ពលករជាង១ពាន់នាក់ត្រូវអាជ្ញាធរខេត្តបាត់ដំបងបញ្ជូនទៅកាន់រាជធានីខេត្តផ្សេងៗត្រឹមរយៈពេល១០ថ្ងៃ

រយៈពេល១០ថ្ងៃនេះមានពលករខ្មែរប្រមាណជាង១ពាន់នាក់ហើយត្រូវបានអាជ្ញាធរខេត្តបាត់ដំបងបញ្ជូនទៅកាន់រាជធានីខេត្តផ្សេងៗ ខណៈខេត្តទទួលពលករមកវិញពីតាមបណ្តាខេត្តជាប់ព្រំដែនផ្សេងៗប្រមាណជាង២ពាន់នាក់ផងដែរ។

លោក ងួន រតនៈ អភិបាល នៃគណៈអភិបាលខេត្តបាត់ដំបងបានមានប្រសាសន៍ថា គិតចាប់ពីថ្ងៃទី៧ ខែមីនា ឆ្នាំ២០២១រហូតមកដល់បច្ចុប្បន្ននេះ អាជ្ញាធរខេត្តបាត់ដំបងបានបញ្ជួនពលករជាង ១,០០០នាក់ ទៅរាជធានីខេត្តផ្សេងៗ និងមានពលករជាង ២,០០០នាក់ដែលមានលំនៅដ្ឋានក្នុងខេត្តបាត់ដំបង ត្រូវបានបញ្ជូនពីបណ្ដាខេត្តជាប់ព្រំដែន ខណៈបច្ចុប្បន្នមានពលករកំពុងធ្វើចត្តាឡីស័កក្នុងខេត្តមានចំនួន ២,៣១៥នាក់។

ទន្ទឹមនឹងនេះ លោកអភិបាលខេត្តបានស្នើឲ្យរដ្ឋបាលស្រុក ចំនួន២ថ្មគោល និងស្រុកបវេលត្រូវរៀបចំបន្ថែមមណ្ឌលចត្តាឡីស័ក សម្រាប់ពលករខ្មែរ ដែលទើបត្រឡប់ពីប្រទេសថៃ។

ថ្លែងក្នុងឱកាសចុះពិនិត្យស្ថានភាពទូទៅ និងគ្រប់គ្រងពលករតាមមណ្ឌលចត្តាឡីស័ក នៅតាមបណ្តាស្រុកមួយចំនួននៅរសៀលថ្ងៃទី១៥មីនា លោកបានមានប្រសាសន៍ថាការស្នើឲ្យស្រុកទាំងពីរខាងលើរៀបចំមណ្ឌលចត្តាឡិស័កបន្ថែមទៀតនេះដោយសង្កេតឃើញថាចំនួនពលករច្រើនមកពីប្រទេសថៃមានចំនួនច្រើន។ដូចនេះស្រុកទាំងពីរខាងលើត្រូវរៀបចំមណ្ឌលចត្តាឡីស័កបន្ថែមទៀត ដើម្បីត្រៀមសម្រាប់ពលករវិលត្រឡប់ពីប្រទេសថៃវិញ។

លោកបានបន្ថែមថា ការរៀបចំមណ្ឌលចត្តាឡីស័ក ក៏ត្រូវមានរៀបចំនូវបង្គន់អនាម័យឲ្យបានត្រឹមត្រូវ ក៏ដូចជាកន្លែងងូតទឹក ភ្លើងអគ្គីសនី និងផ្ដល់របបអាហារឲ្យបានគ្រប់គ្នា រួមទាំងត្រូវរឹតបន្តឹងការធ្វើចត្តាឡីស័ករបស់ពលករ និងផ្សព្វផ្សាយអប់រំពីវិធានទប់ស្កាត់ការឆ្លងរីករាលដាលនៃជំងឺកូវីដ១៩ ដល់ពួកគេឲ្យបានយល់ដឹងច្បាស់ ព្រមទាំងច្បាប់ស្តីពីកូវីដ១៩ និងអនុក្រឹតរបស់រាជរដ្ឋាភិបាល។

លោកអភិបាលខេត្តបានបញ្ជាក់ថា ស្រុកជាប់ជាយដែន រួមមានស្រុកកំរៀង ភ្នំព្រឹក និងស្រុកសំពៅលូន ចាប់ផ្ដើមមានសភាពធូរស្រាល ប៉ុន្តែស្រុកមួយចំនួននៅខាងក្នុង មានកំណើនពលករច្រើន ពិសេសនៅមុនរដូវបុណ្យចូលឆ្នាំនេះ៕

អត្ថបទ៖ សំអឿន