ព័ត៌មានជាតិ

អភិបាលស្រុកស្ទឹងហាវបញ្ជាឲ្យអ្នកលួចចាក់ដីចូលសមុទ្រត្រូវកាយចេញវិញជាបន្ទាន់

បានផុស

៤ years មុន

នៅ

ថ្ងៃអង្គារ ១៦ មីនា ២០២១

ដោយ

លោក ឆាយ សុគន្ធដា អភិបាលនៃគណៈអភិបាលស្រុកស្ទឹងហាវ ខេត្តព្រះសីហនុ បានបញ្ជាឲ្យប្រជាពលរដ្ឋដែលបានលួចចាក់ដីចូលក្នុងសមុទ្រក្នុងទីតាំងមុខក្រុមហ៊ុនកម្ពុជាតេលា ឋិតនៅក្នុងភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ត្រូវកាយចេញវិញជាបន្ទាន់ដើម្បីចៀសវាងការប្រឈមនឹងផ្លូវច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឆាយ សុគន្ធដា បានឲ្យដឹងនៅក្នុងសេចក្តីជូនដំណឹងចេញផ្សាយកាលពីថ្ងៃទី១៥មីនាថា«រដ្ឋបាលស្រុកស្ទឹងហាវសូមជូនដំណឹងដល់លោក លោកស្រី ដែលបានលួចធ្វើសកម្មភាពចាក់ដីចូលសមុទ្រនៅពេលយប់កន្លងមកនេះថា ដីចំណីឆ្នេរសមុទ្រត្រូវបានចាត់ជាដីសាធារណៈរបស់រដ្ឋនឹងត្រូវហាមឃាត់រាល់ការកាន់កាប់ឬសាងសង់សំណង់នានាហើយបានកំណត់ទុកជាតំបន់សម្រាប់ប្រើប្រាស់ជាប្រយោជន៍សាធារណៈ។ ការអនុញ្ញាតក្នុងការប្រើប្រាស់ដីចំណីសមុទ្រត្រូវបានអនុវត្តតាមប្លង់គោលប្រើប្រាស់ដីនិងផែនការប្រើប្រាស់ដីរបស់ក្រសួងដែនដីនគរូបនីយកម្មនិងសំណង់ដែលមានសេចក្តីលំអិតសម្រាប់អនុវត្ត និងបទប្បញ្ញត្តិជាធរមានដើម្បីធានាសុវត្ថិភាពសាធារណៈសង្គមនិងបរិស្ថាន»។

លោកអភិបាលស្រុកបានបន្តថា ដូចនេះរដ្ឋបាលស្រុកតម្រូវឲ្យលោក លោកស្រី ដែលជាអ្នកចាក់ដីចូលសមុទ្រទីតាំងទល់មុខក្រុមហ៊ុនតេលាធ្វើការកាយចេញវិញជាបន្ទាន់និងចេញមុខមកដោះស្រាយជាមួយរដ្ឋបាលស្រុកបើពុំនោះទេ រដ្ឋបាលស្រុកនឹងចាត់វិធានការកាយដីនេះចេញនិងបន្តស្វែងរកអ្នកដែលបានចាក់ដីចូលសមុទ្រដើម្បីមានវិធានការតាមផ្លូវច្បាប់៕

អត្ថបទ ៖ សំអឿន

Related Topics:ខេត្តព្រះសីហនុ