ព័ត៌មានជាតិ

រដ្ឋមន្រ្តីក្រសួងរ៉ែ ដាក់លក្ខខណ្ឌឲ្យផ្តល់តំណែងស្រ្តីខ្មែរយ៉ាងតិច ១ រូប កាន់តួនាទីអនុប្រធាន រាល់អ្នកអនុវត្តគម្រោងថាមពលព្រះអាទិត្យ

បានផុស

៤ សប្តាហ៍ មុន

នៅ

ថ្ងៃចន្ទ ២ ធ្នូ ២០២៤

ដោយ

ថ្លែងនៅក្នុងសន្និបាតបូកសរុបសមិទ្ធផលការងារឆ្នាំ ២០២៤ និងលើកទិសដៅអនុវត្តការងារបន្តឆ្នាំ ២០២៥ រដ្ឋមន្រ្តីក្រសួងរ៉ែ និងថាមពល លោក កែវ រតនៈ បានគូសបញ្ជាក់ពីការលើកកម្ពស់តួនាទីស្រ្តីក្នុងការកាន់ការងារដឹកនាំអភិវឌ្ឍលើវិស័យថាមពលអគ្គិសនីនៅកម្បុជា។

លោករដ្ឋមន្រ្តីបានលើកឡើងពីការផ្តល់តួនាទីដល់ស្រ្តីខ្មែរកាន់តំណែងជាអនុប្រធានយ៉ាងតិចមួយរូប សម្រាប់ក្រុមហ៊ុនអនុវត្តគម្រោងថាមពលពន្លឺព្រះអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រតនៈ បានគូសបញ្ជាក់យ៉ាងដូច្នេះថា «ក្រសួងបានដាក់លក្ខខណ្ឌឱ្យអ្នកអនុវត្តគម្រោងថាមពលពន្លឺព្រះអាទិត្យផ្ដល់ការងារដល់ស្ត្រីឱ្យបានយ៉ាងតិចចំនួន ៦០% នៃកម្លាំងពលកម្មសរុបនៅក្នុងដំណាក់កាលសាងសង់គម្រោង និង ៥០% យ៉ាងតិច នៅពេលដាក់ឱ្យដំណើរការអាជីវកម្មគម្រោង ដែលក្នុងនោះក្បាលម៉ាស៊ីនដឹកនាំក្រុមហ៊ុនគម្រោង ត្រូវមានអនុប្រធានជាស្ត្រីជនជាតិខ្មែរយ៉ាងតិចចំនួន ០១ រូប»។

បន្ថែមពីនេះ បើតាមលោករដ្ឋមន្រ្តី ក្រសួងមានផែនការដាក់លក្ខខណ្ឌឱ្យអ្នកផ្តល់សេវាកម្មផ្នែកអគ្គិសនីទាំងអស់ ផ្តល់ការងារដល់ស្ត្រីយ៉ាងតិចឱ្យបាន ៣០% ទៅ ៤០% សម្រាប់សកម្មភាពសេវាកម្មនានារបស់អ្នកផ្តល់សេវាកម្មផ្នែកអគ្គិសនីនៅឆ្នាំ២០៣០។

វិស័យថាមពលបានធ្វើវិភាគទានជាចំណូលសារពើពន្ធគ្រប់ប្រភេទចំនួនប្រមាណ ៨៩,៧៥ លានដុល្លារ អាមេរិក ក្នុងការិយបរិច្ឆេទឆ្នាំ២០២៣ និងចំនួនប្រមាណ ៨០,១០ លានដុល្លារអាមេរិក ក្នុងការអនុវត្តជាក់ស្តែងរយៈពេល ៧ ខែ ឆ្នាំ២០២៤។

គិតត្រឹមខែតុលា ឆ្នាំ២០២៤ វិស័យថាមពលបានបង្កើតការងារដោយផ្ទាល់បានចំនួន ១៥ ៩៥៧ កន្លែង ជូនប្រជាពលរដ្ឋ ដែលក្នុងនោះអគ្គិសនីកម្ពុជាដែលជាសហគ្រាសអគ្គិសនីរដ្ឋមានបុគ្គលិកសរុបចំនួន ៦ ២៣១ នាក់ ក្នុងនោះមានបុគ្គលិកជាស្ត្រី ១ ១២៣ នាក់។

ដោយឡែក អ្នកកាន់អាជ្ញាបណ្ណផ្តល់សេវាកម្មផ្នែកអគ្គិសនីឯកជនមានចំនួន ៤៧៩ សហគ្រាស មានបុគ្គលិកសរុបចំនួន ៩ ៧២៦ នាក់ ក្នុងនោះបុគ្គលិកជាស្ត្រីចំនួន ១ ៩៩៥ នាក់៕