ព័ត៌មានជាតិ

មន្ត្រីជាន់ខ្ពស់ លើកទឹកចិត្តអ្នកអប់រំ បញ្ជ្រាបបញ្ហាបរិស្ថាន និងការបម្រែបម្រួលអាកាសធាតុ ដល់កុមារតូចឱ្យចេះការពារខ្លួន និងដោះស្រាយបញ្ហា

បានផុស

៤ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

មន្ត្រីជាន់ខ្ពស់ នៃក្រសួងអប់រំ យុវជន និងកីឡា បានលើកទឹកចិត្តដល់អ្នកអប់រំបញ្ជ្រាបបញ្ហាបរិស្ថាន និងបញ្ហាបម្រែបម្រួលអាកាសធាតុដល់កុមារតូច ដើម្បីឱ្យពួកគេមានភាពធន់ចេះការពារខ្លួន និងដោះស្រាយបញ្ហាផ្សេងៗ នៅជុំវិញខ្លួនពេលជួបឧបសគ្គ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា បានឱ្យដឹងនៅក្នុងពិធីប្រគល់វិញ្ញាបនបត្រ បណ្ណសរសើរ និងអាហារូបករណ៍ ជូនដល់សិស្សពូកែប្រចាំឆ្នាំសិក្សា ២០២៣-២០២៤ នៃសាលាអន្តរជាតិអាស៊ាន កាលពីពេលថ្មីៗ នេះថា ការអប់រំកុមារតូច គឺជាមូលដ្ឋានគ្រឹះដ៏សំខាន់សម្រាប់សិស្សានុសិស្ស ឱ្យទទួលបានទាំងជំនាញរឹង និងជំនាញទន់ ការសិក្សាពេញមួយជីវិត និងបំណិនសតវត្សទី ២១ ដូចជាការគិតស៊ីជម្រៅ និងជំនាញដោះស្រាយបញ្ហាជាដើម ដែលទាំងអស់នេះគឺជាស្ពានដើម្បីឱ្យក្មួយៗ ត្រៀមខ្លួនរួចរាល់ក្នុងដំណើរសិក្សាបន្តបន្ទាប់ទៀត។

បន្ថែមពីនេះ លោកស្រី បានលើកឡើងពីវិធីសាស្ត្របង្រៀនកុមារតូចគឺ “ការរៀនតាមរយៈការលេង” ដោយការលេងនេះគឺគោរពទៅតាមគោលការណ៍ នៃការអភិវឌ្ឍកុមារទាំងប្រាជ្ញា បំណិនសង្គម និងការអភិវឌ្ឍរាងកាយជាដើម ដោយទាំងអស់ជួយឱ្យពួកគាត់មានបំណិនក្នុងការសិក្សាពេញមួយជីវិត និងបំណិនសង្គម ដូចជាមានភាពក្លាហាន ចេះចែករំលែក ចេះធ្វើការងារជាក្រុម ឈានទៅរកភាពជោគជ័យក្នុងការសិក្សាបន្តបន្ទាប់ទៀត ទាំងក្នុងកម្រិតថ្នាក់បឋមសិក្សា មធ្យមសិក្សា ឧត្ដមសិក្សា ក៏ដូចជាការសិក្សាពេញមួយជីវិតផងដែរ។

លោកស្រីបានបន្ថែមថា មានប្រទេសអភិវឌ្ឍន៍មួយចំនួនបានប្រែក្លាយទីកន្លែងលេងទៅជាកន្លែងលេងដែលមានការប្រឈមនឹងហានិភ័យដូចជានៅបរិវេណសាលាសុទ្ធតែកន្លែងគ្រោះថ្នាក់ ដូចជាដីមិនស្មើ មានទួល ជង្ហុក មានឈើដាក់របាំងឱ្យក្មេងឆ្លងកាត់ បើសាលាមានក្រាលបេតុងយកថ្មដាក់ពង្រាយពេញទីធ្លា ស្ពានមិនមានក្ដារស្មើ ឬ មានក្តារពុកផុយ ដើម្បីឱ្យក្មេងដើរឆ្លងកាត់ជាដើម។ ការអនុវត្តបែបនេះ គឺចង់ឱ្យកុមារចេះគិតពិចារណា និងដោះស្រាយបញ្ហានៅចំពោះមុខ នៅពេលមានឧបសគ្គកើតឡើងណាមួយ។

