មន្ត្រីចុះបង្រ្កាបបទល្មើស និងផ្សព្វផ្សាយស្តីពីច្បាប់ជលផលនៅ​ខេត្ត​ចំនួន៤

លោក ប៉ែន ផល្លីកា អនុរដ្ឋលេខា​ធិការ​ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២០-២១ ខែធ្នូ ឆ្នាំ២០២៤ បាន​ដឹកនាំ​កម្លាំង​អន្តរាគមន៍ថ្នាក់ជាតិទប់ស្កាត់ និងបង្រ្កាបបទល្មើស​ជលផល​បឹង​ទន្លេ​សាប ដោយប្រើប្រាស់កម្លាំង៣៨នាក់ និងមធ្យោបាយ​កាណូត៨​គ្រឿង ចុះបង្ក្រាបបទល្មើសនៅខេត្តកំពង់ឆ្នាំង ពោធិ៍សាត់ បាត់ដំបង និង​ខេត្តកំពង់ធំ។

វត្ថុតាងដែលក្រុមការងារចម្រុះបានរុះរើកាប់បំផ្លាញឧបករណ៍នេសាទល្មើស​ច្បាប់នៅក្នុងខេត្តទាំងនោះ រួមមាន៖ ចំណុច​ឃុំកោះជីវាំង ស្រុកឯកភ្នំ ខេត្តបាត់ដំបង បានរុះរើកាប់បំផ្លាញឧបករណ៍នេសាទល្មើសច្បាប់ បាន២​ករណី សាច់​មង ១៥៥០​ម៉ែត្រ បង្គោល២៧០ដើម ឡុកចាប់ត្រី៦​គ្រឿង និង​បានលែងកូនត្រីចម្រុះ៤០គីឡូក្រាមចូល​ក្នុងដែនបឹងធម្មជាតិវិញ។

ចំណុចគន្លងតាពត ស្ថិតក្នុងភូមិទី៥ ឃុំកំពង់លួង ស្រុកក្រគរ​ខេត្ដ​ពោធិ៍សាត់ ប្រទះឃើញជនសង្ស័យ០១នាក់ កំពុងធ្វើសកម្មភាពនេសាទ​ដោយ​​ឧបករណ៍ឈ្នក់ ក្រឡាក្រោម១,៥សម រួមផ្សំនុយ សមត្ថកិច្ចចម្រុះ​បានឃាត់ខ្លួនជនសង្ស័យបញ្ជូនមក ស្នាក់ការសង្កាត់រដ្ឋបាលជលផល​កំពង់​លួង ដើម្បីកសាងសំណុំរឿងបញ្ជូនទៅតុលាការតាមនីតិវិធី​ច្បាប់ស្ដី​ពីជលផល។

រីឯចំណុច ជ្រោយវែង ចុងអូរ បឹងក្បាលព្រោះ ដងទង់ សាមពាង រហូត​ដល់​​វត្តកំពង់ចំលង ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ បង្រ្កាប​បានរួមមាន៖ របាំងសាច់អួនចំនួន០៧ ខ្សែប្រវែង២៤៥០ម៉ែត្រ លបសាច់អួន ចំនួន១៤មាត់ បង្គោលចំនួន២៧០ដើម និងបានលែង​ត្រីចម្រុះ​​ចំនួន២៣គីឡូក្រាម ចូលក្នុងដែនបឹងធម្មជាតិវិញ។

ទន្ទឹមនឹងនេះ ប្រជានេសាទមានការសប្បាយរីករាយ និងថ្លែងអំណរគុណ​ដល់ថ្នាក់ដឹកនាំ ក្រសួងកសិកម្ម សមត្ថកិច្ចពាក់ព័ន្ធ ជាពិសេសមត្ថកិច្ចជលផលគ្រប់ជាន់ថ្នាក់ និងក្រុមអន្តរាគមន៍ថ្នាក់ជាតិ ដែលបានខិតខំបំពេញកិច្ចការងារបង្រ្កាបបទល្មើសជាប្រចាំ៕