ព័ត៌មានជាតិ

ល្អមើល ក្រុម គួន ម៉ុម ប៉ះ ក្រុម គីមហាប់ វគ្គ៨ក្រុម ពានសម្តេចក្រឡាហោម ស ខេង

បានផុស

២ ខែ មុន

នៅ

ថ្ងៃសុក្រ ២០ ធ្នូ ២០២៤

ដោយ

ការប្រកួតបាល់ទះ ពានរង្វាន់សម្តេចក្រឡាហោម ស ខេង លើកទី៣ ឈានដល់វគ្គ៨ក្រុមចុងក្រោយហើយ បន្ទាប់ពីចប់ការប្រកួតវគ្គ១៦ក្រុមចុងក្រោយ កាលពីយប់ថ្ងៃទី១៩ ខែធ្នូ ឆ្នាំ២០២៤។

នៅវគ្គ១៦ក្រុមចុងក្រោយ ក្រុមនគរបាលខេត្តព្រះសីហនុ បានបង្កការភ្ញាក់ផ្អើលដោយបានទម្លាក់ក្រុមនគរបាលរាជធានីភ្នំពេញដោយលទ្ធផលតដៃមិចរួច ៣-០។ ចំណែកក្រុមខេត្តនគរបាលខេត្តសៀមរាប ដែលមានលីប៊ើរ៉ូឆ្នើម សេង គីមហាប់ និងអ្នកវាយផ្តាច់ល្អ ពិន សារ៉ុន បានយកឈ្នះក្រុមនគរបាលខេត្តឧត្តរមានជ័យដោយលទ្ធផល ៣-១ ខណៈក្រុមវិសាខា (B) បានអស់ឱកាសហើយ បន្ទាប់ពីចាញ់ក្រុមកងពលធំអន្តរាគមន៍លេខ៣ ដោយលទ្ធផលតឹងតែង ២-៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គូចុងក្រោយដែលបានធ្វើឲ្យអ្នកគាំទ្របុកពោះខ្លាំងគឺរវាងក្រុមនគរបាលខេត្តតាកែវ និងក្រុមនគរបាលខេត្តកំពង់ស្ពឺ។ បើកឆាកសិតទី១ ក្រុមខេត្តកំពង់ស្ពឺធ្វើបានយ៉ាងល្អដោយភាគច្រើនទប់ជាប់ពីការវាយផ្តាច់ព្រ័ត្ររបស់តារាឆ្នើម គួន ម៉ុម រហូតទទួលបានជ័យជម្នះដោយពិន្ទុ ២៥ទល់១៩។

យ៉ាងណា ចាប់ពីសិតទី២ឡើង ក្រុមនគរបាលខេត្តតាកែវបានប្តូរអ្នកប៉ះសេថ្មីចូលបានធ្វើឲ្យទម្រង់លេងល្អប្រសើរឡើងវិញ។ ពួកគេបានយកឈ្នះ៣សិតជាប់គ្នាគឺសិតទី២ពិន្ទុ ២៥-១៥, សិតទី៣ពិន្ទុ ២៥-១៤ និងសិតទី៤ពិន្ទុ ២៥-១៦។

ក្រុមខេត្តតាកែវមានកីឡាករវាយផ្តាច់ឆ្នើម៣រូបគឺ គួន ម៉ុម ដែលជាសមាជិកជម្រើសជាតិកម្ពុជា កីឡាករ ចេខ្យូ ស៊ីន ប្រធានក្រុមបាល់ទះជម្រើសជាតិម៉ាឡេស៊ី និងកីឡាករការពារកណ្តាល ផល រតនៈ របស់ក្រុមបាល់ទះជម្រើសជាតិកម្ពុជា ប៉ុន្តែពួកគេនៅស្ទើរអ្នកប៉ះសេ។

នៅវគ្គ៨ក្រុមចុងក្រោយ ក្រុមនគរបាលខេត្តតាកែវ ត្រូវប៉ះក្រុមនគរបាលខេត្តសៀមរាប ដែលក្រុមទាំងពីរសុទ្ធតែមានកីឡាករបាល់ទះជម្រើសជាតិកម្ពុជា ដូច្នេះគូនេះពិតជាគួរឲ្យចាប់អារម្មណ៍ខ្លាំង។

រឿងដែលគួរឲ្យចាប់អារម្មណ៍ទៀតនោះគឺ បញ្ជាការដ្ឋានអង្គរទាំង ក្រុម A និង ក្រុម B បានឡើងវគ្គ៨ក្រុមចុងក្រោយ។ ក្រុមទាំងពីរនេះបានទៅហ្វឹកហាត់នៅប្រទេសឥណ្ឌូណេស៊ីជាច្រើនខែ ហើយត្រឡប់មកវិញកីឡាកររីកចម្រើនស្ទើរទាំងអស់។