ក.ប.ទ៖ ពលរដ្ឋបានងាកមកប្រើបណ្ដាញសង្គមជំនួសការទាក់ទងតាមលេខទូរស័ព្ទផ្ទាល់

ក្រសួងប្រៃសណីយ និងទូរគមនាគមន៍ ហៅកាត់ថា ក.ប.ទ បានលើកឡើងថាស្របពេលដែលកំពុងជំរុញប្រតិបត្តិករទូរស័ព្ទចល័តទាំងអស់ដោះស្រាយបញ្ហាពាក់ព័ន្ធនឹងការហៅឆ្លងប្រព័ន្ធឱ្យមានភាពល្អប្រសើរ ក្រសួងបានសង្កេតឃើញថាពលរដ្ឋបច្ចុប្បន្នបានងាកមកប្រើប្រាស់ការប្រាស្រ័យទាក់ទងតាមបណ្ដាញសង្គមជំនួសការទាក់ទងតាមលេខទូរស័ព្ទដោយផ្ទាល់វិញ។

ក្រសួងបានកត់សម្គាល់បែបនេះក្នុងសេចក្ដីប្រកាសព័ត៌មានចុះថ្ងៃទី១៨ ខែធ្នូ របស់ខ្លួនដោយថាបើទោះបីពេលនេះបញ្ហាពាក់ព័ន្ធនឹងការហៅឆ្លងប្រព័ន្ធត្រូវបានដោះស្រាយឱ្យមានភាពល្អប្រសើរជាងមុន និងសម្រួលដល់ទំនាក់ទំនងរបស់ប្រជាពលរដ្ឋហើយក្ដី តែការទាក់ទងឬហៅទូរស័ព្ទដោយប្រើប្រាស់បណ្ដាញសង្គមដូចជា Telegram, Whatsapp និងFacebook Messenger ត្រូវបានពលរដ្ឋចាប់យកមកប្រើប្រាស់ជំនួសឱ្យការទាក់ទងតាមលេខទូរស័ព្ទចល័តផ្ទាល់។

ពលរដ្ឋរស់នៅរាជធានីភ្នំពេញម្នាក់លោក ស៊ឹម វិបុល បានប្រាប់កម្ពុជាថ្មីថាលោកស្ទើរតែមិនដែលទាក់ទងទៅមិត្តភ័ក្ររបស់លោកតាមលេខទូរស័ព្ទទៅហើយពេលនេះ ដោយរាល់ពេលដែលចង់ទាក់ទងលោកតែប្រើប្រាស់ Telegram ឬFacebook Messenger វិញដោយថាការប្រើប្រាស់បណ្ដាញសង្គមមានភាពងាយស្រួលជាង អាចដឹងពីពេលដែលពួកគេអនឡាញ ឬខលទៅ ភាគីម្ខាងទៀតបានឃើញឬមិនឃើញ និងអាចខលជាវីដេអូបាន។

គួរឱ្យដឹងផងដែរថានៅកម្ពុជាបច្ចប្បន្នមានក្រុមហ៊ុនទូរស័ព្ទចំនួន៥រួមមាន Cellcard, Smart, Metfone, Seatel និង Cootel ខណៈដែលពេលនេះក្រុមហ៊ុនបានផ្ដោតលើការផ្ដល់ជាកញ្ចប់អ៊ុនធើណិតដល់អ្នកប្រើប្រាស់វិញ។

ក្រសួងប្រៃសណីយ៍ និងទូរគមនាគមន៍ បានដាក់ចេញនូវផែនការសកម្មភាពជាច្រើនដើម្បីពង្រឹងគុណភាពសេវាទូរគមនាគមន៍ដោយមានការចាប់សាងសង់អង់តែនបន្ថែមនៅតាមបុរីនានាក្នុងរាជធានីភ្នំពេញ រួមទាំងក្នុងរាជធានីភ្នំពេញ និងនៅតាមបណ្ដាខេត្តផងដែរ៕

ដោយ ហ៊ុន សិរីវឌ្ឍន៍