ព័ត៌មានជាតិ

រដ្ឋបាលរាជធានីសម្រេចផ្អាកពិធីអាពាហ៍ពិពាហ៍ ជប់លៀង ពិធីសាសនា និងកម្មវិធីជួបជុំផ្សេងៗ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩

បានផុស

៤ years មុន

នៅ

ថ្ងៃចន្ទ ១៥ មីនា ២០២១

ដោយ

ភ្នំពេញ ៖ អាជ្ញាធររាជធានីភ្នំពេញបានសម្រេចផ្អាកពិធីអាពាហ៍ពិពាហ៍ ជប់លៀង ពិធីសាសនា និងកម្មវិធីជួបជុំផ្សេងៗទៀត ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ខណៈដែលជំងឺនេះបាននឹងកំពុងផ្ទុះឡើងជាលើកទី៣ ក្នុងព្រឹត្តិការណ៍សហគមន៍ ២០-កុម្ភៈ” ។

នេះបើយោងសេចក្តីជូនដំណឹងរបស់រដ្ឋបាលរាជធានីភ្នំពេញដែលព័ត៌មានយើងទទួលបាននៅយប់ថ្ងៃទី១៥ ខែមីនា ឆ្នាំ២០២១នេះ។ ក្នុងសេចក្តីជូនដំណឹងមានន័យថា យោងតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុក្រឹត្យលេខ ៣៧ អនក្របក ចុះថ្ងៃទី១២ ខែមីនា ឆ្នាំ២០២១ ស្តីពីវិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ អនុសាសន៍ដឹកនាំដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី១៥ ខែមីនា ឆ្នាំ២០២១។

ក្នុងគោលបំណងទប់ស្កាត់ការរាតត្បាតនៃជំងឺកូវីដ-១៩ ដែលបាននឹងកំពុងផ្ទុះឡើងជាលើកទី៣ ក្នុង

ព្រឹត្តិការណ៍សហគមន៍ ២០-កុម្ភៈ” រដ្ឋបាលរាជធានីភ្នំពេញ មានកិត្តិយសសូមជម្រាបជូនដំណឹងដល់ម្ចាស់កម្មវិធីបងប្អូនប្រជាពលរដ្ឋ និងសាធារណៈ ជនទាំងអស់ មេត្តាជ្រាប និងសូមចូលរួមអនុវត្តដោយស្មារតីយោគយល់អធ្យាស្រ័យខ្ពស់បំផុត នូវវិធានការបិទសកម្មភាពសង្គមមួយចំនួន ដូចខាងក្រោម ៖

១. ត្រូវផ្អាកជាបណ្តោះអាសន្ននូវរាល់ការរៀបចំពិធីអាពាហ៍ពិពាហ៍ ពិធីជប់លៀង ពិធីសាសនា កម្មវិធីជួបជុំ សិក្ខាសាលា និងវគ្គបណ្តុះបណ្តាលផ្សេងៗ ដើម្បីបញ្ចៀស និងកាត់បន្ថយជាអតិបរមានូវការផ្ទុះរីករាលដាលជំងឺកូវីដ-១៩ ក្នុង ព្រឹត្តិការណ៍សហគមន៍ ២០-កុម្ភៈ” នៅរាជធានីភ្នំពេញ។

២.ចំពោះការរៀបចំពិធីអាពាហ៍ពិពាហ៍បែបប្រពៃណីក្នុងរង្វង់ក្រុមគ្រួសារ និងពិធីបុណ្យសព ដែលពុំអាចលើកពេលបាន ម្ចាស់កម្មវិធីត្រូវផ្តល់កិច្ចសហការល្អជាមួយអាជ្ញាធរមូលដ្ឋានតាមរយៈ (១) កាត់បន្ថយចំនួនភ្ញៀវចូលរួម និងរយៈពេលប្រារព្ធកម្មវិធី ឲ្យនៅត្រឹមកម្រិតអប្បបរមា ក្នុងរង្វង់សាច់ញាតិចាំបាច់ ជារបៀបសែនព្រេន (២) ចាត់ឲ្យមានអ្នកវាស់កម្ដៅ បាញ់អាល់កុល-ជែល ចែកម៉ាស និងចូលរួមអនុវត្ត ការស្កេន QR Code “ទប់ស្កាត់កូវីដ Stop Covid” (៣) រៀបចំតុអាហារមិនឱ្យលើសពី ៥នាក់/១តុ (៤) រក្សាគម្លាតសុវត្ថិភាពសង្គម និងកម្លាតសុវត្ថិភាពបុគ្គលឱ្យបានត្រឹមត្រូវ និង (៥) ត្រូវអនុវត្តឱ្យបានម៉ឺងមាត់បំផុតតាមការណែនាំរបស់ក្រសួងសុខាភិបាល ជាពិសេសវិធានការ “៣ ការពារ និង ៣ កុំ” របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា?

៣.ក្នុងករណីប្រសិនបើម្ចាស់កម្មវិធីណាមួយមិនចូលរួមសហការ អាជ្ញាធរមូលដ្ឋាន និងមន្ទីរ-អង្គភាពជំនាញ ពាក់ព័ន្ធ ត្រូវចុរបិទកម្មវិធីនោះនជាបន្ទាន់ ដោយមិនទទួលខុសត្រូវរាល់ការខាតបង់ឡើយ។ ជាមួយគ្នានេះ ត្រូវចាត់វិធានការច្បាប់ចំពោះជនទាំងឡាយណាដែលបំពាន និងមិនព្រមផ្ដល់កិច្ចសហការ ក្នុងការ ទប់ស្កាត់ការរីករាលដាលនៃជំងឺកូវីដ -១៩ តាមខ្លឹមសារនៃសេចក្តីជូនដំណឹងនេះ។

៤. សេចក្តីជូនដំណឹងនេះ មានសុពលភាពអនុវត្ត ចាប់ពីថ្ងៃជូនដំណឹងនេះតទៅ រហូតដល់មានសេចក្តីជូន ដំណឹងថ្មីមកជំនួសវិញ។

ទទួលបានសេចក្តីជូនដំណឹងនេះ នាយករដ្ឋបាលសាលារាជធានីភ្នំពេញ អភិបាល នៃគណៈអភិបាលខណ្ឌទាំង ១៤ ស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានីភ្នំពេញ ប្រធានមន្ទីរ-អង្គភាពជំនាញ អាជ្ញាធរមូលដ្ឋានមូលដ្ឋានគ្រប់លំដាប់ថ្នាក់ ម្ចាស់កម្មវិធី បងប្អូនប្រជាពលរដ្ឋ និងសាធារណជនទាំងអស់ ត្រូវ ចូលរួមសហការអនុវត្តសេចក្តីជូនដំណឹងនេះ ឱ្យមានប្រសិទ្ធភាព និងប្រកបដោយការទទួលខុសត្រូវខ្ពស់៕

ដោយ ៖ ស្រីរ័ត្ន