វិនិយោគិន​បរទេស-ខ្មែរ ១០០ នាក់ ចុះស្វែងយល់ពីវិស័យ​វិនិយោគ​អាទិភាព ៥ នៅ​ខេត្តព្រះសីហនុ

កាល​ពី​ពេលថ្មីៗនេះ វិនិយោគិន ធុរជនបរទេស-ខ្មែរ ក្នុងនិងក្រៅប្រទេសបាន​ធ្វើ​ទស្សនកិច្ចសិក្សា​ស្វែងយល់ពីសក្តានុពល​​វិនិយោគ និងធុរកិច្ច ក្នុងខេត្តព្រះសីហនុ នៅ​តាមបណ្តាក្រុមហ៊ុន និងគម្រោងវិនិយោគ​សំខាន់ៗ នៅ​តាម​វិស័យអាទិភាព​ចំនួន​ ៥។

វិនិយោគិន ធុរជនបរទេស​ខ្មែរ​ រួមទាំង​ក្រុម​សារព័ត៌មានប្រមាណ ១០០ នាក់ បាន​ធ្វើទស្សនកិច្ច​ដើម្បី​ស្វែង​យល់​ពី​សក្តានុពល​វិនិយោគ និង​ធុរកិច្ច ក្នុង​ខេត្ត​ព្រះសីហនុ នៅ​តាម​បណ្ដា​ក្រុមហ៊ុន និង​​គម្រោង​វិនិយោគ​សំខាន់ៗ នៅ​តាម​វិស័យ​អាទិភាព​ចំនួន​ ៥ ដូច​ជា​ ឧស្សាហកម្ម, ទេសចរណ៍ សណ្ឋាគារ និង បដិសណ្ឋារកិច្ច, ភស្ដុភារកម្ម និង ដឹកជញ្ជូន, ហិរញ្ញវត្ថុ, ធនាគារ, និង អចលនទ្រព្យ, និង​កសិកម្ម និង ការ​​កែច្នៃ​ម្ហូបអាហារ ។

នាឱកាសនោះអ្នក​វិនិយោគិន ធុរជន ទាំង​អស់​នោះ ក៏​បាន​ចុះ​ស្វែង​យល់​ដោយ​ផ្ទាល់​នៅទីតាំង តំបន់​សេដ្ឋកិច្ចពិសេស​ក្រុងព្រះសីហនុ, តំបន់​សេដ្ឋកិច្ច​ពិសេស​ហ្ស៊ីជាំង, ចំការ​ដូងប្រេង និង កសិដ្ឋាន​ចិញ្ចឹមជ្រូក បែប​ឧស្សាហកម្ម របស់​ក្រុមហ៊ុន​ម៉ុង​ឫទ្ធីគ្រុប, កំពង់ផែស្វយ័ត​ក្រុង​ព្រះសីហនុ, មជ្ឈមណ្ឌល​ឡូជីស្ទិក អ៊ីអន (AEON Logi Plus), សណ្ឋាគារ​​ឯករាជ្យ ដែល​ជា​គម្រោងធុរកិច្ចរបស់កាណាឌីយ៉ា អ៊ិនធើហ្គ្រេធីត គ្រុបឯ.ក., គម្រោង​​សណ្ឋាគារផ្កាយ ៥ និង អគារពាណិជ្ជកម្ម របស់​ក្រុមហ៊ុន​ផឹនីនស៊្យូឡឺ បេ អ៊ិនវេសម៉ិន ឯ.ក (Peninsula Bay Investment CO., LTD), និង ​គម្រោង បេ អហ្វ ឡៃថ៍ (Bay of Lights) របស់ក្រុមហ៊ុន ខានូភី ស៊ែន ឌីវេឡុបម៉ិន ឯ.ក (CANOPY SANDS DEVELOPMENT CO., LTD) ដោយបានស្វែង​យល់​កាន់​តែ​ច្បាស់ ពី​សក្កដានុពល​នៃការ​វិនិយោគ និង​ធុរកិច្ច នៃវិស័យសំខាន់ៗ ក្នុងខេត្តព្រះសីហនុ សម្រាប់​បច្ចុប្បន្ន និង អនាគត។

ក្រោយចុះសិក្សាដោយផ្ទាល់ពីសក្តានុពលវិនិយោគក្នុងខេត្តព្រះសីហនុរួមមក វិនិយោគិន ធុរជន មួយចំនួនបាន​បង្ហាញ​ចំណាប់អារម្មណ៍លើនីតិវិធីនៃការវិនិយោគ ក្នុងតំបន់​សេដ្ឋកិច្ចពិសេស, ការនាំចេញ-នាំចូល​តាម​កំពង់ផែស្វយ័តក្រុងព្រះសីហនុ និង ការធ្វើធុរកិច្ចនៅខេត្តព្រះសីហនុ។

ទស្សនកិច្ចសិក្សា​នេះ បាន​បង្កើត​កាលានុវត្តភាព សម្រាប់​ស្វែងរកដៃគូសហការ និង ការ​ផ្សព្វផ្សាយ​អំពី​បរិយាកាសធុរកិច្ចនៅកម្ពុជា ទៅកាន់សមាគមន៍ធុរកិច្ច និង វិនិយោគបរទេស ព្រមទាំង​លើកកម្ពស់មុខមាត់​កម្ពុជា​លើឆាកអន្តរជាតិ ពិសេសនៅខេត្តព្រះសីហនុ ថែមទៀតផង ។

ការរៀបចំ «វេទិកាទាក់ទាញវិនិយោគមកក្នុងខេត្តព្រះសីហនុ» នេះ គឺស្ថិតក្នុងក្របខ័ណ្ឌនៃ កម្មវិធីពិសេសជំរុញការវិនិយោគក្នុងខេត្តព្រះសីហនុ ដែលជាគំនិតផ្ដួចផ្ដើម​របស់​ សម្ដេច​ធិបតី ហ៊ុន ម៉ាណែត នាយករដ្ឋមន្ត្រី​កម្ពុជា សំដៅជំរុញសកម្មភាពសេដ្ឋកិច្ចនៅក្នុងខេត្តព្រះសីហនុ តាមរយៈ ការជំរុញ និង ទាក់ទាញ​ការវិនិយោគ, ការអភិវឌ្ឍឧស្សាហកម្ម, ការស្តារកំណើនសេដ្ឋកិច្ច និង បំពេញបន្ថែមលើយុទ្ធសាស្រ្ត និង គោលនយោបាយ​នានា​របស់រាជរដ្ឋាភិបាល តាមរយៈការដាក់ចេញនូវវិធានការ និង យន្តការ​ដែលមាន​លក្ខណៈ​ជា​កញ្ចប់, ប្រទាក់ប្រឡា, មុតស្រួច, និងសាមញ្ញ៕