ជាថ្មីម្ដងទៀត! លោក ហ្សេលេនស្គី អញ្ជើញសម្ដេចតេជោ ធ្វើទស្សនកិច្ចនៅអ៊ុយក្រែន តែសម្តេចឆ្លើយថា រង់ចាំពេលសមស្របសិន

ជាថ្មីម្ដងទៀត ប្រធានាធិបតីអ៊ុយក្រែន លោក ហ្សេលេនស្គី បានអញ្ជើញសម្ដេចតេជោ​ ហ៊ុន សែន ប្រធានព្រឹទ្ធសភាកម្ពុជា បំពេញទស្សនកិច្ចនៅប្រទេសអ៊ុយក្រែន។

ការអញ្ជើញសម្ដេចតេជោ ហ៊ុន សែន ឱ្យទៅបំពេញទស្សនកិច្ចជាថ្មីម្ដងទៀតពីសំណាក់ប្រធានាធិបតីអ៊ុយក្រែន នេះ  ត្រូវបានលោក អូឡេកសាន់ឌឺ ហ្កាម៉ាន ឯកអគ្គរដ្ឋទូតអ៊ុយក្រែនប្រចាំកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម យកមកជម្រាបជូនសម្ដេចតេជោ ប្រធានព្រឹទ្ធសភាកម្ពុជា នៅក្នុងជំនួបសម្ដែងការគួរសម នៅវិមានព្រឹទ្ធសភា នាព្រឹកថ្ងៃទី១៧ ខែធ្នូ ឆ្នាំ២០២៤។

សេចក្ដីប្រកាសព័ត៌មានស្ដីពីលទ្ធផលជំនួបរវាងសម្ដេចតេជោ ហ៊ុន សែន ជាមួយទូតអ៊ុយក្រែន បានសរសេរថា៖«ឆ្លៀតក្នុងជំនួបនេះ ឯកឧត្តម(អូឡេកសាន់ឌឺ ហ្កាម៉ាន) សូមពាំនាំការអញ្ជើញរបស់ ឯកឧត្តមប្រធានាធិបតី និងឯកឧត្តមប្រធានរដ្ឋសភាអ៊ុយក្រែន ចំពោះសម្តេចតេជោ ដើម្បីទៅបំពេញទស្សនកិច្ចនៅអ៊ុយក្រែន បន្ទាប់ពីសម្តេចបានអញ្ជើញទៅអ៊ុយក្រែនកាលពីឆ្នាំ១៩៨១។»។

ជាការឆ្លើយតប សម្ដេចតេជោ ប្រធានព្រឹទ្ធភា បានទទួលយកការអញ្ជើញទៅទស្សនកិច្ចនៅអ៊ុយក្រែន ប៉ុន្តែរងចាំពេលវេលាសមស្របនាពេលខាងមុខសិន។

សូមរម្លឹកថា កាលពីថ្ងៃទី០១ ខែវិច្ឆិកា​​ ឆ្នាំ២០២២ តាមរយៈជំនួបតាមខ្សែទូរស័ព្ទ ប្រធានាធិបតីអ៊ុយក្រែន លោក ហ្សេលេនស្គី ធ្លាប់បានអញ្ជើញសម្ដេចតេជោ ហ៊ុន សែន ក្នុងតួនាទីជានាយករដ្ឋមន្ត្រី ឱ្យទៅបំពេញទស្សនកិច្ចនៅអ៊ុយក្រែនម្ដងរួចមកហើយ។ កាលណោះ សម្ដេចតេជោ បានទទួលយកសំណើរអញ្ជើញទៅទស្សនកិច្ចនៅអ៊ុយក្រែន ក្នុងពេលវេលាសមស្រប។

ក្រោយមក នៅថ្ងៃទី២៨ ខែឧសភា តាមរយៈកិច្ចសន្ទនាតាមប្រព័ន្ធវីដេអូ ប្រធានរដ្ឋសភាអ៊ុយក្រែន លោក រូស្លាន ស្តេហ្វានឈុក បានអញ្ជើញសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បំពេញទស្សកិច្ចនៅអ៊ុយក្រែន។ ជាការឆ្លើយតប សម្ដេចតេជោ ឆ្លើយថានឹងផ្តល់ចម្លើយអំពីដំណើរទស្សនកិច្ចនៅអ៊ុយក្រែន ក្នុងពេលសមស្របណាមួយ។

គួរឱ្យដឹងថា សម្ដេចតេជោ ហ៊ុន សែន ធ្លាប់បានអញ្ជើញទៅកាន់ប្រទេសអ៊ុយក្រែនម្ដងរួចមកហើយ កាលពីឆ្នាំ១៩៨១។

នៅចុងបញ្ចប់ នៃជំនួបជាមួយទូតអ៊ុយក្រែន  សម្តេចតេជោ ហ៊ុន សែន ផ្ដាំផ្ញើការសួរសុខទុក្ខរបស់សម្តេចជូន ប្រធានាធិបតី នាយករដ្ឋមន្ត្រី និង ប្រធានសភាអ៊ុយក្រែនផងដែរ៕