ព័ត៌មានជាតិ

សម្តេច ម៉ែន សំអន ថ្លែងអំណរគុណចំពោះបេសកកម្មប្រកបដោយជោគជ័យរបស់ ឯកអគ្គរដ្ឋទូតវៀតណាមនៅកម្ពុជា

បានផុស

៤ ខែ មុន

នៅ

ថ្ងៃចន្ទ ៩ ធ្នូ ២០២៤

ដោយ

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា បានថ្លែងនូវអំណរគុណចំពោះបេសកកម្មប្រកបដោយជោគជ័យរបស់ ឯកអគ្គរដ្ឋទូត នៃសាធារណរដ្ឋសង្គមនិយមវៀតណាមប្រចាំកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈពេលអនុញ្ញាតឱ្យ លោក ង្វៀន ហួយតាំង ឯកអគ្គរដ្ឋទូត នៃសាធារណរដ្ឋសង្គមនិយមវៀតណាម ចូលជួបជម្រាបលាពេលបញ្ចប់អាណត្តិបេសកកម្មការទូតនៅកម្ពុជា នារសៀលថ្ងៃចន្ទ ៩ កើត ខែមិគសិរ ឆ្នាំរោង ឆស័ក ព.ស ២៥៦៨ ត្រូវនឹង ថ្ងៃទី ៩ ខែធ្នូ ឆ្នាំ ២០២៤ នៅវិមាន ៧ មករា។

លោក ង្វៀន ហួយតាំង បានគោរពថ្លែងអំណរគុណចំពោះ សម្តេចកិត្តិសង្គហបណ្ឌិត ដែលបានអនុញ្ញាតឱ្យលោកចូលជួបសម្តែងការគួរសម។ លោកក៏បានមានប្រសាសន៍ថា ក្នុងបេសកកម្មការទូតនៅកម្ពុជា បានជំរុញឱ្យមានទំនាក់ទំនងរវាងប្រទេសទាំងពីរកាន់តែល្អប្រសើរឡើង ជាពិសេសលើវិស័យវិនិយោគ, ទេសចរណ៍, ពាណិជ្ជកម្ម, អប់រំ, និងវិស័យសុខាភិបាលជាដើម។ល។ លោកក៏បានបញ្ជាក់ផងដែរថា ទំនាក់ទំនងបេសកកម្មការទូតដ៏ល្អនេះ ដោយសារមានការជួយជ្រោមជ្រែង និងយកចិត្តទុកដាក់ពីថ្នាក់ដឹកនាំកម្ពុជាពីគ្រប់លំដាប់ថ្នាក់។

សម្តេចកិត្តិសង្គហបណ្ឌិត បានថ្លែងអំណរគុណជូនចំពោះ លោក ង្វៀន ហួយតាំង ដែលបានប្រឹងប្រែងយ៉ាងពេញទំហឹងក្នុងការបំពេញបេសកកម្មការទូតរបស់លោកនៅកម្ពុជា ហើយ សម្តេចក៏បានជូនពរឱ្យលោក ង្វៀន ហួយតាំង បានទទួលជោគជ័យជាបន្តទៀតនៅលើរាល់កិច្ចការរបស់លោកទៅថ្ងៃអនាគត៕

អត្ថបទ ៖ វិមាន