ព័ត៌មានជាតិ

ជ្រោះពពុះពេជ្រចិន្ដា កំពុងបង្អួតសម្រស់ព្រៃភ្នំយ៉ាងស្រស់ត្រកាល ដាក់ភ្ញៀវទេសចរណ៍

បានផុស

៣ ខែ មុន

នៅ

ថ្ងៃអង្គារ ១៧ ធ្នូ ២០២៤

ដោយ

ទេសភាពព្រៃភ្នំដ៏ខៀវស្រងាត់អមទៅដោយទឹកជ្រោះដែលហូរកាត់ថ្មដាបង្កើតបានទៅជាទេសភាពធម្មជាតិដ៏ស្រស់ត្រកាល ដែលគួរឱ្យចង់ទស្សនា គយគន់ និងមានអារម្មណ៍ចង់ទៅកំសាន្តដើម្បីស្រូបយកខ្យល់អាកាសដ៏បរិសុទ្ធចេញពីធម្មជាតិពិតៗ នោះគឺជាតំបន់រមណីយដ្ឋាន ” ជ្រោះពពុះពេជ្រចិន្ដា “។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលដែលគេឮឈ្មោះតំបន់រមណីយដ្ឋាននេះ គេក៏អាចនឹកឃើញដល់បទចម្រៀងមួយបទដែលនិពន្ធដោយលោក ម៉ា ឡៅពី និងច្រៀងដោយលោក សុះ ម៉ាត់ ដែលមានឃ្លាដើមគឺ : សន្ធឹកទឹកឮសូរគ្រេងៗ ដូចភ្លេងជីវិត ក្នុងរាត្រីស្ងាត់ កម្ចាត់ទុកថា ឱទឹកជ្រោះពពុះពេជ្រចិន្តា ឈ្មោះដូចស្នេហា ដែលបងប្រាថ្នាជាគូនិស្ស័យ។

មានន័យថា តំបន់រមណីយដ្ឋាន ជ្រោះពពុះពេជ្រចិន្ដា នេះ គឺមានយូរលង់ណាស់មកហើយ ដែលស្ថិតនៅក្នុងជួរភ្នំ អមដោយព្រៃព្រឹក្សា នៅពេលដែលភ្ញៀវទេសចរណ៍បានចូលទៅទស្សនាគឺមានអារម្មណ៍ស្រស់ស្រាយមិនចង់វិលត្រឡប់វិញឡើយ។

បើយើងធ្វើដំណើរចេញពីក្រុងបាត់ដំបង តាមបណ្ដោយផ្លូវជាតិលេខ 57 ឆ្ពោះទៅកាន់ខេត្តប៉ៃលិន នៅពេលទៅដល់ប្រមាណជិតពាក់កណ្ដាលផ្លូវ គឺមានផ្លូវបែកចូលទៅកាន់តំបន់រមណីយដ្ឋាននេះ ដែលស្ថិតក្នុងភូមិជាមន្ត្រី ឃុំត្រែង ស្រុករតនៈមណ្ឌល ខេត្តបាត់ដំបង នោះយើងនឹងទៅដល់ទីតាំងដ៏ស្រស់ត្រកាលនេះជាមិនខាន។

លោក មុត វិច្ឆិកា មានទីលំនៅភូមិអូរតាគាំ២ សង្កាត់ទួលតាឯក ក្រុងបាត់ដំបង បានរៀបរាប់ថា នេះជាលើកទី ២ ហើយ ដែលលោករួមជាមួយមិត្តភក្កិ និងក្រុមគ្រួសារ បានមកកំសាន្តនាថ្ងៃឈប់សម្រាកចុងសប្តាហ៍ ដោយសារតែតំបន់នេះមានធម្មជាតិខៀវស្រងាត់ និងមានខ្យល់អាកាសដ៏បរិសុទ្ធ ថែមទាំងមានទឹកហូរកាត់ផ្ទាំងថ្មយ៉ាងស្រស់ស្អាតថែមទៀតផង ដែលធ្វើឱ្យទាក់ទាញអារម្មណ៍លោកឱ្យចង់មកកម្សាន្តម្ដងហើយម្ដងទៀត។

លើសពីនេះទៅទៀត តំបន់នេះមិនត្រឹមតែរូបលោកប៉ុណ្ណោះទេ ក៏មានមនុស្សម្នា និងភ្ញៀវទេសចរជាច្រើនទៀតផងដែរ ដែលបានមកកំសាន្ត ព្រោះនៅទីនោះយើងអាចអង្គុយញ៉ាំចំណីអាហារលេងក៏បាន ជិះទូកលេងក៏បាន និងចុះងូតទឹកលេងក៏បាន។

ជាចុងក្រោយ លោកក៏បានផ្ដាំផ្ញើទៅភ្ញៀវទេសចរណ៍ជាតិអាចអញ្ជើញទៅលេងកំសាន្តមិនខុសបំណងឡើយ ព្រោះតំបន់រមណីយដ្ឋានខាងលើនេះ ពិតជាមានភាពទាក់ទាញ និងស្រស់ស្អាតថែមទៀតផង ដែលយើងអាចផ្ដិតយករូបភាពទាំងនេះមកទុកសម្រាប់ទស្សនាផងដែរ៕

អត្ថបទ: សោ និយមរ័ត្ន