ព័ត៌មានជាតិ

វិទ្យាល័យបាក់ទូក បន្តយកចិត្តទុកដាក់អនុវត្តការណែនាំរបស់ក្រសួង មិនឱ្យលក់ដូរភេសជ្ជៈ និងអាហារប៉ះពាល់សុខភាពសិស្ស

បានផុស

៣៥ វិនាទី មុន

នៅ

ថ្ងៃចន្ទ ១៦ ធ្នូ ២០២៤

ដោយ

គណៈគ្រប់គ្រង នៃវិទ្យាល័យបាក់ទូក បានបន្តយកចិត្តទុកដាក់ខ្ពស់អនុវត្តគោលការណ៍ណែនាំរបស់ក្រសួងអប់រំ លើការហាមមិនឱ្យមានការលក់ដូរគ្រឿងភេសជ្ជៈ និងចំណីអាហារទាំងឡាយណាដែលប៉ះពាល់សុខភាពសិស្សានុសិស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខាត់ សារ៉ង នាយករងវិទ្យាល័យបាក់ទូក បានប្រាប់ឱ្យដឹងថា នេះមិនមែនជាកិច្ចការងារថ្មីនោះទេ គឺជាការអនុវត្តតាមគោលការណ៍ណែនាំជាបន្តបន្ទាប់មករហូតហើយ របស់ក្រសួងអប់រំ យុវជន និងកីឡា ក៏ដូចជាមន្ទីរអប់រំរាជធានីភ្នំពេញ លើកិច្ចការងារគិតគូរពីសុខុមាលភាពរបស់សិស្សក្នុងសាលាទាំងអស់។

លោកនាយករង បន្តថា បច្ចុប្បន្ន ក្នុងវិទ្យាល័យ ពុំមានការអនុញ្ញាតឱ្យលក់ដូរនូវគ្រឿងភេសជ្ជៈ ដែលត្រូវបានហាមឃាត់នោះឡើយ។ វិទ្យាល័យ ក៏បានអប់រំផ្សព្វផ្សាយជាប្រចាំដល់សិស្សានុសិស្សតាមរយៈការគោរពទង់ជាតិនៅរៀងរាល់ដើម និងចុងសប្ដាហ៍ ក៏ដូចជាការលើកផ្ទាំងជាលាយលក្ខណ៍អក្សរតាំងនៅជាច្រើនកន្លែងក្នុងវិទ្យាល័យបង្ហាញពីផលប៉ះពាល់ផងដែរ។

អ្នកលក់ដូរក្នុងអាហារដ្ឋានវិទ្យាល័យ បានចូលរួមគោរពជាមួយគោលការណ៍ណែនាំរបស់ក្រសួង និងគណៈគ្រប់គ្រងវិទ្យាល័យ ដោយពួកគាត់បានបញ្ឈប់ការលក់ដូរគ្រឿងភេសជ្ជៈ និងចំណីទាំងឡាយណាដែលប៉ះពាល់សុខភាពសិស្សមកជាយូរមកហើយដែរ។ ពួកគាត់បានបន្តលើកឡើងទៀតថា ក្នុងនាមអាណាព្យាបាលដូចគ្នា អ្នកណាក៏មិនចង់ឱ្យកូនៗ មានសុខភាពមិនល្អនោះទេ គឺគិតគូរពីសុខភាពកូនសំខាន់ នេះសបញ្ជាក់ថា អ្នកលក់គឺបានអនុវត្តតាមការណែនាំ និងបានពន្យល់ប្រាប់ទៅកូនតូចៗ មិនឱ្យទិញហូបនោះទេ។

គួរបញ្ជាក់ថា ក្រសួងអប់រំ យុវជន និងកីឡា បានចេញសេចក្ដីជូនដំណឹងថ្មី កាលពីថ្ងៃទី ១០ ខែធ្នូ ឆ្នាំ ២០២៤ ដោយធ្វើការហាមឃាត់ការទទួលទាន ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទនៅក្នុង និងជុំវិញជាប់បរិវេណគ្រឹះស្ថានសិក្សាចំណេះទូទៅសាធារណៈ និងឯកជន និងគ្រឹះស្ថានអប់រំ បច្ចេកទេសជាដើម ដើម្បីបង្ការហានិភ័យ នៃជំងឺមិនឆ្លង ជាពិសេសជំងឺទឹកនោមផ្អែម ដែលពាក់ព័ន្ធនឹងទម្លាប់ទទួលទានចំណីអាហារ ភេសជ្ជៈផ្អែម និងភេសជ្ជៈប៉ូវកម្លាំង បង្កផលប៉ះពាល់ដល់សុខុមាលភាពសិស្សានុសិស្សនាពេលបច្ចុប្បន្ន៕

អត្ថបទ ៖ សុភា