មន្ត្រីជាន់ខ្ពស់អប់រំ លើកទឹកចិត្តសាលាឯកជនខិតខំអភិវឌ្ឍន៍កម្មវិធីសិក្សាថ្មីៗ ឆ្លើយតបការអប់រំនាសតវត្សទី២១

លោកស្រី គឹម សេដ្ឋានី រដ្ឋលេខាធិការប្រចាំការនៃក្រសួងអប់រំយុវជន និងកីឡា បានលើកទឹកចិត្តសាលាឯកជនត្រូវខិតខំអភិវឌ្ឍន៍កម្មវិធីសិក្សាថ្មីៗបន្ថែមទៀត ដើម្បីឆ្លើយតបទៅនឹងការវិវត្តនៃការអប់រំនាសតវត្សទី២១នេះ។

ថ្លែងក្នុងពិធីចែកវិញ្ញាបនបត្រ និងបណ្ណសរសើរដល់សិស្សានុសិស្សជាង៩០០នាក់ដល់សាលាឯកជនកាលពីរសៀលថ្ងៃទី០៨ធ្នូ លោកស្រីមានប្រសាសន៍ថា បច្ចុប្បន្ននេះសង្កេតឃើញថា សាលាឯកជនជាច្រើនបានចូលរួមចំណែកជាមួយ
ក្រសួងអប់រំ ក្នុងការបណ្តុះនូវមូលធនមនុស្សក្នុងនោះសាលាបានខិតខំប្រឹងប្រែងជាច្រើនក្នុងការអភិវឌ្ឍន៍សាលារៀន
ការលើកកម្ពស់សាលារៀនការធ្វើទំនើបកម្មកម្មវិធីសិក្សាសម្ភារឧបទ្ទេសក្នុងការបង្រៀន និងរៀនការបញ្ចូលការអប់រំផ្សេងៗដូចជា វប្បធម៌ ប្រពៃណីការងារសង្គម និងការងារបរិស្ថានជាដើមដែលទាំងនេះជាគោលដៅកំណែទម្រង់វិស័យ
អប់រំធ្វើយ៉ាងណាបណ្តុះយុវជនទាំងបំណិនទន់ និងបំណិនរឹងដើម្បីឱ្យពួកគេក្លាយជាពលរដ្ឋមួយពេញលេញមិនត្រឹមតែជាពលរដ្ឋសម្រាប់ប្រទេសជាតិទេ គឺជាពលរដ្ឋសកលដែលស្វែងយល់ព្រមទាំងចូលរួមដោះស្រាយបញ្ហាប្រឈមនានានៅក្នុងសង្គមជាតិ និងពិភពលោកសំដៅឱ្យពិភពលោកមានសុខសន្តិភាព។

លោកស្រីបានបន្តថា រាជរដ្ឋាភិបាលបានយកចិត្តទុកដាក់ខ្ពស់លើវិស័យអប់រំ ក្នុងនោះមុំទី១នៃយុទ្ធសាស្ត្របញ្ចកោណដំណាក់កាលទី១នៅតែចាត់ទុកការអភិវឌ្ឍន៍ធនធានមនុស្ស គឺជាអាទិភាព ហើយសម្តេចមហាបវរធិបតីបានផ្តោតការយកចិត្តទុកដាក់ខ្ពស់ទៅលើការលើកកម្ពស់គុណភាពអប់រំចាប់ពីកម្រិតមតេយ្យសិក្សាដល់ថ្នាក់ទី១២ ដោយមិន
ត្រឹមផ្តោតតែលើការបណ្តុះបណ្តាលជំនាញរឹងទេ អ្វីសំខាន់បានផ្តល់អនុសាសន៍ដល់ក្រសួងអប់រំ និងអ្នកពាក់ព័ន្ធយកចិត្តទុកដាក់លើការបណ្តុះបណ្តាលឥរិយាបថ ផ្នត់គំនិត មនសិការបស់សិស្សានុសិស្ស។

លោកស្រីបានលើកទឹកចិត្ត និងជំរុញដល់សាលាឯកជនបន្តខិតខំបង្កើតកម្មវិធីសិក្សាថ្មីៗបន្ថែមទៀត ស្របទៅតាមការវិវត្តនៃការអប់រំនាសតវត្សទី២១នេះ ពិសេសដើម្បីបណ្តុះមូលធនមនុស្សនៅប្រទេសកម្ពុជាកាន់តែមានគុណភាព និងប្រសិទ្ធភាពខ្ពស៕

អត្ថបទ៖ សំអឿន