តំបន់មេសំ ឃុំចុងផ្លាស់ ប្រែជាស្ងាត់ជ្រងំ! ពលរដ្ឋស្នើសុំប្រកបរបររកកាកសំណល់រ៉ែមាសឡើងវិញ

ប្រជាពលរដ្ឋរស់នៅក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី ភាគច្រើនប្រកបរបរកសិកម្ម និងខ្លះទៀត ប្រកបមុខរបរ រុករក និងកិនកាកសំណល់រ៉ែមាស ដើម្បីទ្រទ្រង់ជីវភាពគ្រួសារ។ យ៉ាងណាក្ដី ក្រោយកម្លាំងចម្រុះ និងមន្រ្ដីជំនាញក្រសួងរ៉ែ និងថាមពល បើកប្រតិបត្តិការបង្ក្រាបការរុករករ៉ែមាសអនាធិបតេយ្យនិងមិនអនុញ្ញាតិឲ្យពលរដ្ឋប្រកបរបរនេះតទៅទៀត។

អ្នកស្រី ពាប់ សិទ្ធ អាយុ៤៨ឆ្នាំ មានទីលំនៅបច្ចុប្បន្នភូមិពូទុង ឃុំចុងផ្លាស់ បានឲ្យដឹង​ថា សព្វថ្ងៃគាត់មានមុខរបរលក់ដូរនៅផ្ទះបន្តិចបន្តួច ដើម្បីដោះស្រាយជីវភាពប្រចាំថ្ងៃ ប៉ុន្តែបន្ទាប់ពីមានករណីសមត្ថកិច្ចជំនាញចុះបង្ក្រាបអ្នកប្រកបរបរកិនរ៉ែមាសមក អ្នកស្រីលក់មិនសូវដាច់នោះទេ ដោយសារអ្នកភូមិមួយចំនួនបានបិទទ្វារផ្ទះចោល ធ្វើឲ្យភូមិមានសភាពស្ងប់ស្ងាត់។

អ្នកស្រីបានអំពាវនាវឲ្យអាជ្ញាធរ រកដំណោះស្រាយជូនប្រជាពលរដ្ឋ ដែលមិនមានមុខរបរអ្វី ក្រៅពីការរុករក និងកិនកាកសំណល់រ៉ែមាស ដើម្បីដោះស្រាយជីវភាពប្រចាំថ្ងៃ។

លោក ទី សុផល ប្រធានមន្ទីររ៉ែ និងថាមពល ខេត្តមណ្ឌលគិរី បានឲ្យដឹងថា កន្លងមកមានប្រជាពលរដ្ឋ បានដាក់សំណើមកមន្រ្តីជំនាញជាច្រើនលើកច្រើនសារ ពិសេសសំណូមពរក្នុងវេទិកាសាធារណៈ ពីបញ្ហាសុំកិនកាកសំណល់រ៉ែមាសឡើងវិញនេះផងដែរ។

គួររំលឹកផងដែរថា កាលពីដើមខែវិច្ឆិកា ឆ្នាំ២០២៤ កន្លងទៅ ក្រសួងរ៉ែ និងថាមពល បានបង្ក្រាបទីតាំងអាជីវកម្មរ៉ែមាសខុសច្បាប់ក្នុងតំបន់មេសំ ឃុំចុងផ្លាស់ ​បានចំនួន ៥៦ទីតាំង និងរកឃើញអណ្តូងរ៉ែចំនួន៣៣កន្លែង៕

អត្ថបទ៖ រៀម សុខហេង