ព័ត៌មានជាតិ

ពេលកម្មករជួបគ្រោះថ្នាក់ការងារ ថៅកែត្រូវបញ្ជូនរបាយការណ៍មក ប.ស.ស យ៉ាងយូរ ៤៨ ម៉ោង

បានផុស

២ ម៉ោង មុន

នៅ

ថ្ងៃសុក្រ ៦ ធ្នូ ២០២៤

ដោយ

បេឡាជាតិសន្តិសុខសង្គម(ប.ស.ស) បានឱ្យដឹងថា នៅពេលមានកម្មករ-និយោជិត ជាសមាជិក ប.ស.ស ជួបគ្រោះថ្នាក់ការងារ ថៅកែ ម្ចាស់សហគ្រាស គ្រឹះស្ថាន ឬ អ្នកតំណាងជនរងគ្រោះ ត្រូវបញ្ជូនរបាយការណ៍ហានិភ័យការងារ និងឯកសារពាក់ព័ន្ធមក ប.ស.ស ក្នុងរយៈពេលយ៉ាងយូរ ៤៨ ម៉ោង ដើម្បីជួយសម្របសម្រួលជនរងគ្រោះទៅកាន់មន្ទីរពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប.ស.ស បានបន្តថា ដើម្បីចៀសវាងការបាត់បង់អត្ថប្រយោជន៍របបសន្តិសុខសង្គមផ្នែកហានិភ័យការងារ នៅពេលមានកម្មករ-និយោជិត ជាសមាជិក ប.ស.ស ជួបគ្រោះថ្នាក់ការងារ ថៅកែ ម្ចាស់សហគ្រាស គ្រឹះស្ថាន ឬ អ្នកតំណាងជនរងគ្រោះ ត្រូវជូនដំណឹងមក ប.ស.ស តាមរយៈលេខ ១២៩៧ ឬ ១២៨៦ ដើម្បីជួយសម្របសម្រួលជនរងគ្រោះទៅកាន់មន្ទីរពេទ្យ។ ត្រូវបញ្ជូនរបាយការណ៍ហានិភ័យការងារ និងឯកសារពាក់ព័ន្ធមក ប.ស.ស ក្នុងរយៈពេលយ៉ាងយូរ ៤៨ ម៉ោង នៃថ្ងៃធ្វើការ បន្ទាប់ពី កម្មករ-និយោជិត ទទួលរងហានិភ័យការងារ តាមរយៈអ៊ីមែល ៖ [email protected] ឬ យកមកដាក់ផ្ទាល់នៅទីស្នាក់ការ ប.ស.ស ដែលនៅជិតបំផុត។

ប.ស.ស បានបញ្ជាក់ថា ដើម្បីទទួលបានសេវាស្ដារនីតិសម្បទាផ្នែកវេជ្ជសាស្ត្រ សមាជិក ប.ស.ស ត្រូវបំពេញលក្ខខណ្ឌដូចខាងក្រោមដូចជា មានប័ណ្ណសមាជិក ប.ស.ស មានសុពលភាព បានទទួលរងគ្រោះថ្នាក់ ឬ ជំងឺក្រៅពីហានិភ័យការងារអំឡុងពេលប័ណ្ណសមាជិក ប.ស.ស មានសុពលភាព បង្ហាញខ្លួនចំពោះមុខមន្ត្រីជំនាញរបស់ ប.ស.ស ដើម្បីពិនិត្យ វាយតម្លៃ និងតម្រង់ទិសការផ្តល់សេវា។

ផ្តល់សេវាស្តារនីតិសម្បទាផ្នែកវេជ្ជសាស្ត្រ ត្រូវផ្តល់ដោយមូលដ្ឋានសុខាភិបាលជាដៃគូ ប.ស.ស សម្រាប់គាំទ្រ អំឡុងពេលផ្តល់សេវាព្យាបាល និងថែទាំវេជ្ជសាស្ត្រ លើកលែងតែមានការស្នើសុំរបស់សាមីជនក្នុងការប្រើប្រាស់ សេវាស្តារនីតិសម្បទានៅតាមអង្គភាពផ្តល់សេវាស្តារនីតិសម្បទាផ្សេងទៀតស្របតាមការកំណត់របស់ ប.ស.ស។

សមាជិក ប.ស.ស ត្រូវដាក់ពាក្យស្នើសុំជាលាយលក្ខណ៍អក្សរមក ប.ស.ស ដើម្បីប្រើប្រាស់សេវាស្ដារនីតិសម្បទា ដោយមានភ្ជាប់មកជាមួយនូវវេជ្ជបញ្ជារបស់មូលដ្ឋានសុខាភិបាលជាដៃគូ ប.ស.ស ឬ ទម្រង់វាយតម្លៃ តម្រូវការសេវាស្តារនីតិសម្បទាពីអង្គភាពផ្តល់សេវាស្តារនីតិសម្បទាផ្សេងទៀត។

ការស្នើសុំនេះ ត្រូវធ្វើឡើងដោយសាមីជនផ្ទាល់ ឬ អ្នកតំណាង ក្នុងករណីស្ថានភាពរបួស ឬ ពិការភាពរបស់សមាជិក ប.ស.ស មានសភាពធ្ងន់ធ្ងរ៕

អត្ថបទ ៖ សំអឿន

Related Topics:ប.ស.ស