យក្សចំនួន២០០ ទីងមោង៨៥ នឹងរត់ចូលរាជធានីភ្នំពេញ ក្នុងថ្ងៃឆ្លងឆ្នាំ ដើម្បីរត់អបអរព្រឹត្តិការណ៍«សាទរកម្ពុជា»

ព្រឹត្តិការណ៍«សាទរកម្ពុជា» នឹងរៀបចំឡើងចាប់ពីថ្ងៃទី២៩ ខែធ្នូ ឆ្នាំ២០២៥​ ដល់ថ្ងៃទី០១ ខែមករា ឆ្នាំ២០២៥ ដោយមានកម្មវិធីកម្សាន្តសប្បាយជាច្រើន។ ក្នុងនោះនៅល្ងាចថ្ងៃទី៣១​​ ខែធ្នូ នឹងមានរៀបចំជា“ក្បួនដង្ហែសាទរកម្ពុជា” មានអ្នកចូលរួមប្រមាណជាង ៣០០០នាក់។ លោក សុខ សប្បាយណា សមាជិកគណៈកម្មការរៀបចំព្រឹត្តិការណ៍«សាទរកម្ពុជា» បានឱ្យដឹងថា ក្នុងចំណោមអ្នកចូលរួម នឹងមានយក្សល្ខោនបាសាក់ចំនួន២០០ ទីងមោង ឆៃយ៉ាំចំនួន៨៥ រួមជាមួយស្គរទម្ងន់៣តោន និងក្បួនរថយន្តដង្ហែរ។

លោក សុខ សប្បាយណា ឱ្យដឹងដូច្នេះ៖« គឺមាន ក្បួនដង្ហែសាទរកម្ពុជា ដែលមានអ្នកចូលរួមជាង៣ពាន់នាក់។ ក្នុងនោះ(…) ក្រុមការងារទំនាក់ទំនងសាធារណៈជំរុញឱ្យមានការរៀបចំយក្ស មានយក្សចូលក្រុង ទីងមោងរត់ប្រណាំងជាដើមដែលសុទ្ធតែជាអត្តសញ្ញាណរបស់យើង»។ លោក សុខ សប្បាយណា បន្ថែមថា ៖« ខ្ញុំអាចបញ្ជាក់បានថា ដង្ហែក្បួននេះ ពេលនោះ ៣ពាន់នាក់ជាងនេះ គឺមានយក្ស ២០០យក្ស មកពីទូទាំងប្រទេស មកចូលរួម ក្បួនដង្ហែសាទរកម្ពុជា  ទីងមោង៨៥ទីងមោង មានស្គរធំមួយ ស្គរទម្ងន់៣តោន មានរថយន្តធំៗ៣ ហើយមានប៉េងប៉ោង៣ធំៗប្រវែង១៤ម៉ែត្រ ហើយមួយទៀត ក៏យើងនាំមកនូវតុក្កតាយក្ស និងគោមយក្សដែលសហការជាមួយខេត្តសៀមរាប​ ចំនួន៦ធំៗ»។

ជាមួយគ្នា ក៏មាននៅកម្មវិធីដង្ហែ និងបង្ហូតទង់ជាតិ កម្មវិធីសម្ដែងទស្សនីយភាពចម្រុះ ប្រជុំទៅដោយអ្នកចម្រៀងល្បីៗ ៥៧រូប និងអ្នកសម្ដែង៦២៥នាក់ និងទីតាំងដែលតុបតែងពោរពេញដោយការទាក់ទាញ និងកម្មវិធីឆ្លងឆ្នាំសកលជុំគ្នា និងកម្មវិធីកម្សាន្តជាច្រើនផ្សេងទៀត។

