អាជ្ញាធរខេត្តមណ្ឌលគិរី គ្រោងដាក់ពង្រាយធុងសំរាមបន្ថែមទៀតតាមរមណីយដ្ឋាន និងតំបន់ប្រជុំជនក្នុងក្រុងសែនមនោរម្យ

ខេត្តមណ្ឌលគិរី គឺជាខេត្តដែលពោរពេញទៅដោយសក្តានុពលខ្លាំងលើវិស័យផ្នែកទេសចរណ៍ ប៉ុន្តែ បញ្ហាសំរាមក៏នៅតែជាបញ្ហាប្រឈមមួយដែលធ្វើឱ្យប៉ះពាល់សោភ័ណភាពខេត្តផងដែរ។ ចំពោះបញ្ហានេះ អាជ្ញាធរខេត្ត បានអះអាងថា នឹងដាក់ពង្រាយធុងសំរាមបន្ថែមទៀតនៅតាមរមណីយដ្ឋាន និងតំបន់ប្រជុំជន ក្នុងក្រុងសែនមនោរម្យ ដើម្បីឱ្យពលរដ្ឋ និងអ្នកទេសចរដាក់ទុកសំរាមបានត្រឹមត្រូវ។

កន្លងទៅ អាជ្ញាធរខេត្តមណ្ឌលគិរី បានចុះណែនាំដល់មូលដ្ឋានប្រជាពលរដ្ឋពាក់ព័ន្ធនឹងបញ្ហាសំរាម កុំឱ្យបោះចោលពាសវាលពាសកាល គឺត្រូវដាក់ចូលក្នុងធុងសំរាមដែលរដ្ឋបាលខេត្ដបានដាក់ពង្រាយតាមដងផ្លូវសាធារណៈ ក៏ដូចជា ទីប្រជុំជនជុំវិញបរិវេណផ្សារសែនមនោរម្យ។ ប៉ុន្តែ ការដាក់ពង្រាយធុងសំរាមនោះហាក់មិនទាន់បានគ្រប់ច្រកល្ហក កន្លែងទីប្រជុំជនគ្រប់គ្រាន់នៅឡើយទេ។ ដូច្នេះហើយ ប្រជាពលរដ្ឋនៅក្រុងសែនមនោរម្យ បានអំពាវនាវឱ្យអាជ្ញាធរខេត្ត ដាក់ធុងសំរាមពង្រាយតាមទីសាធារណៈ ឬតាមទីប្រជុំជនមួយចំនួនបន្ថែមទៀត ដើម្បីសោភ័ណភាពក្រុង បរិស្ថានស្អាត ទីក្រុងស្អាត សុខភាពល្អ ហើយទាក់ទាញភ្ញៀវទេសចរឱ្យមកលេងកម្សាន្តនៅខេត្តមណ្ឌលគិរី ច្រើនជាងមុនបន្ថែមទៀត។

ឆ្លើយតបនឹងបញ្ហានេះ លោក នាង វណ្ណៈ អ្នកនាំពាក្យសាលាខេត្តមណ្ឌលគិរី បានប្រាប់ កម្ពុជាថ្មី ថា ដោយមានការចង្អុលបង្ហាញយកចិត្តទុកដាក់ពីអភិបាលខេត្ត មន្ត្រីពាក់ព័ន្ធខេត្ត ជាពិសេសមន្ទីរបរិស្ថាន និងមន្ទីរទេសចរណ៍ តែងតែយកចិត្តទុកដាក់ខ្ពស់លើបញ្ហាសំរាម។ កន្លងមក អាជ្ញាធរខេត្ត ក៏បានផ្សព្វផ្សាយទៅដល់គ្រប់ភាគីពាក់ព័ន្ធនៅតាមមូលដ្ឋាន ហើយដាក់ពង្រាយធុងសំរាមនៅទីសាធារណៈក្នុងក្រុងសែនមនោរម្យ ជាពិសេស រមណីយដ្ឋានធំៗមួយចំនួនដែលអ្នកទេសចរសម្រុកទៅ។

ជាមួយគ្នានេះ លោកក៏បានបញ្ជាក់ឱ្យដឹងថា ខេត្តក៏មានផែនការចង្អុលបង្ហាញឱ្យមន្ត្រី ក្រុង សង្កាត់ ស្រុក ជាពិសេស មន្ទីរបរិស្ថាននិងមន្ទីរទេសចរណ៍ ត្រូវតែរកមើលកន្លែងណាគួរបន្ថែមធុងសំរាម ជាពិសេស តាមរមណីយដ្ឋានដាច់ស្រយាលដែលខេត្តមិនទាន់បានដាក់ធុងសំរាមនាពេលកន្លងមក៕

ដោយ ៖រៀម សុខហេង