ព័ត៌មានជាតិ

ពលរដ្ឋខណ្ឌសែនសុខ អាយុ ៦០ ឆ្នាំ ឡើង ស្នើ រដ្ឋបាលរាជធានី អន្តរាគមន៍ធ្វើប័ណ្ណ ប ស ស បាន

បានផុស

៤ ខែ មុន

នៅ

ថ្ងៃព្រហស្បតិ៍ ៥ ធ្នូ ២០២៤

ដោយ

ប្រជាពលរដ្ឋរស់នៅខណ្ឌសែនសុខ បានស្នើសុំ រដ្ឋបាលរាជធានីភ្នំពេញ ជួយអន្តរាគមន៍ធ្វើយ៉ាងណាឲ្យពួកគាត់ដែលមានអាយុចាប់ពី ៦០ ឆ្នាំ ឡើងទៅ អាចមានសិទ្ធិធ្វើប័ណ្ណ ប ស ស ,ចាត់វិធានការចំពោះក្រុមយុវជនជក់បារីអេឡិចត្រូនិក ,រៀបចំសណ្ដាប់ធ្នាប់លើផ្លូវសាធារណៈនៅផ្សារដើមអម្ពិល ,ធ្វើប័ណ្ណកម្មសិទ្ធិ ,ធ្វើផ្លូវ និងធ្វើលូ ក្នុងមូលដ្ឋានផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើរបស់ប្រជាពលរដ្ឋខាងលើនេះបានធ្វើឡើង នាព្រឹកថ្ងៃទី ០៥ ខែធ្នូ ឆ្នាំ ២០២៤ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី ០៤ ឆ្នាំ ២០២៤ ខណ្ឌសែនសុខ នៅពិភពថ្មីសែនសុខ ផ្លូវ ១០០៣ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ក្រោមអធិបតីភាព លោក ជួប ខុន សមាជិកក្រុមប្រឹក្សា តំណាង លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក សុខ ពេញវុធ អភិបាលរងរាជធានីភ្នំពេញ និងជាតំណាង លោក ឃួង ស្រេង អភិបាលរាជធានីភ្នំពេញ។

ប្រជាពលរដ្ឋលើកឡើងថា ប្រជាពលរដ្ឋដែលមានអាយុចាប់ពី ៦០ ឆ្នាំ ឡើង ច្រើននាក់ណាស់ ចង់ធ្វើប័ណ្ណ ប ស ស ខណៈពួកគាត់មិនអាចធ្វើបាន។ ដូច្នេះ សូមរដ្ឋបាលរាជធានីភ្នំពេញ ជួយអន្តរាគមន៍ផង។ ពួកគាត់ ស្នើកងកម្លាំង និងអាជ្ញាធរ ចាត់វិធានការចំពោះក្រុមយុវជនជក់បារីអេឡិចត្រូនិកដែលធ្វើឲ្យប៉ះពាល់សុខភាព។ ស្នើសុំរៀបចំសណ្ដាប់ធ្នាប់លើផ្លូវសាធារណៈនៅផ្សារដើមអម្ពិលដែលបង្កឲ្យមានការកកស្ទះចរាចរណ៍រាល់ថ្ងៃ។ ស្នើសុំធ្វើប័ណ្ណកម្មសិទ្ធិ សុំការជួសជុល និងសម្រួលធ្វើផ្លូវ ធ្វើលូ។

លោក សុខ ពេញវុធ មានប្រសាសន៍ថា វេទិកាផ្សព្វផ្សាយ និងពិគ្រោះយោបល់នៅខណ្ឌសែនសុខ នាព្រឹកនេះ មានប្រជាពលរដ្ឋចំនួន ១០ នាក់ បានលើកឡើងជាសំណើ និងសំណូមពរ ដោយផ្ទាល់មាត់ ដើម្បីឲ្យអាជ្ញាធរជួយដោះស្រាយ និងជាលាយលក្ខណ៍អក្សរចំនួន ៨២ ច្បាប់ ដាក់ចូលក្នុងប្រអប់សំបុត្រ។

