ពលរដ្ឋស្នើឲ្យអាជ្ញាធរខណ្ឌចំការមនជួសជុលផ្លូវជង្ហុកជាង២០ម៉ែត្រ

កំណាត់ផ្លូវលេខ ៩៥ កែងផ្លូវលេខ ៤៥៦ ប្រវែងជាង២០ម៉ែត្រ នៅខាងក្រោយអតីតក្រសួងដែនដីចាស់ ក្នុងសង្កាត់បឹងត្របែក ខណ្ឌចំការមន បាននិងកំពុងខូចក្លាយជាផ្លូវមានជង្ហុកពិបាកធ្វើដំណើរ ពលរដ្ឋក៏ដូចជាអ្នកធ្វើដំណើរស្នើឲ្យអាជ្ញាធរ​ពាក់ព័ន្ធជួសជុលស្ថាបនាឡើងវិញ។

លោក បញ្ញារ័ត្ន ជាពលរដ្ឋរស់នៅអមសងខាងផ្លូវដែលកំពុងខូចនេះបានលើកឡើងថា ផ្លូវនេះទើបតែខូចប្រមាណជាប៉ុន្មានខែនេះទេ តែដោយសារតែមានភ្លៀងដក់ទឹក ធ្វើអោយផ្លូវនេះចាប់ផ្តើមមានជង្ហុកជ្រៅម្តងបន្តិចៗ ទៅជាជង្ហុកជ្រៅងាយបង្កគ្រោះជាយថាហេតុ។

លោកស្រី សុខ ធីតា ពលរដ្ឋនៅក្បែរនោះក៏បានប្រាប់បន្ថែមដែរថា ផ្លូវលេខ ៩៥ កែងនឹងផ្លូវលេខ ៤៥៦ គឺខូចខាតប្រវែងជាង ២០ម៉ែត្រតែប៉ុណ្ណោះ ហើយមួយរយៈមុន ពេលមានភ្លៀងធ្លាក់ពេលយប់ មានបុរសម្នាក់ជិះម៉ូតូបានធ្លាក់ជង្ហុក ដួល របួសដៃជើង និងបោកក្បាលថែមទៀតផង តែមិនមានគ្រោះថ្នាក់ដល់ជីវិតនោះទេ។

ចំពោះបញ្ហានេះ ប្រជាពលរដ្ឋបានស្នើសុំក៏ដូចជាសំណូមពរទៅកាន់អាជ្ញាធរជំនាញពាក់ព័ន្ធចុះត្រួតពិនិត្យ និងជួសជុលឡើងវិញ ទោះបីជង្ហុកតែបន្តិចបន្តួចក៏ដោយក៏អាចបង្កគ្រោះថ្នាក់បានដែរ។

លោក កៀង ល័ក្ខ អភិបាលខណ្ឌនៃគណៈអភិបាលខណ្ឌចំការមន បានប្រាប់ កម្ពុជាថ្មី អោយដឹងថា លោកនឹងចាត់មន្រ្តីជំនាញសាធារណការខណ្ឌ ចុះទៅត្រួតពិនិត្យជាបន្ទាន់៕

អត្ថបទ៖ រដ្ឋា