ប្រមុខការពារជាតិកម្ពុជា នឹងធ្វើទស្សនកិច្ចនៅវៀតណាម៤ថ្ងៃ ដើម្បីចូលរួមពិព័រណ៍ការពារជាតិ អន្តរជាតិវៀតណាមឆ្នាំ២០២៤

ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា លោក ទៀ សីហា នឹងបំពេញទស្សនកិច្ចនៅវៀតណាមរយៈពេល៤ ថ្ងៃ ចាប់ពីថ្ងៃទី១៨ ដល់ថ្ងៃទី២១ ខែធ្នូ ឆ្នាំ២០២៤ ដើម្បីចូលរួមព្រឹត្តិការណ៍តាំងពិព័រណ៍ការពារជាតិ អន្តរជាតិវៀតណាមឆ្នាំ២០២៤ និងចូលរួមអបអរសាទរក្នុងឱកាសខួបអនុស្សាវរីយ៍ថ្ងៃកំណើតកងទ័ពប្រជាជនវៀតណាម លើកទី៨០។ នេះបើតាមសេចក្ដីប្រកាសព័ត៌មានរបស់ក្រសួងការពារជាតិកម្ពុជា​ចុះថ្ងៃទី ១៧ ខែធ្នូ ឆ្នាំ២០២៤ នេះ។

ក្រសួងការពារជាតិវៀតណាម បានឱ្យដឹងថា  ក្នុងដំណើរទស្សនកិច្ចនៅវៀតណាមតបតាមការអញ្ជើញរបស់រដ្ឋមន្ត្រីក្រសួងការពារប្រទេសវៀតណាម,  នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងដឹកនាំគណៈប្រតិភូជាន់ខ្ពស់ក្រសួងការពារជាតិ និងអគ្គបញ្ជាការដ្ឋាន នៃកងយោធពលខេមរភូមិន្ទទៅចូលរួម។

ក្នុងឱកាសនៃការចូលរួមកម្មវិធីដ៏មានសារៈសំខាន់ខាងលើ លោក ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏គ្រោងចូលជួបសម្តែងការគួរសម និងពិភាក្សាការងារជាមួយថ្នាក់ដឹកនាំជាន់ខ្ពស់ របស់ក្រសួងការពារប្រទេសវៀតណាម។

 ទន្ទឹមនឹងនោះ លោក ឧបនាយករដ្ឋមន្ត្រី ក៏នឹងជួបពិភាក្សាការងារជាមួយបណ្តាថ្នាក់ដឹកនាំជាន់ខ្ពស់ មកពីបណ្តា ប្រទេសមួយចំនួនទៀត ដែលនឹងអញ្ជើញចូលរួមកម្មវិធីទាំងពីរខាងលើ ក្នុងន័យបន្តពង្រឹង និងពង្រីកកិច្ចសហប្រតិបត្តិការ ការពារជាតិទ្វេភាគីបន្ថែមទៀត។

តាមក្រសួងការពារជាតិកម្ពុជា ដំណើរទស្សនកិច្ចរបស់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងបញ្ជាក់ជាថ្មីម្តងទៀត នូវ ចំណងមិត្តភាព សាមគ្គីភាព ដ៏យូរអង្វែង និងការប្តេជ្ញាចិត្តរបស់ក្រសួងការពារជាតិកម្ពុជា និងកងយោធពលខេមរភូមិន្ទ ជាមួយកងទ័ពប្រជាជនវៀតណាម សំដៅបង្កើន និងជំរុញកិច្ចសហប្រតិបត្តិការការពារជាតិរវាងគ្នានិងគ្នា ឱ្យកាន់តែស៊ី ជម្រៅរឹងមាំបន្ថែមទៀត ស្របគ្នានេះដែរ ក៏ចូលរួមការពារថែរក្សានូវសន្តិសុខ សន្តិភាព ស្ថិរភាព និងការអភិវឌ្ឍ ប្រកបដោយចីរភាព និងបរិយាបន្ន សម្រាប់តំបន់ និងសកលលោកទាំងមូល៕

ដោយ៖ ង៉ិល ណារ៉ាត់