ព័ត៌មានជាតិ

រដ្ឋបាលខណ្ឌជ្រោយចង្វារ ចុះរៀបចំសណ្ដាប់ធ្នាប់សាធារណៈ នៅជុំវិញបរិវេណផ្សារដើមស្រល់

បានផុស

៣១ វិនាទី មុន

នៅ

ថ្ងៃអង្គារ ១០ ធ្នូ ២០២៤

ដោយ

កាលពីល្ងាចថ្ងៃទី ០៩ ខែធ្នូ ឆ្នាំ ២០២៤ លោក លីម សុភា អភិបាល នៃគណៈអភិបាលខណ្ឌជ្រោយចង្វារ បានចាត់កម្លាំងការិយាល័យសាធារណការ ដឹកជញ្ជូន អនាម័យ បរិស្ថាន និងកម្លាំងសណ្ដាប់ធ្នាប់សាធារណៈខណ្ឌ ចុះរៀបចំសណ្ដាប់ធ្នាប់ក្នុងការលក់ដូរតាមចិញ្ចើមផ្លូវបេតុង នៅផ្សារដើមស្រល់ ស្ថិតក្នុងភូមិ ០១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈួន សុថាត អនុប្រធានកម្លាំងសណ្ដាប់ធ្នាប់សាធារណៈខណ្ឌ បានឱ្យ កម្ពុជាថ្មី ដឹងនៅថ្ងៃទី ១០ ខែធ្នូ ឆ្នាំ ២០២៤ នេះថា ដោយមានការចង្អុលបង្ហាញពី លោក លីម សុភា អភិបាលខណ្ឌជ្រោយចង្វារ បានចាត់ក្រុមការងារឱ្យចុះរៀបចំសណ្ដាប់ធ្នាប់ និងអប់រំណែនាំដល់ក្រុមអាជីវករលក់ដូរនៅតាមផ្ទះ ជុំវិញផ្សារ ឱ្យដាក់តាំងលក់ទំនិញ របស់របរ តាមផ្លូវបេតុង ជុំវិញផ្សារដើមស្រល់ ត្រូវរក្សាចិញ្ចើមផ្លូវសម្រាប់អ្នកថ្មើរជើង និងដើម្បីកាត់បន្ថយការកកស្ទះចរាចរណ៍ ព្រមទាំងរក្សាបានសោភ័ណភាព បរិស្ថាន អនាម័យល្អ ទីក្រុងផងដែរ។

ប្រភពបានបន្តថា ពិតណាស់ថា ការចុះរៀបចំសណ្ដាប់ធ្នាប់នេះ បានធ្វើឱ្យប៉ះពាល់ដល់ផលប្រយោជន៍អ្នកលក់ដូរលើដីចំណីផ្លូវមែន តែប្រជាពលរដ្ឋភាគច្រើន មានការសាទរដល់កងកម្លាំងសន្តិសុខ ក៏ដូចជាអាជ្ញាធរខណ្ឌ ដូច្នេះត្រូវអនុវត្តតាមមតិភាគច្រើន។

ជាមួយគ្នានេះ រដ្ឋបាលខណ្ឌ បានអំពាវនាវដល់ប្រជាពលរដ្ឋដែលប្រកបរបរលក់ដូរ ត្រូវចូលរួមទាំងអស់គ្នា និងបញ្ឈប់ការយកចិញ្ចើមផ្លូវសាធារណៈដាក់តាំងលក់ប្រកបរបរអាជីវកម្ម ដើម្បីចូលរួមថែរក្សាសោភ័ណភាព សុវត្ថិភាព របៀបរៀបរយ ក្នុងមូលដ្ឋានខណ្ឌ នៃរាជធានីភ្នំពេញ។

ក្នុងនោះដែរ ក្រុមការងារ ក៏បានសំណូមពរដល់ក្រុមអាជីវករដែលមានផ្ទះជុំវិញផ្សារទាំងអស់គ្នា សូមចូលរួមសហការជាមួយអាជ្ញាធរ ដើម្បីឱ្យមានលំហូរចរាចរណ៍ មានបរិស្ថាន អនាម័យល្អ និងសណ្ដាប់ធ្នាប់ល្អ៕

អត្ថបទ ៖ សំណាង