ព័ត៌មានជាតិ

កម្មករ-និយោជិត ៖ រាជរដ្ឋាភិបាលកម្ពុជា យកចិត្តទុកដាក់ខ្ពស់លើកិច្ចគាំពារសង្គម តាមរយៈ ប.ស.ស សម្រាប់កម្មករ-និយោជិត

បានផុស

៤ ខែ មុន

នៅ

ថ្ងៃអង្គារ ១០ ធ្នូ ២០២៤

ដោយ

កម្មករ-និយោជិត បានលើកឡើងថា រាជរដ្ឋាភិបាលកម្ពុជា មានការយកចិត្តទុកដាក់ខ្ពស់លើគោលនយោបាយកិច្ចគាំពារសង្គម តាមរយៈការផ្តល់អត្ថប្រយោជន៍លើរបបសន្តិសុខសង្គមដល់កម្មករ-និយោជិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់កម្មករ-និយោជិត បែបនេះ ក្នុងពិធីប្រារព្ធទិវាសិទ្ធិមនុស្សអន្តរជាតិ ខួបលើកទី ៧៦ ក្រោមប្រធានបទ “សិទ្ធិសេរីភាពសហជីព សមាគម និងប្រព័ន្ធគាំពារសង្គម” កាលពីថ្ងៃទី ៨ ខែធ្នូ ឆ្នាំ ២០២៤។

លោកស្រី សួន សូត្រ ជាកម្មករ-និយោជិត នៃរោងចក្រ ម៉េងដា រាជធានីភ្នំពេញ លើកឡើងថា ខ្លួនមានបណ្ណបេឡាជាតិសន្តិសុខសង្គម (ប.ស.ស) ចាប់តាំងពីចូលធ្វើការជាកម្មកររោងចក្រ ហើយនិយោជកជាអ្នកបង់ថ្លៃវិភាគទានឱ្យទាំងស្រុង។ តាមរយៈរបបសន្តិសុខសង្គមមួយនេះ បានផ្តល់អត្ថប្រយោជន៍យ៉ាងច្រើនដល់លោកស្រីដែលជាបុគ្គលិកបម្រើការងារក្នុងរោងចក្រ។ លោកស្រីមិនមានការព្រួយបារម្ភលើសេវាថែទាំសុខភាពដែលចំណាយប្រាក់ច្រើនទៀតនោះទេ ពីព្រោះរាល់ការទៅពិនិត្យសុខភាព និងការព្យាបាល មិនមានការបង់ប្រាក់ និងមានការយកចិត្តទុកដាក់ពីសំណាក់មន្ទីរពេទ្យ។

លោកស្រីមើលឃើញថា បេឡាជាតិសន្តិសុខសង្គមបានចូលរួមចំណែកយ៉ាងច្រើនលើជីវភាពរបស់កម្មករ-និយោជិត ដែលធ្វើឱ្យពួកគេអាចចំណេញ និងអាចសន្សំថវិកាបានមួយផ្នែក លើថ្លៃសេវាពិនិត្យ និងថែទាំសុខភាពរបស់ពួកគេ។ លោកស្រីសប្បាយចិត្តនៅពេលមានការគិតគូរពីសំណាក់រាជរដ្ឋាភិបាល តាមរយៈការដាក់ចេញនូវគោលនយោបាយដ៏មានអត្ថប្រយោជន៍មួយនេះ។

ដោយឡែក លោក ស៊ុន ប៊ុនធឿន ដែលជាកម្មករ នៃរោងចក្រ ម៉េងដា បានគូសបញ្ជាក់ថា នាពេលបច្ចុប្បន្ននេះ កម្មករ-និយោជិត ទាំងអស់ នៅទូទាំងប្រទេស អាចប្រើបណ្ណ ប.ស.ស ដើម្បីទៅទទួលសេវាថែទាំសុខភាពដោយមិនគិតថ្លៃ និងគ្រប់ពេលវេលា។ តាមរយៈ បណ្ណប.ស.ស នេះហើយ ធ្វើឱ្យកម្មករ-និយោជិត មានលទ្ធភាពថែរក្សាសុខភាពប្រសើរជាងមុន ហើយអាចឱ្យកម្មករ-និយោជិត អាចសន្សំប្រាក់បានមួយចំនួន បន្ទាប់ពីនិយោជកជាអ្នករ៉ាប់រងបង់សេវាប្រចាំខែ។

កម្មកររោងចក្ររូបនេះមើលឃើញថា តាមរយៈគោលនយោបាយបេឡាជាតិសន្តិសុខសង្គម និងការផ្តល់អត្ថប្រយោជន៍ផ្សេងៗ ទៀត មកលើ កម្មករ-និយោជិត វាបង្ហាញឱ្យឃើញពីការយកចិត្តទុកដាក់ខ្ពស់លើកិច្ចគាំពារសង្គមពីសំណាក់រាជរដ្ឋាភិបាលកម្ពុជា។ ទាំងនេះគឺជាការផ្តល់អត្ថប្រយោជន៍យ៉ាងធំធេងមកលើកម្មករ-និយោជិត ពីព្រោះកាលណាកម្មករ-និយោជិតមានសុខុមាលភាពល្អ នោះផលិតភាពការងារក្នុងរោងចក្រក៏មានភាពល្អប្រសើរផងដែរ។

ចំពោះការប្រារព្ធទិវាសិទ្ធិមនុស្សអន្តរជាតិ ខួបលើកទី ៧៦ នៅឆ្នាំ ២០២៤ នេះដែរ កម្មករ-និយោជិត បានវាយតម្លៃខ្ពស់ចំពោះវត្តមានរបស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលបានមកចូលរួមផ្ទាល់ជាមួយកម្មករ-និយោជិត ដើម្បីប្រារព្ធទិវាសិទ្ធិមនុស្សអន្តរជាតិដ៏មានសារៈសំខាន់មួយនេះ។ កម្មករ-និយោជិត ថា ការមកចូលរួមផ្ទាល់របស់ លោករដ្ឋមន្ត្រីក្រសួងការងារ គឺជាការស្តាប់សំឡេងស្នើសុំផ្ទាល់របស់កម្មករ-និយោជិត ហើយអាចដោះស្រាយបានលទ្ធផលជាអតិបរមាជូនកម្មករ-និយោជិតផងដែរ៕