ព័ត៌មានជាតិ

សម្តេច ម៉ែន សំអន អរគុណក្រុមគ្រូពេទ្យស្ម័គ្រចិត្ត នៃអង្គការស្នាមញញឹមកម្ពុជា បានព្យាបាល វះកាត់ដោយឥតគិតថ្លៃ ជូនអ្នកជំងឺឆែបមាត់ និងក្រអូមមាត់ឆែប

បានផុស

៩ ម៉ោង មុន

នៅ

ថ្ងៃចន្ទ ២ ធ្នូ ២០២៤

ដោយ

សម្តេចកិត្តិសង្គហបណ្ឌិត ម៉ែន សំអន ឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាអ្នកតំណាងរាស្ត្រមណ្ឌលស្វាយរៀង បានសម្តែងនូវការអរគុណចំពោះទឹកចិត្តក្រុមដ៏ប្រពៃគ្រូពេទ្យស្ម័គ្រចិត្តនៃអង្គការស្នាមញញឹមកម្ពុជា បានព្យាបាល និងវះកាត់ដោយឥតគិតថ្លៃជូនអ្នកជំងឺឆែបមាត់ និងក្រអូមមាត់ឆែបនៅស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈអញ្ជើញចុះសួរសុខទុក្ខអ្នកជំងឺ និងសំណេះសំណាលជាមួយក្រុមការងារគ្រូពេទ្យស្ម័គ្រចិត្តនៃអង្គការស្នាមញញឹមកម្ពុជា នៅមន្ទីរពេទ្យខេត្តស្វាយរៀង កាលពីរសៀលថ្ងៃសៅរ៍ ១៥រោច ខែកត្តិក ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី៣០ ខែវិច្ឆិកា ឆ្នាំ២០២៤ ដែលអមដំណើរដោយអ្នកតំណាងរាស្ត្រមណ្ឌលស្វាយរៀង, លោកអភិបាលខេត្តស្វាយរៀង និងលោកជំទាវ ព្រមទាំងមន្ត្រីរាជការជុំវិញខេត្ត បានអញ្ជើញចុះសួរសុខទុក្ខអ្នកជំងឺ និងសំណេះសំណាលជាមួយក្រុមការងារគ្រូពេទ្យស្ម័គ្រចិត្តនៃអង្គការស្នាមញញឹមកម្ពុជា នៅមន្ទីរពេទ្យខេត្តស្វាយរៀង កាលពីរសៀលថ្ងៃសៅរ៍ ១៥រោច ខែកត្តិក ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី៣០ ខែវិច្ឆិកា ឆ្នាំ២០២៤។

សម្តេចកិត្តិសង្គហបណ្ឌិត ក៏បានថ្លែងអំណរគុណដល់ក្រុមការងារគ្រូពេទ្យស្ម័គ្រចិត្តនៃអង្គការស្នាមញញឹមកម្ពុជា ដែលកន្លងមកតែងតែជួយដល់កុមារ និងមនុស្សចាស់ ក្នុងការវះកាត់ដោយឥតគិតថ្លៃជូនអ្នកជំងឺឆែបមាត់ និងក្រអូមមាត់ឆែបនៅទូទាំងប្រទេស និយាយជារួម និងនិយាយដោយឡែក ការព្យាបាលនៅក្នុងខេត្តស្វាយរៀងនេះ។

សម្តេចកិត្តិសង្គហបណ្ឌិត បានបន្តទៀតថា សកម្មភាពមនុស្សធម៌នេះ ពិតជាមានតម្លៃណាស់ ដែលកើតចេញអំពីទឹកចិត្តដ៏ថ្លៃថ្លារបស់បងប្អូនដែលជាក្រុមគ្រួពេទ្យស្ម័គ្រចិត្ត បានរួមគ្នាក្នុងការបំពេញនូវការងារមនុស្សធម៌ និងពិតជាបានចូលរួមចំណែកនូវការសម្រាលបន្ទុកចំណាយរបស់ប្រជាពលរដ្ឋ ស្របតាមគោលនយោបាយកាត់បន្ថយភាពក្រីក្ររបស់រាជរដ្ឋាភិបាលកម្ពុជា។

គួររំលឹកផងដែរថា ក្រុមការងារគ្រូពេទ្យស្ម័គ្រចិត្តនៃអង្គការស្នាមញញឹមកម្ពុជា បានសហការជាមួយមន្ទីរពេទ្យខេត្តស្វាយរៀង ដោយបានផ្តល់ការវះកាត់ដោយឥតគិតថ្លៃជូនអ្នកជំងឺឆែបមាត់ ក្រអូមមាត់ឆែប និងពិការភាពមុខមាត់ផ្សេងៗ ដែលមានរយៈពេល ៣ថ្ងៃ គិតចាប់ពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៤នេះ៕

អត្ថបទ ៖ វិមាន