រដ្ឋមន្ត្រីសុខាភិបាលចាត់ទុកសមាគមនិកាយសាសនាជាដៃគូយ៉ាងសំខាន់ក្នុងការគាំទ្រអភិវឌ្ឍវិស័យសុខាភិបាលនៅកម្ពុជា

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានចាត់ទុកសមាគមនិកាយសាសនាចក្រ
នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយជាដៃគូយ៉ាងសំខាន់ក្នុងការចូលរួមចំណែកសហការគាំទ្រអភិវឌ្ឍវិស័យ
សុខាភិបាល នៅព្រះរាជាណាចក្រកម្ពុជា។

នៅក្នុងជំនួបសម្តែងការគួរសម និងពិភាក្សាការងារជាមួយលោក អែលឌើរបេនយ៉ាមីន អិម ហ្ស៊ី តៃ (Benjamin M. Z. Tai) ប្រធានតំបន់អាស៊ីនៃសមាគមនិកាយសាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយកាលពីថ្ងៃទី១២ធ្នូ លោករដ្ឋមន្ត្រីបានមានប្រសាសន៍ថា គោលបំណងនៅក្នុងជំនួបនេះដើម្បីរាយការណ៍ពីសមិទ្ធិផលដែលសមាគមបានធ្វើលើការងារមនុស្សធម៌ ក្នុងវិស័យសុខាភិបាលនាពេលកន្លងមក ពេលបច្ចុប្បន្ន និងមានគោលដៅស្នើសុំការណែនាំពីក្រសួងសុខាភិបាលដើម្បីជួយតម្រង់ទិសការងារមនុស្សធម៌របស់សមាគមនាពេលអនាគតក្នុងវិស័យសុខា
ភិបាល។

លោករដ្ឋមន្ត្រីបានបន្តថា « ពេលបានជួបជាមួយ សមាគមប្រៀបបីដូចជាបានជួបជុំក្រុមគ្រួសារក្នុងផ្ទះដ៏សែនកក់ក្តៅ
ព្រោះតាំងពីសមាគមបានបង្កើតឡើងនៅក្នុងកម្ពុជា ឆ្នាំ១៩៩៤មកសមាគមបានចូលរួមចំណែកសហការគាំទ្រអភិវឌ្ឍវិស័យសុខាភិបាលនៃព្រះរាជាណាចក្រកម្ពុជា ដោយទទួលបានសមិទ្ធិផលជាច្រើននាពេលកន្លងមកសមាគមបានផ្តល់ជំនួយមនុស្សធម៌ ក្នុងវិស័យសុខាភិបាល ដល់ខេត្តមួយចំនួនដូចជាខេត្តកំពង់ចាម ត្បូងឃ្មុំ កំពង់ធំ កំពង់ស្ពឺ ព្រៃវែង រាជធានីភ្នំពេញ និងខេត្តកណ្តាលនៅមន្ទីរពេទ្យតេជោសែន កោះធំ តាមរយៈ ការជួសជុលហេដ្ឋារចនាសម្ព័ន្ធផ្តល់ ឧបករណ៍បរិក្ខារពេទ្យ ព្រមទាំងបណ្តុះបណ្តាលធនធានមនុស្ស»។

លោករដ្ឋមន្ត្រីបានបន្តទៀតថា លើសពីនេះទៀត ជំនួបនេះ គឺដើម្បីស្វែងយល់ពីតម្រូវការរបស់ក្រសួងសុខាភិបាល ដែលអាចជួយតម្រង់ទិសកិច្ចសហប្រតិបត្តិការរបស់សមាគម ជាមួយក្រសួងសុខាភិបាលឱ្យកាន់តែមានប្រសិទ្ធផលខ្ពស់បន្ថែមទៀត។

លោករដ្ឋន្ត្រីបានបន្ថែមថាជំនួបនេះទទួលបានលទ្ធផលនៃកិច្ចពិភាក្សាដោយបានឯកភាពគ្នាក្នុងការឈានទៅរកការចុះកិច្ចព្រមព្រៀងរវាងភាគីទាំងពីរដើម្បីសំដៅបានលទ្ធផលខ្ពស់នៃកិច្ចសហប្រតិបត្តិការ៕

អត្ថបទ៖ សំអឿន