ផ្លូវ​ជាតិ​សំខាន់ៗ ៣ ខ្សែ បញ្ចប់​ការ​សាងសង់​១០០% ​តភ្ជាប់​គ្នា​យ៉ាង​ប្រទាក់ក្រឡា

ផ្លូវ​ជាតិ​សំខាន់ៗ​ចំនួន ៣ ខ្សែ​បាន​បញ្ចប់​ការ​សាងសង់ ១០០% នៅ​ឆ្នាំ ២០២៤ ដែល​បាន​សម្រួល​ការ​ធ្វើ​ដំណើរ​និង​ការ​តភ្ជាប់​យ៉ាង​ប្រទាក់ក្រឡា​គ្នា​ពី​តំបន់​មួយ​ទៅ​តំបន់​មួយ។

ផ្លូវ​ជាតិលេខ ៣១

ផ្លូវជាតិលេខ ៣១ ​បំបែក​ពី​​បែកគុស​ទៅ​កំពង់ត្រាចខេត្តកំពត ប្រវែងសរុប ៥៣,៥៤ គីឡូម៉ែត្រ បាន​បញ្ចប់​​ការ​​សាងសង់ ១០០%​។

ផ្លូវជាតិលេខ៣១ ត្រូវបានអតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន ធ្វើជាអធិបតីភាព ក្នុង​ពិធី​បើកការដ្ឋានសាងសង់ និងស្តារលើកកម្រិតគុណភាពកាលពីថ្ងៃទី២៩ ខែធ្នូ ឆ្នាំ២០២២។

​ផ្លូវ​ជាតិមួយនេះ​មិនត្រឹមតែជាផ្លូវសម្រាប់ធ្វើដំណើរបម្រើក្នុងវិស័យដឹកជញ្ជូន តែក៏​ជា​ច្រក​របៀង​សម្រាប់ការតភ្ជាប់ទំនាក់ទំនងសេដ្ឋកិច្ចរវាងកម្ពុជា ប្រទេសវៀតណាម និង​ប្រទេស​ថៃផងដែរ។

ផ្លូវជាតិលេខ ៣៣

ផ្លូវ​ជាតិលេខ៣៣ (កំពត-ច្រកព្រំដែនអន្តរជាតិព្រែកចាក) ក៏​សម្រេច​វឌ្ឍនភាព​ការងារ​សាងសង់​បញ្ចប់ ១០០% គិត​ត្រឹម​ចុង​ឆ្នាំ​២០២៤ នេះ។

កាលពីថ្ងៃពុធ ទី២៧ ខែវិច្ឆិកា ឆ្នាំ២០២៤ លោក ប៉ាល់ ចន្ទតារា រដ្ឋលេខាធិការ ក្រសួង​សាធារណការ និង​ដឹកជញ្ជូន និង​ជា​នាយកគម្រោង បានដឹកនាំ​ក្រុមការងារ​ចុះ​ពិនិត្យបច្ចេកទេស និង​វឌ្ឍនភាព​ការងារពង្រីកនិង​លើកកម្រិតគុណភាពគម្រោងផ្លូវជាតិលេខ ៣៣ ចាប់​ពីខេត្តកំពត ដល់​ច្រកព្រំដែន​អន្តរជាតិព្រែកចាក (ព្រំដែនកម្ពុជា-វៀតណាម)។

លោក ប៉ាល់ ចន្ទតារា បាន​គូស​បញ្ជាក់​ថា គិតត្រឹមចុងខែវិច្ឆិកា ឆ្នាំ២០២៤ គម្រោង​ស្តារ​និង​លើកកម្រិតគុណភាពផ្លូវជាតិលេខ ៣៣ បានសម្រេចលទ្ធផលការងារបញ្ចប់ ១០០% និង​ត្រៀម​ធ្វើការប្រគល់-ទទួលនាពេលឆាប់ៗខាង​មុខ​នេះ។

គម្រោងពង្រីក និងលើកកម្រិតគុណភាពផ្លូវជាតិលេខ៣៣ បើកការដ្ឋានជាផ្លូវការកាលពីថ្ងៃទី៣០ ខែធ្នូ ឆ្នាំ២០២២។ ​​ផ្លូវនេះតភ្ជាប់ពីខេត្តកំពត (បំបែក​ពីផ្លូវជាតិលេខ៣ ត្រង់ចំណុច​គ.ម​១៤៨+១០០) ទៅកាន់ច្រកព្រំដែនអន្តរជាតិព្រែកចាក (ព្រំដែនកម្ពុជា-វៀតណាម) ឆ្លងកាត់ភូមិសាស្រ្តស្រុកទឹកឈូ ស្រុក​កំពង់ត្រាច នៃខេត្តកំពត ហើយឆ្លងកាត់ភូមិសាស្រ្តក្រុងកែប និងស្រុកដំណាក់ចង្អើរ នៃខេត្តកែប។

