សមត្ថកិច្ចឃាត់ខ្លួនអ្នកកាសែត២នាក់ចោទថាពាក់ព័ន្ធនឹងការកំហែងយកប្រាក់

សមត្ថកិច្ចខេត្តកណ្ដាលបានឃាត់ខ្លួនអ្នកកាសែត២នាក់​ពាក់ព័ន្ធនឹងការកំហែងយកប្រាក់ និងក្លែងបន្លំប្រើប្រាស់លិខិតក្លែងក្លាយកាលពីថ្ងៃទី១៤ ខែធ្នូ ឆ្នាំ២០២៤។

ស្នងការដ្ឋាននគរបាលខេត្តកណ្ដាលបានបញ្ជាក់នៅលើហ្វេសបុកផេកនៅថ្ងៃទី១៧ ខែធ្នូ ឆ្នាំ២០២៤ ថាជនសង្ស័យទាំងពីរមានឈ្មោះ សូរ សំបូរ អាយុ៤០ឆ្នាំ ជាចាងហ្វាង និងលោក នឿប ប៊ុន អាយុ៣៣ឆ្នាំ ជានិពន្ធនាយកកាសែត SSBT News ដោយថាលើកឡើងថាអ្នកទាំងពីរបានផ្សព្វផ្សាយព័ត៌មានមិនពិត គ្មានប្រភព កាលពីថ្ងៃទី១៣ និង១៤ ខែធ្នូ ព្រមទាំងបានប្រើសារជាអក្សរ និងសំឡេងគំរាមកំហែងទារប្រាក់ថែមទៀតផង។

កម្ពុជាថ្មីមិនអាចសុំការបញ្ជាក់បន្ថែមពីស្នងការនគរបាលខេត្តកណ្ដាលលោក ឈឿន សុចិត្ត បាននៅឡើយទេ។ ដោយឡែកអ្នកនាំពាក្យក្រសួងព័ត៌មានលោក ទេព អស្នារិទ្ធ បានឱ្យដឹងថាក្រសួងកំពុងតាមដានចំពោះករណីនេះ ដោយលោកបានបញ្ជាក់ថាការផ្ដល់មេធាវីអាចធ្វើទៅបានដរាបណាអ្នកកាសែតនោះអនុវត្តន៍ការងារក្នុងតួនាទីរបស់ខ្លួន ដែលគោរពនូវវិជ្ជាជីវៈត្រឹមត្រូវ។

លោកថា៖ «ជាគោលការណ៍ការណ៍ផ្ដល់ការធានាដល់អ្នកសារព័ត៌មានទាំងអស់គ្នាដែលចុះបញ្ជីនៅក្រសួងព័ត៌មានមានប័ណ្ណសំគាល់អ្នកសារព័ត៌មានត្រឹមត្រូវដែលមានចុះបញ្ជីហើយអនុវត្តន៍ការងារបស់ខ្លួនគោរពក្រមសីលធម៌វិជ្ជាជីវៈសារព័ត៌មាននោះគឺជាលក្ខខន្តដែលពិចារណាលើសំណើរផ្ដល់នូវការគាំពារផ្នែកច្បាប់ក៏ដូចជាការផ្ដល់មេធាវីជួយ»។

ចំណុចមួយក្នុងចំណុចទី១៨ក្នុងធម្មនុញ្ញវិជ្ជាជីវៈសារព័ត៌មានបានបញ្ជាក់ថាអ្នកអនុវត្តសកម្មភាពក្នុងវិស័យព័ត៌មាន និងសោតទស្សន៍មិនត្រូវ ជំរិតទារប្រាក់ (កំហែងទារ) ឬលាភសក្ការៈ ជាថ្នូងនឹងការផ្សារ ឬមិនផ្សាយព័ត៌មានឡើយ ដោយបានបញ្ជាក់បន្ថែមថាអ្នកអនុវត្តសកម្មភាពក្នុងវិស័យសារព័ត៌មាន និងសោតទស្សន៍ត្រូវគោរពច្បាប់ជាធរមាននៃព្រះរាជាណាចក្រកម្ពុជា។ ទង្វើក្រៅវិជ្ជាជីវៈសារព័ត៌មាន ត្រូវប្រឈមនឹងផលវិបាកផ្នែករដ្ឋប្បវេណី និងព្រហ្មទណ្ឌ ដូចមានចែងក្នុងច្បាប់និងលិខិតបទដ្ឋានគតិយុត្តជាធរមាន។ ទង្វើបំពានប្រភេទទាំងនេះមិនស្ថិតក្នុងក្របខណ្ឌនៃសេរីភាពខាងសារខាងសារព័តមានឡើយ៕

ដោយ ហ៊ុន សិរីវឌ្ឍន៍