ព័ត៌មានជាតិ

កម្មវិធីពិសេសជំរុញការវិនិយោគខេត្តព្រះសីហនុ ផ្ដោតលើគម្រោងអាទិភាពធំៗចំនួន ៤

បានផុស

៣ ខែ មុន

នៅ

ថ្ងៃចន្ទ ២៣ ធ្នូ ២០២៤

ដោយ

រាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចប្រកាសដាក់ឱ្យអនុវត្ត «កម្មវិធីពិសេសជំរុញការវិនិយោគក្នុងខេត្តព្រះសីហនុ» ដែលអនុវត្តចំពោះគម្រោងវិនិយោគ ឬសកម្មភាពធុរកិច្ចមានទីតាំងស្ថិតនៅខេត្តព្រះសីហនុ ដោយកម្មវិធីនេះផ្តោតលើគម្រោងអាទិភាពធំៗចំនួន ៤ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមឯកសារស្តីពី «វេទិកាវិនិយោគក្នុងខេត្តព្រះសីហនុ» ដែលរៀបរៀងដោយក្រសួងសេដ្ឋកិច្ច និងរដ្ឋបាលខេត្តព្រះសីហនុ បានឱ្យដឹងថា «កម្មវិធីពិសេសជំរុញការវិនិយោគក្នុងខេត្តព្រះសីហនុ» បានប្រកាសដាក់ឱ្យប្រើប្រាស់កាលពីថ្ងៃខែមករា ឆ្នាំ២០២៤ ក្រោមអធិបតីភាពសម្តេចនាយករដ្ឋមន្ត្រី ហ៊ុន ម៉ាណែត ដោយបានកំណត់វិធានការ និងយន្តការដែលមានលក្ខណៈជាកញ្ចប់ ប្រទាក់ក្រឡា មុតស្រួច និងសាមញ្ញ។

វិធានការគន្លឹះៗ ក្នុងកម្មវិធីពិសេសនេះ មានភាពប្រទាក់ក្រឡាគ្នា និងឆ្លើយតបទៅនឹងស្ថានភាពនិងតម្រូវការជាក់ស្តែងចំពោះមុខរបស់ខេត្តព្រះសីហនុ ក្នុងគោលដៅជំរុញការវិនិយោគ ការអភិវឌ្ឍឧស្សាហកម្ម ការស្តារកំណើនសេដ្ឋកិច្ច និងការបំពេញបន្ថែមលើយុទ្ធសាស្ត្រ និងគោលនយោបាយនានារបស់រាជរដ្ឋាភិបាល ជាពិសេសការអនុវត្តផែនការមេដើម្បីប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង។

ជាក់ស្តែង «កម្មវិធីពិសេសជំរុញការវិនិយោគក្នុងខេត្តព្រះសីហនុ» ត្រូវអនុវត្តចំពោះគម្រោងវិនិយោគ ឬសកម្មភាពធុរកិច្ចដែលមានទីតាំងនៅខេត្តព្រះសីហនុ និងផ្តោតលើគម្រោងធំៗចំនួន ៤ ដូចជា៖

១.គម្រោងវិនិយោគ ឬ សកម្មភាពធុរកិច្ចពាក់ព័ន្ធនឹងអគារជាប់គាំង, ២.គម្រោងវិនិយោគ ឬសកម្មភាពធុរកិច្ចមិនជាប់ពាក់ព័ន្ធនឹងអគារជាប់គាំង ចាប់ផ្តើមអនុវត្តនៅឆ្នាំ ២០២៤, ៣.ការពង្រីកគម្រោងវិនិយោគ ឬសកម្មភាពធុរកិច្ចមានស្រាប់ និងទី៤ គម្រោងវិនិយោគ/ធុរកិច្ចដែលមានស្រាប់ (ថ្មី)។

កន្លងមករាជរដ្ឋាភិបាលបានដាក់ចេញវិធានការជាកញ្ចប់ ដើម្បីដោះស្រាយគម្រោងវិនិយោគជាប់គាំងនៅខេត្តព្រះសីហនុ ពោលគឺគម្រោងវិនិយោគដែលបានសាងសង់ហើយបានផ្អាក ពន្យារ និងពុំមានសកម្មភាពវិនិយោគ ឬសកម្មភាពធុរកិច្ចនៅក្នុងខេត្តព្រះសីហនុ ចាប់ពីឆ្នាំ២០១៦។ ផ្អែកតាមបទពិសោធន៍ក្នុងការអនុវត្តវិធានការទាំងនេះ បានផ្តល់សញ្ញាវិជ្ជមាន និងបង្កើនជំនឿទុកចិត្តដល់វិនិយោគ៕

Related Topics:ខេត្តព្រះសីហនុ