ព័ត៌មានជាតិ

អភិបាលខេត្តតាកែវ ឲ្យមង្គលការ រៀបចំតែមួយព្រឹក អត់ឲ្យមានលេងអកកេស ជប់លៀងពេលល្ងាច

បានផុស

៤ years មុន

នៅ

ថ្ងៃចន្ទ ១៥ មីនា ២០២១

ដោយ

អភិបាលខេត្តតាកែវ លោក អ៊ូច ភា បានដាក់បញ្ជាឲ្យអាជ្ញាធរគ្រប់ស្រុកក្រុងក្នុងមូលដ្ឋានខេត្តតាកែវ ត្រូវចុះណែនាំបងប្អូនប្រជាពលរដ្ឋ ដែលត្រូវរៀបចំពិធីមង្គលការ ត្រូវកាត់បន្ថយមនុស្សចូលរួមកុំឲ្យកកកុញ នាំឲ្យមានហានិភ័យឆ្លងកូវីដ ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីណែនាំ លោកអភិបាលខេត្តឲ្យអាជ្ញាធរមូលដ្ឋានបន្តអប់រំណែនាំដល់បងប្អូនប្រជាពលរដ្ឋដែលត្រូវរៀបចំពិធីមង្គលការកូនចៅ អនុញ្ញាតឲ្យរៀបចំតែមួយព្រឹក មិនអាចអូសបន្លាយដល់ពិធីជប់លៀងពេលល្ងាច និងការលេងអកកេសកំដររោង។

លោកបន្តថា ចំណាត់ការនេះដើម្បីឆ្លើយតបស្ថានភាពបន្ទាន់ដែលវីរុសកូវីដបានបន្តរាលដាលនិងបានឆ្លងដល់ខេត្តក្រុងមួយចំនួនរួចទៅហើយ។

អាជ្ញាធរខេត្តតាកែវ កំពុងចុះយកសំណាកគ្រួសារម្ចាស់ពិធីមង្គលការមួយនៅផ្សារអង្គសឹង ឃុំរវាង ស្រុកសំរោង ខេត្តតាកែវ ជាប់ពាក់ព័ន្ធផ្ទាល់ជាមួយ លោក សោភ័ណ្ឌ កក្កដា បន្ទាប់ពីបានចូលរួមពីធីមង្គលការកាលពីថ្ងៃទី ១២ ខែមីនា រកឃើញវិជ្ជមានជំងឺកូវីដ១៩។

បើតាមលោក នុត ស៊ីណាត ប្រធានមន្ទីរសុខាភិបាលខេត្តតាកែវ បានប្រាប់កម្ពុជាថ្មីនៅព្រឹកថ្ងៃទី ១៥ ខែមីនាថា ក្រុមគ្រូពេទ្យកំពុងចុះយកសំណាក ហើយឲ្យកងកម្លាំងឃ្លាំមើល និងព័ទ្ធផ្ទះគ្រួសារអ្នករៀបការ និងអ្នកពាក់ព័ន្ធផ្សេងទៀត ដោយផ្តើមយកសំណាកពីគ្រួសារម្ចាស់ដើមការ ដែលប៉ះពាល់ផ្ទាល់ និងបន្តស្រាវជ្រាវរកអ្នកប៉ះពាល់ផ្សេងទៀត ហើយដាក់ឲ្យធ្វើចត្តាឡីស័ក ១៤ ថ្ងៃ។

គួរបញ្ជាក់ថា លោកកក្កដា សោភ័ណ្ឌ បានតេស្តមានវិជ្ជមានកូវីដ១៩ កាលពីថ្ងៃទី ១៤ ខែមីនា បន្ទាប់ពីបានទៅចូលរួមពីធីមង្គលការមួយកាលពីថ្ងៃទី ១២ ខែមីនា នៅផ្សារអង្គសឹង ឃុំរវាង ស្រុកសំរោង ខេត្តតាកែវ។ ក្នុងពេលចូលរួមលោកបានថតរួបកៀកកិតជាមួយកូនក្រមុំ និងបានតែងខ្លួនធ្វើជាអ្នកកំដរនៅខាងមុខរោងទៀតផង។

គិតត្រឹមម៉ោង ០៧ ០០ ព្រឹកថ្ងៃ ១៥ មីនា ក្រសួងសុខាភិបាលប្រកាសមានករណីឆ្លងថ្មី ២០ នាក់ទៀត ក្នុងនោះ ១៨ នាក់ពាក់ព័ន្ធព្រឹត្តិការណ៍ ២០ កុម្ភៈ។ ជាមួយគ្នានេះ អ្នកជំងឺ ៨៣ នាក់បានជះសះស្បើយចាកចេញពីមន្ទីរពេទ្យ៕