រដ្ឋមន្រ្តីសុខាភិបាល៖ ការធ្វើកំណែទម្រង់នឹងធ្វើឲ្យគុណភាពផ្តល់សេវាសុខាភិបាលកាន់តែប្រសើរ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអះអាងថា ការធ្វើកំណែទម្រង់នឹងធ្វើឱ្យគុណភាពនៃការ​ផ្តល់សេវាសុខាភិបាលកាន់តែប្រសើរបន្ថែមទៀត។

នៅក្នុងការធ្វើបទបាឋកថាក្នុងវគ្គបណ្តុះបណ្តាលភាពជាអ្នកដឹកនាំ និងនវានុវត្តន៍ជូនថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រមក្រោមឱវាទតាមប្រព័ន្ធវីដេអូសន្និសីទដែលមានសមាសភាពចូលរួមសរុបចំនួន ៤,០៥៥នាក់ កាលពីរសៀលថ្ងៃទី១០ធ្នូ លោករដ្ឋមន្ត្រីបានបង្ហាញពីប្រភេទនៃការធ្វើកំណែរទម្រង់ក្នុងការងារដឹកនាំអង្គភាពឱ្យទទួលបានជោគជ័យព្រមទាំងសារៈសំខាន់ និងភាពចាំបាច់របស់មូលដ្ឋានសុខាភិបាលទាំងអស់ ដែលត្រូវធ្វើកំណែទម្រង់ដែលមានលក្ខណៈគិតគូរគ្រោងទុក និងកំណែទម្រង់ដែលត្រូវធ្វើបន្ទាន់សំដៅបង្កើនប្រសិទ្ធភាពនៃសេវារបស់ខ្លួន។

លោករដ្ឋមន្ត្រីបានណែនាំថា ដើម្បីធ្វើការកែទម្រង់ឱ្យទទួលបានជោគជ័យអ្នកដឹកនាំត្រូវការចំនុចគន្លឹះចំនួន៤គឺ (១)មានការប្តេជ្ញាចិត្ត(២)មានសមត្ថភាពក្នុងការដឹកនាំការងារ (៣)មានភាពឈ្លាសវៃ និង (៤) មានឆន្ទះ និងភាពម្ចាស់ការខ្ពស់។
ទន្ទឹមនឹងនោះលោករដ្ឋមន្ត្រីក៏បានណែនាំឱ្យមន្ត្រីសុខាភិបាលទាំងអស់ធ្វើការពិចារណាលើទស្សនៈ ដែលថា កំណែទម្រង់ គឺជាដំណើរការមិនមែនជាព្រឹត្តិការណ៍ទេដើម្បីស្វែងយល់ឱ្យកាន់តែស៊ីជម្រៅនៅលើប្រធាបទនេះ។

នៅក្នុងឱកាសនោះ លោករដ្ឋមន្ត្រីបានអនុញ្ញាតឱ្យមានការធ្វើបទបង្ហាញដើម្បីកាត់បន្ថយរយៈពេលរង់ចាំរបស់អ្នកជំងឺទទួលសេវាពិនិត្យជំងឺក្រៅនៅមន្ទីរពេទ្យបង្អែកស្រុកកំពង់ត្រឡាចនៃមន្ទីរសុខាភិបាលនៃរដ្ឋបាលខេត្តកំពង់ឆ្នាំងផងដែរ៕

អត្ថបទ៖ សំអឿន