លោកស្រីបានលើកទឹកចិត្តដល់អ្នកអប់រំ គួរបញ្ជ្រាបបញ្ហាបរិស្ថាន និងការបម្រែបម្រួលអាកាសធាតុដល់កុមារតូចឱ្យចេះការពារខ្លួន និងដោះស្រាយបញ្ហានានា។

លោកស្រីបានលើកឡើងថា «ហេតុអ្វីក្មេងៗ មតេ្តយ្យសិក្សានៅតូចហ្នឹងម៉េចបានជាយើងត្រូវបញ្ជ្រាបឱ្យគាត់រៀនច្រើនម្ល៉េះទាក់ទិននឹងបញ្ហាបរិស្ថាន និងបញ្ហាការបម្រែបម្រួលអាកាសធាតុនេះ ដោយសារវាជាបញ្ហាប្រឈមមួយរបស់ពិភពលោកទាំងមូល»។

លោកស្រីបានពន្យល់ថា ក្មេងតូចៗ មានភាពចង់ដឹងចង់ស្វែងយល់ចង់រៀន។ ដូចនេះនៅពេលយើងបញ្ជ្រាបនូវបំណិន នៃការយល់ដឹង និងស្រលាញ់ និងការថែរក្សាបរិស្ថាន និងបំណិន នៃការចេះការពារខ្លួននៅពេលមានការបម្រែបម្រួលអាកាសធាតុដូចជាអាកាសធាតុក្តៅខ្លាំង និងត្រជាក់ខ្លាំងពេលមានខ្យល់មានភ្លៀងធ្វើឱ្យពួកគាត់មានភាពធន់ ប្រឈមនឹងឧបសគ្គផ្សេងៗ ដែលបានជួបហើយអាចមានគំនិតផ្ដួចផ្ដើមក្នុងការដោះស្រាយបញ្ហាផ្សេងៗ ពេលជួបឧបសគ្គផ្សេងៗ នៅជុំវិញខ្លួនគាត់តាំងពីនៅវ័យកុមារតូច។

លោកស្រីបានបន្ថែមថា «ប្រសិនជាយើងមិនបណ្តុះកុមារ ឬយុវជនមិនស្ថិតក្នុងបរិបទមួយប្រឈមនឹងហានិភ័យដើម្បីឱ្យពួកគាត់មានការប្រុងប្រយ័ត្ន និងមានគំនិតក្នុងការដោះស្រាយបញ្ហាប្រឈមនៅពេលដែលជួបឧបសគ្គជុំវិញខ្លួនគាត់ដែលមិនដឹងកើតឡើងពេលណា និងកើតឡើងរបៀបណានោះ យុវជន និងកុមារយើង នឹងប្រឈមហើយ»។

លោកស្រីបានបញ្ជាក់ថា នេះជាផ្នត់គំនិតមួយដែលជាអ្នកអប់រំត្រូវចូលរួមទាំងអស់គ្នា ដើម្បីដុសខាត់ ពន្យល់ដល់អ្នកពាក់ព័ន្ធ ពិសេសមាតាបិតា ដើម្បីបានយល់ដឹង និងគាំទ្រចូលរួមអភិវឌ្ឍន៍ដល់បុត្រធីតាឱ្យមានភាពធន់ និងបំណិនក្នុងការដោះស្រាយបញ្ហាដែលជាបំណិនមួយដ៏សំខាន់ក្នុងសតវត្សទី ២១ នេះ៕

អត្ថបទ ៖ សំអឿន

Related Topics:ក្រសួងអប់រំ យុវជន និងកីឡា