សម្ដេចធិបតី ថា ការចុះឈ្មោះអ្នកសេដ្ឋកិច្ចក្រៅប្រព័ន្ធ គឺមិនមែនដើម្បីប្រមូលពន្ធនោះឡើយ

នៅព្រឹកថ្ងៃទី១៦ ខែធ្នូ ឆ្នាំ២០២៤ សម្តេចធិបតី ហ៊ុន ម៉ាណែត បានអញ្ជើញប្រកាសដាក់ឱ្យដំណើរការថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ ដែលក្នុងឱកាសនោះ សម្ដេចធិបតី បញ្ជាក់ថា ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធនេះ មិនមែនដើម្បីប្រមូលពន្ធនោះឡើយ តែផ្ទុយទៅវិញ គឺដើម្បីទទួលបានការជួយគាំទ្របន្ថែមពីរដ្ឋ។

តាមការលើកឡើងរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ថ្នាលឌីជីថលចុះឈ្មោះ​អ្នកសេដ្ឋកិច្ចក្រៅប្រព័ន្ធ ជាវឌ្ឍនភាពដ៏សំខាន់មួយក្នុងការអនុវត្តយុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ ដែលយុទ្ធសាស្ត្រជាតិនេះជាកម្មវិធីគោលនយោបាយអាទិភាពទី៤ របស់រាជរដ្ឋាភិបាលនីតិកាលទី៧ ដែលសម្តេចធិបតី បានប្រកាសដាក់ឱ្យអនុវត្តកាល​ពីចុងឆ្នាំ២០២៣។

សម្ដេចធិបតី បានគូសរំលេចថា បច្ចុប្បន្នសកលលោកទាំងមូល មានការប្រែប្រួលលឿន និងមានភាពមិនប្រាកដប្រជាខ្ពស់ ហើយវិបត្តិ និងបញ្ហាប្រឈមផ្សេងៗ អាចកើតមានឡើងគ្រប់ពេល ដែលការណ៍នេះ អាចបន្ទច់បង្អាក់ដំណើរការអភិវឌ្ឍ និងកំណើនសេដ្ឋកិច្ចកម្ពុជា។ ក្នុងបរិការណ៍ដ៏លំបាកនេះ សម្ដេចធិបតី ថា រាជរដ្ឋាភិបាលយល់ច្បាស់អំពីភាពចាំបាច់ក្នុងការកែលម្អ ជំរុញ ពង្រឹងការអនុវត្តការងារកែទម្រង់ជារចនាសម្ព័ន្ធ ដើម្បីជំរុញកំណើនសេដ្ឋកិច្ចជាតិឱ្យមានសន្ទុះល្អប្រសើរឡើង និងមានភាពធន់ទៅនឹងវិបត្តិនានា ដែលអាចនឹងកើតឡើងជាយថាហេតុ។

ដូច្នេះ ការរៀបចំ និងដាក់ឱ្យដំណើរការជាផ្លូវការថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធពេលនេះឆ្លុះបញ្ចាំងពីការខិតខំប្រឹងប្រែង និងការយកចិត្តទុកដាក់របស់រាជរដ្ឋាភិបាលក្នុងការគាំទ្រ និងជួយសម្រួលដល់ប្រជាពលរដ្ឋ ដែលកំពុងប្រកបមុខរបរធ្វើការងារ និងមានអាជីវកម្មក្នុងសេដ្ឋកិច្ចក្រៅប្រព័ន្ធ ព្រមទាំងបង្កើតឱកាសឱ្យពួកគាត់អាចអភិវឌ្ឍអាជីវកម្ម និងពង្រីកមុខរបររបស់ខ្លួន ជាពិសេសធ្វើឱ្យកម្រិតជីវភាព និងសុខមាលភាពកាន់តែល្អប្រសើរ។ នេះជាការបញ្ជាក់របស់សម្ដេចធិបតីនាយករដ្ឋមន្ត្រី ក្នុងពិធីសម្ពោធដាក់ឱ្យដំណើរការថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ នាព្រឹកថ្ងៃនេះ។

ប៉ុន្តែយ៉ាងណាមិញ ដោយមានមន្ទិលសង្ស័យក្នុងការចុះឈ្មោះនេះ ពោលគឺមានពលរដ្ឋជាអ្នកសេដ្ឋកិច្ចក្រៅប្រព័ន្ធខ្លះ ខ្លាចជាប់កាតព្វកិច្ច ឬការចំណាយផ្សេងៗ សម្ដេចធិបតី បានបញ្ជាក់ជាថ្មីថា «ការចុះឈ្មោះអ្នកសេដ្ឋកិច្ចក្រៅប្រព័ន្ធ គឺអនុវត្តតាមគោលការណ៍ស្ម័គ្រចិត្តទាំងស្រុង មិនមានការ​បង្ខិត​បង្ខំ និងមិនគិតថ្លៃអ្វីទាំងអស់ ហើយការចុះឈ្មោះនេះ​មិនត្រឹមតែដើម្បីឱ្យទទួលបានអត្តសញ្ញាណផ្លូវការប៉ុណ្ណោះទេ ប៉ុន្តែនឹងបើកផ្លូវទៅកាន់ឱកាសរីកចម្រើន និងការគាំទ្រនានាបន្ថែមទៀត»។

សម្ដេចធិបតី បន្ថែមថា អ្នកសេដ្ឋកិច្ចក្រៅប្រព័ន្ធ​ដែលមានផលរបរក្រោម២៥០លានរៀល ឬប្រហាក់ប្រហែល៦ម៉ឺនដុល្លារក្នុងមួយឆ្នាំ គឺគ្មានកាតព្វកិច្ចពន្ធ មិនចាំបាច់បង់ពន្ធប៉ាតង់ និងមិនចាំបាច់រៀបចំឯកសារប្រកាសពន្ធអ្វីទាំងអស់។ សម្ដេចនាយករដ្ឋមន្ត្រី សង្កត់ធ្ងន់ថា ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ គឺមានគោលដៅជួយ មិនមែនគោលដៅនៃការប្រមូលពន្ធនោះឡើយ។

ក្នុងន័យនេះ សម្តេចធិបតី បានលើកទឹកចិត្តឱ្យអ្នកសេដ្ឋកិច្ចក្រៅប្រព័ន្ធ ចូលរួមចុះឈ្មោះទាំងអស់គ្នា ដើម្បីចាប់យកអត្ថប្រយោជន៍ផ្សេងៗ សំដៅធ្វើឱ្យប្រសើរឡើងនូវកម្រិតជីវភាព ព្រមទាំងចូលរួមក្នុងដំណើរការនៃការអភិវឌ្ឍសេដ្ឋកិច្ចជាតិ។ ភ្ជាប់ជាមួយគ្នានេះ សម្ដេចធិបតី ក៏បានណែនាំឱ្យទប់ស្កាត់ជនឆ្លៀតឱកាសក្នុងការធ្វើសកម្មភាពផ្ទុយពីគោលបំណងរបស់រាជរដ្ឋាភិបាល ពាក់ព័ន្ធការចុះឈ្មោះរបស់អ្នកសេដ្ឋកិច្ចក្រៅប្រព័ន្ធនេះផងដែរ៕