ព័ត៌មានជាតិ

រដ្ឋបាលខណ្ឌសែនសុខ ដាក់គ្រឿងចក្រស្ដារប្រឡាយ«អូរអាគុជ» រំដោះទឹកជន់លិចនារដូវវស្សាខាងមុខ

បានផុស

២៣ វិនាទី មុន

នៅ

ថ្ងៃពុធ ១៨ ធ្នូ ២០២៤

ដោយ

កាលពីថ្ងៃទី ១៧ ខែធ្នូ ឆ្នាំ ២០២៤ ម្សិលមិញនេះ លោក ឯក ឃុនឌឿន អភិបាលរងរាជធានីភ្នំពេញ រួមជាមួយក្រុមការងារខណ្ឌសែនសុខ សង្កាត់ បានចុះពិនិត្យស្ថានភាពប្រឡាយ«អូរអាគុជ» ដែលរដ្ឋបាលខណ្ឌ កំពុងដាក់គ្រឿងចក្រស្ដារប្រឡាយ និងឈូសឆាយផ្លូវតាមខ្នងប្រឡាយ ក្នុងភូមិសាស្ត្រសង្កាត់ភ្នំពេញថ្មី ខណ្ឌសែនសុខ។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ បរិស្ថាន និងអនាម័យខណ្ឌសែនសុខ បានប្រាប់ កម្ពុជាថ្មី ថា ដោយមានការយកចិត្តទុកដាក់ពីសំណាក់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងមានការណែនាំពី លោក ម៉ូវ ម៉ានិត អភិបាលខណ្ឌសែនសុខ និងលោក ឯក ឃុនឌឿន អភិបាលរងរាជធានីភ្នំពេញ ទទួលបន្ទុកការងារសាធារណការ បានដឹកនាំក្រុមការងារជំនាញរដ្ឋបាលខណ្ឌសែនសុខ និងអាជ្ញាធរសង្កាត់ ចុះពិនិត្យស្ថានភាពប្រឡាយ«អូរអាគុជ» ដែលកំពុងដាក់គ្រឿងចក្រស្តារប្រឡាយ និងឈូសឆាយធ្វើផ្លូវខ្នងប្រឡាយ ដើម្បីឱ្យមានផ្លូវធ្វើដំណើរងាយស្រួលដល់ប្រជាពលរដ្ឋរស់នៅតំបន់នោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបញ្ជាក់ថា ការស្តារប្រឡាយ«អូរអាគុជ»នេះ ត្រូវស្តារឡើងវិញចាប់ពីព្រំប្រទល់ផ្លូវ ៥៩៨ (ត្រឡោកបែក) មកទល់នឹងផ្លូវ ហាណូយ ហើយបច្ចុប្បន្នកំពុងធ្វើជាដំណាក់កាលៗ ដោយមានគ្រឿងចក្រកំពុង«ត្រាស់សេ» លើខ្នងប្រឡាយ ដើម្បីឱ្យអាអិចដៃវែងចូលទៅកាយស្តារប្រឡាយ«អូរអាគុជ»។

លោកក៏បានបន្ថែមថា ការស្តារប្រឡាយមេ«អូរអាគុជ»នេះ មានសារៈសំខាន់ណាស់សម្រាប់ប្រជាពលរដ្ឋក្នុងមូលដ្ឋាន ព្រោះថានារដូវវស្សា ប្រឡាយនេះមានមុខងារសំខាន់ហូររំដោះទឹកជន់លិច ចាក់ទៅស្ថានីយបូមទឹក «ត្រឡោកបែក»៕

អត្ថបទ ៖ សំណាង