ចំពោះសំណើ និងសំណូមពរ ដោយផ្ទាល់មាត់ លោក សុខ ពេញវុធ បានធ្វើការដោះស្រាយភ្លាមៗ ជាមួយនឹងការបញ្ជាក់ថា ការស្នើរបស់ប្រជាពលរដ្ឋខាងលើ ក្នុងនាមអាជ្ញាធរនឹងធ្វើការដោះស្រាយ ដោយឲ្យអាជ្ញាធរ និងមន្ត្រីជំនាញ ចុះពិនិត្យ និងវាយតម្លៃ ដើម្បីឆ្លើយតប។ ពោលគឺអ្វីដែលថ្នាក់ខណ្ឌ ឬ ថ្នាក់រាជធានីភ្នំពេញ ធ្វើបាន នឹងធ្វើភ្លាម។ តែបើហួសពីសមត្ថភាព ក៏មិនទុកចោលដែរ គឺសុំគោលការណ៍ទៅថ្នាក់លើបន្តទៀត ជាក់ស្ដែងដូចជាការស្នើសុំពីសំណាក់ប្រជាពលរដ្ឋដែលមានអាយុចាប់ពី ៦០ ឆ្នាំ ឡើង ឲ្យមានសិទ្ធិក្នុងការធ្វើប័ណ្ណ ប ស ស រដ្ឋបាលរាជធានីភ្នំពេញ សុំគោលការណ៍ទៅថ្នាក់ជាតិបន្តទៀត។ ដោយឡែកចំពោះសំណើជាលាយលក្ខណ៍អក្សរចំនួន ៨២ ច្បាប់ រដ្ឋបាលរាជធានីភ្នំពេញ នឹងយកទៅដោះស្រាយពេលក្រោយ។

លោក ជួប ខុន លើកឡើងថា យោងតាមច្បាប់ ក្រុមប្រឹក្សារាជធានី ត្រូវរៀបចំឲ្យមានវេទិកាផ្សព្វផ្សាយ និងពិគ្រោះយោបល់ នៅតាមខណ្ឌនានា ក្នុងរាជធានីភ្នំពេញ អំឡុងត្រីមាសទី ៤ នៃឆ្នាំ នីមួយៗ និងក្រុមប្រឹក្សាខណ្ឌ ត្រូវរៀបចំឲ្យមានវេទិកាផ្សព្វផ្សាយ និងពិគ្រោះយោបល់ តាមសង្កាត់នានា ក្នុងខណ្ឌរបស់ខ្លួន អំឡុងខែមិថុនា នៃឆ្នាំនីមួយៗ។ ជាក់ស្ដែង ក្រុមប្រឹក្សាខណ្ឌ បានអនុវត្តរួចហើយ ក្នុងឆ្នាំ ២០២៤ នេះ ស្របតាមច្បាប់កំណត់។ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនេះដែរ ត្រូវបានធ្វើឡើង ក្នុង ១ ឆ្នាំ ម្ដង ដើម្បីដោះស្រាយរាល់កង្វល់ សំណូមពរ និងសំណើរបស់ប្រជាពលរដ្ឋ ដោយផ្ដោតសំខាន់ពាក់ព័ន្ធនឹងកង្វល់ផ្ទាល់ពលរដ្ឋលើបញ្ហា ចំនួន ៤ ដែលមានដូចជា ៖ ទី១.បញ្ហាសន្តិសុខ គ្រឿងញៀន ល្បែង ស៊ីសង ចោរលួច ប្លន់ ពិសេសគោលនយោបាយភូមិ-សង្កាត់ មានសុវត្ថិភាព។ ទី២.ការអភិវឌ្ឍមូលដ្ឋាន ផ្លូវ ទឹក ភ្លើង ប្រព័ន្ធលូជាដើម។ ទី៣.បរិស្ថាន សុខុមាលភាពសង្គម ការបម្រើសេវាសុខាភិបាល និង ទី៤.ការផ្តល់សេវាសាធារណៈនៅថ្នាក់ខណ្ឌដែលអាជ្ញាធរបានផ្ដល់ជូន បានផ្ដល់ជូនបានល្អហើយឬនៅ មានអំពើពុករលួយ នៃការផ្ដល់សេវានេះទេ?៕

អត្ថបទ ៖ ស្រីរ័ត្ន