ផ្លូវជាតិលេខ ៧១ សេ

គម្រោងសាងសង់ផ្លូវជាតិលេខ ៧១C ក៏​សម្រេចលទ្ធផលបញ្ចប់​ ១០០%។ ផ្លូវជាតិ​លេខ ៧១C មាន​ប្រវែង ១១៤,៦២ គីឡូម៉ែត្រ ចាប់ពីផ្លូវជាតិលេខ៧ ចំណុច PK១៥០+៧០០ ក្នុង​ខេត្តត្បូងឃ្មុំ ទៅ​ដល់​ផ្លូវជាតិលេខ ៧១ ចំណុច PK៣០+៤០០ ខេត្ត​កំពង់ចាម ដែល​នឹង​ត្រៀមសម្ពោធ​ដាក់ឱ្យប្រើប្រាស់​ជាផ្លូវការឆាប់ៗនេះ។

ផ្លូវជាតិលេខ ៧១C ត្រូវបានសាងសង់ដោយក្រុមហ៊ុនសៀងហៃគ្រុប( SCG) និងទីប្រឹក្សា​បច្ចេកទេស​ដោយក្រុមហ៊ុន ក្វាងចូវ វ៉ាងអាន ប្រើប្រាស់ហិរញ្ញប្បទានថវិកាពីសាធារណរដ្ឋប្រជាមានិតចិន។

ផ្លូវជាតិដ៏សំខាន់នេះជាប្រភេទ AC/DBST ដែល​បាន​ចុះកិច្ចសន្យាសាងសង់នៅថ្ងៃទី២០ ខែឧសភា ឆ្នាំ​២០២០ និង​ចាប់​ផ្តើម​សាងសង់​នៅថ្ងៃទី០២ ខែមេសា ឆ្នាំ២០២១ ដែលមានរយៈពេលសាងសង់ ៤២ ខែ និង​រយៈពេល​ថែទាំ(ក្នុងកិច្ចសន្យា) ២៤ខែ។

ដោយ​ឡែក ផ្លូវ​ជាតិលេខ ៤១ ដែលជា​ខ្សែ​ផ្លូវជាតិ​ដ៏​សំខាន់មួយ​ទៀត បើតាម​មន្រ្តីក្រសួង​សាធារណការ​និង​ដឹកជញ្ជូន ការ​សាងសង់​សម្រេ​ច​បាន​ជាង ៩៧% គិតត្រឹមដំណាច់ខែវិច្ឆិកា ឆ្នាំ២០២៤។

គិតត្រឹមដំណាច់ខែវិច្ឆិកា ឆ្នាំ២០២៤ ការអនុវត្តគម្រោងសម្រេចបានលទ្ធផលជារួមបាន ៩៧,០១% ដោយក្នុងនោះ ការងារអ៊ុតកៅស៊ូ AC បានបញ្ចប់ស្ទើរ ១០០ ភាគរយ ការងារបំពាក់​សម្ភារសុវត្តិភាព​ចរាចរណ៍ (គំនូសចរាចរណ៍ ផ្លាកសញ្ញា ផ្លាកបង្ហាញទិសផ្លូវ របារ-Guardrail និងការងារចាំបាច់ផ្សេងៗ ក៏បានបញ្ចប់ស្ទើររួចរាល់ហើយដែរ។

គម្រោងស្ដារនិង​លើកកម្រិត​គុណភាពផ្លូវជាតិលេខ៤១ ប្រវែងសរុប ៩៥,២៧ គីឡូម៉ែត្រ ចាប់ផ្តើមពីភូមិថ្នល់ទទឹង ឃុំដំណាក់អំពិល ស្រុកអង្គស្នួល នៃខេត្តកណ្ដាល (ចំណុចប្រសព្វផ្លូវជាតិលេខ ៤) រហូត​ដល់ភូមិល្អាង ឃុំល្អាង ស្រុកដងទង់ នៃខេត្តកំពត (ចំណុចផ្លូវជាតិលេខ ៣)។

លោក ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងស្ដារ និងលើកកម្រិតផ្លូវជាតិលេខ៤១ កាលពី​ថ្ងៃអង្គារ ទី៣ ខែធ្នូ ឆ្នាំ២០២៤ បាន​ដឹកនាំក្រុមការងារ​ចុះ​ពិនិត្យការងារសាងសង់ផ្លូវជាតិលេខ៤១ ដោយមានការចូលរួមពី​មន្រ្តី​ក្រសួងសាធារណការ និង​ដឹកជញ្ជូន ក្រុមហ៊ុនសាជីវកម្មស្ពាន-ថ្នល់ចិន (CRBC) និងក្រុមហ៊ុនទីប្រឹក្សាបច្ចេកទេស WACC។

ការចុះពិនិត្យលើវឌ្ឍនភាពការងារសាងសង់​ ដើម្បីឈានទៅដំណាក់កាលនៃការប្រគល់-ទទួល នាពេលខាងមុខមានន័យថាគម្រោងផ្លូវនេះសម្រេចលទ្ធផលសាងសង់ជិតរួចរាល់ទាំងស្រុងហើយ៕