ្នែកជូនប្រជាពលរដ្ឋនៅសង្កាត់កន្ទោក ខណ្ឌកំបូលសរុបចំនួន៦០០នាក់ រួមទាំងការផ្តល់វ៉ែនតា ថ្នាំបន្តក់ភ្នែក និងមានការបញ្ជូនទៅទទួលសេវាវះកាត់ភ្នែក នៅមន្ទីរពេទ្យបង្អែករាជធានីភ្នំពេញ៕