ព័ត៌មានជាតិ

ខេត្តកោះកុងមានអ្នកទៅធ្វើតេស្តឈាមរកមេរោគអេដស៍ចំនួន៣.៥៨៩នាក់

បានផុស

៣ ខែ មុន

នៅ

ថ្ងៃព្រហស្បតិ៍ ១៩ ធ្នូ ២០២៤

ដោយ

កោះកុង ៖ មន្រ្តីសុខាភិបាលខេត្តកោះកុង បង្ហាញថា ជិតបំណាច់ឆ្នាំ២០២៤នេះ មានពលរដ្ឋទៅធ្វើតេស្តពិនិត្យឈាមរកមេរោគអេដស៍ចំនួន៣.៥៨៩នាក់ និងមានអ្នកផ្ទុកនិងអ្នកជំងឺអេដស៍ ដែលកំពុងទទួលសេវាព្យាបាលដោយឱសថប្រឆាំងមេរោគអេដស៍ (ARV)មាន១.០៣០/ស្រី៥៥៧នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតចាប់ពីខែមករា ដល់ពាក់កណ្តាលខែវិច្ឆិកា ឆ្នាំ២០២៤ អ្នកទៅធ្វើតេស្តឈាមរកមេរោគអេដស៍ចំនួន៣.៥៨៩នាក់ ក្នុងមូលដ្ឋានខេត្តកោះកុង។ នេះបើតាមការបញ្ជាក់របស់លោកស្រីវេជ្ជបណ្ឌិត ប៉ែន អ៊ុងវីរ៉ា អនុប្រធានមន្ទីរសុខាភិបាលខេត្តកោះកុង ក្នុងទិវាពិភពលោកប្រយុទ្ធនឹងជំងឺអេដស៍ ១ធ្នូ និងពិធីសម្ភោធអគារទីស្នាក់ការអនុសាខាកាកបាទក្រហមកម្ពុជា ស្រុកមណ្ឌលសីមា។

លោកស្រីវេជ្ជបណ្ឌិត ប៉ែន អ៊ុងវីរ៉ា បន្ថែមថា ក្នុងចំណោមអ្នកធ្វើតេស្តឈាមរកមេរោគអេដស៍ចំនួន៣.៥៨៩នាក់ មានស្រី២.៦៧៥នាក់ ហើយរកឃើញអ្នកមានវិជ្ជមាន ២៩នាក់/ស្រី៖១៣នាក់)។

ជាក់ស្តែងអ្នកផ្ទុកមេរោគអេដស៍ និងអ្នកជំងឺអេដស៍ ដែលកំពុងទទួលសេវាព្យាបាលដោយឱសថប្រឆាំងមេរោគ មានជាង១ពាន់/ស្រី៥៥៧នាក់។

មន្រ្តីសុខាភិបាលខេត្តកោះកុង ឱ្យដឹងទៀតថា អ្នកផ្ទុកមេរោគ ក្នុងនោះមានកុមារចំនួន១៧នាក់ និងមានអ្នកទទួលចំនួនប័ណ្ណមូលនិធិសមធម៌ចំនួន៤២៦នាក់ ដោយពួកគាត់កំពុងត្រូវបានយកចិត្តទុកដាក់យ៉ាងខ្ជាប់ខ្ជួនបំផុត។

បច្ចុប្បន្នខេត្តកោះកុង មានគ្លីនិកផ្តល់សេវាថែទាំ និងព្យាបាលបន្តគ្រប់ជ្រុងជ្រោយដល់អ្នកផ្ទុកមេរោគអេដស៍ និងអ្នកជំងឺអេដស៍ចំនួន២កន្លែង ក្នុងនោះមាននៅក្នុងបរិវេណមន្ទីរពេទ្យបង្អែកខេត្ត និងមន្ទីរពេទ្យបង្អែកស្រុកស្រែអំបិល។

គួរជម្រាបថា រាល់ការផ្តល់សេវាទាំងអស់ដែលទាក់ទងនឹងការស្រាវជ្រាវមេរោគអេដស៍ ការព្យាបាល និងថែទាំជំងឺ គឺមិនត្រូវបានបង់ថ្លៃសេវានោះទេ។ សូមនៅឱ្យឆ្ងាយ និងនិយាយថាទេពីគ្រឿងញៀន ព្រោះគ្រឿងនឹងបំផ្លាញអនាគតរបស់មនុស្សគ្រប់គ្នា និងសង្គមជាតិ។

បង្ការខ្លួនកុំឱ្យឆ្លងមេរោគអេដស៍ និងជំងឺកាមរោគ ដោយកុំឆាប់ប្រឡូករឿងស្នេហា ឬ ផ្លូវភេទ ត្រូវរង់ចាំដល់អាពាហ៍ពិពាហ៍មកដល់។ លោកស្រី មិថុនា ភូថង អភិបាលខេត្តកោះកុង ក៏បានអំពាវនាវដល់ពលរដ្ឋដែលមានការសង្ស័យដែលថា ខ្លួនមានមេរោគអេដស៍ត្រូវប្រញាប់ទៅពិនិត្យឈាម ស្វែងរកមេរោគឱ្យបានពិតប្រាកដ ជៀសវាងលាក់បាំងនាំចម្លងជំងឺរីករាលដាល។

ករណីរកឃើញនឹងមានក្រុមគ្រូពេទ្យរក្សាការសម្ងាត់ជូនមិនបែកធ្លាយជាសាធារណៈនោះទេ។ លោកស្រីអភិបាលខេត្ត លើកទឹកចិត្តថា នៅពេលបានដឹងខ្លួនថា ផ្ទុកមេរោគអេដស៍ ហើយទៅព្យាបាលទាន់ពេលវេលា ជារឿងល្អប្រសើរសម្រាប់សុខភាពរបស់ខ្លួនឯង និងសង្គមជាតិ ដោយធានាមិនបន្តចម្លងទៅមនុស្សដទៃទៀតបាន។

ដោយឡែកលោក សុខ ភិរម្យ ប្រធានគណៈកម្មាធិការអនុសាខាស្រុកមណ្ឌលសីមា ថ្លែងថា អាជ្ញាធរស្រុកឃុំភូមិរបស់លោក បានគាំទ្រជ្រុំជ្រោមដល់វិស័យសុខាភិបាល និងផ្តល់ព័ត៌មានដល់ពលរដ្ឋពីសេវាធ្វើតេស្តឈាម និងសេវាថែទាំព្យាបាលសុខភាពនៅតាមមណ្ឌលសុខភាព។

បើតាមលោក សុខ ភិរម្យ តែងតែផ្សព្វផ្សាយពីវិធានការបង្ការជំងឺនេះ និងកុំសេពគ្រឿងញៀនដែលធ្វើរុញច្រានបាត់ស្មារតីទៅរកសេវាផ្លូវភេទ ជាហានិភ័យនៃអត្រាឆ្លងមេរោគបានលឿនដោយមិនដឹងខ្លួន៕

អត្ថបទ ៖ សិរីវឌ្ឍនៈ