កម្ពុជា បន្តដេញវៀតណាម៦នាក់ទៀត ដែលលួចស្នាក់នៅធ្វើការងារខុសច្បាប់ គ្មានលិខិតឆ្លងដែន ចេញពីប្រទេស

កាលពីថ្ងៃទី៣០ ខែវិច្ឆិកា កន្លងទៅ សមត្ថកិច្ចកម្ពុជា បានបន្តបណ្ដេញជនជាតិវៀតណាមចំនួន៦នាក់ទៀត ដែលលួចស្នាក់នៅធ្វើការងារខុសច្បាប់ចេញពីប្រទេសកម្ពុជា។ នេះបើតាមសេចក្ដីប្រកាសព័ត៌មានរបស់អគ្គនាយកដ្ឋានអន្តោប្រវេសន៍ ដែលទើបនឹងផ្សព្វផ្សាយលើទំព័រហ្វេសប៊ុក នាថ្ងៃទី០២ ខែធ្នូ នេះ។

អគ្គនាយកដ្ឋានអន្តោប្រវេសន៍តាមរយៈនាយកដ្ឋានស៊ើបអង្កេត និងអនុវត្តនីតិវិធី​ បានបណ្ដេញជនជាតិវៀតណាម៦នាក់ ក្នុងនោះស្រី១នាក់ចេញពីប្រទេសកម្ពុជា តាមច្រកទ្វារព្រំដែនអន្តរជាតិត្រពាំងផ្លុង ខេត្តត្បូងឃ្មុំ។

តាមអគ្គនាយកដ្ឋានអន្តោប្រវេសន៍ ជនជាតិវៀតណាមល្មើសច្បាប់ទាំងនេះ គឺខ្លួនទទួលបានពីស្នងការដ្ឋាននគរបាលខេត្តបន្ទាយមានជ័យ។​

ជាការកត់សម្គាល់ កម្ពុជាតែងតែបណ្ដេញជនជាតិវៀតណាម ដែលបំពានច្បាប់កម្ពុជាចេញពីប្រទេស។ ក្នុងខែវិច្ឆិកា កម្ពុជា បានបណ្ដេញជនជាតិវៀតណាមចំនួន៩៧នាក់ចេញពីប្រទេស ដែលប្រព្រឹត្តបទល្មើសលួចស្នាក់នៅធ្វើការងារខុសច្បាប់ និងនេសាទដោយប្រើប្រាស់ឧបករណ៍ឆក់ គ្មានលិខិតឆ្លងដែន។

គួរឱ្យដឹងថា នៅក្នុងខែតុលា កម្ពុជា បានបណ្ដេញជនជាតិវៀតណាមចំនួន៨២នាក់ចេញពីប្រទេស ដែលជាប់ពាក់ព័ន្ធនឹងករណីស៊ីឈ្នួលពពោះជំនួស និងស្នាក់នៅធ្វើការដោយខុសច្បាប់។

កាលពីខែកញ្ញា កន្លងទៅ អគ្គនាយកដ្ឋានអន្តោប្រវេសន៍ ក៏បានបណ្ដេញជនជាតិវៀតណាមចេញពីប្រទេសចំនួន២លើក ដែលមានជនជាតិវៀតណាមសរុប៨១នាក់៕

ដោយ៖ ង៉ិល ណារ៉ាត់