គួរឱ្យដឹងថា ក្បួនដង្ហែសាទកម្ពុជា នឹងចាប់ផ្ដើមនៅម៉ោង៦ល្ងាច គឺនៅវេលាអស្តង្គត ដែលនឹងចាប់ផ្តើមចេញ ដំណើរពីចំណុចកែងរវាងវិថីព្រះអង្គហស្សកណ្ឌ (ផ្លូវ១៤៤) នឹងតីរវិថីព្រះស៊ីសុវត្ថិ មកកាន់សួនច្បារមុខព្រះ បរមរាជវាំង។ ក្បួនដង្ហែនេះនឹងនាំមកនូវអត្ថន័យជាក់លាក់នៃព្រឹត្តិការណ៍ “សាទរកម្ពុជា” គឺការអបអរសាទរដល់សង្គមមួយ ដែលប្រកបដោយភាពរស់រវើក ជាមួយនឹងការបង្ហាញវិសេសភាពនៃអត្តសញ្ញាណ និងការលើកតម្កើងមោទនភាពក្នុងភាពជាប្រជាជាតិមួយ។ ការសាទរកម្ពុជាជាមួយគ្នាក្នុងកម្មវិធីក្បួនដង្ហែ រួមមានការសម្តែងទស្សនីយភាពវប្បធម៌ ព្យុហយាត្រា ឬកីឡា ជាមួយការតុបតែងសម្លៀកបំពាក់ និងគ្រឿង រចនាកាយ រួមជាមួយការច្នៃប្រឌិតបង្កើតយានក្បួនដង្ហែ ពោងបង្ហោះ និងការតុបតែងរចនា ឬគ្រឿងលម្អ ជាមួយពណ៌ បច្ចេកវិទ្យា និងពន្លឺ ក៏ដូចជាការបង្ហាញទេពកោសល្យសិល្បៈ ឬការច្នៃប្រឌិត ដោយមានកិច្ច សហការរវាងស្ថាប័ននិងក្រុម។

គួរឱ្យដឹងថា ព្រឹត្តិការណ៍«សាទរកម្ពុជា» ត្រូវបានផ្តួចផ្តេីមឡេីងក្នុងគោលបំណង ផ្សារភ្ជាប់ប្រជាជនទៅសង្គមជាតិទាំងមូល ដែលក្នុងនោះតាមរយ:ការរៀបចំព្រឹត្តិការណ៍ និងកម្មវិធីនានា «សាទរកម្ពុជា» នឹងបង្ហាញក្នុងនាមជាប្រជាជាតិមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរពេញដោយក្តីសង្ឃឹម និងមានភាពជឿជាក់ រួមគ្នាឆ្ពោះទៅកាន់អនាគតដ៏រុងរឿងរបស់ជាតិយេីង។ ផ្តល់ជាវេទិកា និងឱកាសដល់គ្រប់កោសិកា គ្រប់ស្រទាប់វណ្ណៈ គ្រប់សហគមន៍ និងមជ្ឈដ្ឋានផ្សេងៗ នៃសង្គម បង្ហាញនូវមោទនភាពចំពោះអត្តសញ្ញាណរបស់ខ្លួន និងជាពិសេសចំពោះអត្តសញ្ញាណជាតិជារួម ដែលជាអ្វីធ្វើឱ្យខ្លួនយើងមានមោទនភាពក្នុងនាមជាខ្មែរក្រោម «ទង់នៃព្រះរាជាណាចក្រកម្ពុជា» ដោយការរួបរួម សាមគ្គី ឯកភាព ជាកម្លាំងជាតិតែមួយ។ បង្កើនមនោសញ្ចេតនារវាងប្រជាជន និងនៃប្រជាជាតិកម្ពុជា ទោះនៅក្នុងប្រទេស ឬនៅឯនាយសមុទ្រ ក្នុងការអបអរសាទរក្នុងនាមជាមហាគ្រួសារខ្មែរតែមួយ អនាគតតែមួយដើម្បីកម្ពុជា នៅក្រោមទង់ជាតិតែមួយហើយដែលមានអនាគតតែមួយដេីម្បីកម្ពុជា៕