រដ្ឋមន្ត្រីណែនាំបង្កើនការយកចិត្តទុកដាក់ការផ្តល់សេវាដល់ស្រ្តី កុមារអ្នកប្រើប្រាស់មូលនិធិសមធម៌និង ប ស ស

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានណែនាំដល់មន្ត្រីសុខាភិបាល និងគ្រូពេទ្យសូមបង្កើនការយកចិត្តទុកដាក់ខ្ពស់ ទៅលើការផ្តល់សេវាថែទាំសុខភាពដល់ស្រ្តី កុមារ អ្នកប្រើប្រាស់មូលនិធិសមធម៌ និង​ប.ស.ស.ដើម្បីទាញភាពការជឿទុកចិត្តពីប្រជាពលរដ្ឋមកលើសេវាសុខាភិបាលឱ្យកាន់តែល្អប្រសើរ។

នៅក្នុងកិច្ចប្រជុំកម្រិតថ្នាក់ដឹកនាំលើកទី២ នៃខែធ្នូ ដើម្បីពិនិត្យវឌ្ឍនភាពការងារ និងលើកទិសដៅការងារបន្តកាលពីរសៀលថ្ងៃទី២៣ធ្នូ នៅទីស្តីការក្រសួង លោករដ្ឋមន្ត្រីបានណែនាំដល់ថ្នាក់ដឹកនាំមន្ទីរពេទ្យ និងមន្ទីរសុខាភិបាលរាជធានី ខេត្ត សូមបង្កើនការយកចិត្តទុកបន្ថែមទៀតក្នុងការពង្រឹងសេវាសុខាភិបាលសាធារណៈ ជាពិសេសសេវាឯកជនក្នុងមូលដ្ឋានរបស់ខ្លួន។ លើសពីនេះថ្នាក់ដឹកនាំអង្គភាពទាំងអស់ត្រូវធ្វើការចុះពិនិត្យឱ្យបានជាប់ជាប្រចាំថ្ងៃស្វែងយល់ពីការបំពេញភារកិច្ចរបស់បុគ្គលិកគ្រប់ស្ថានភាពទាំងពេលថ្ងៃ និងពេលប្រចាំការពេលយប់។

លោករដ្ឋមន្ត្រីបានបន្តថា «សូមបង្កើនការយកចិត្តទុកដាក់ខ្ពស់ទៅលើការផ្តល់សេវាថែទាំសុខភាពដល់ស្រ្តី កុមារ ជាពិសេសអ្នកខ្វះខាត និងអ្នកដាច់ស្រយោល និងបង្កើនការយកចិត្តទុកដាក់ខ្ពស់លើអ្នកប្រើប្រាស់មូលនិធិសមធម៌ និង ប.ស.ស»។

ជាមួយគ្នានេះដែរ លោករដ្ឋមន្រ្តី បានផ្តល់អនុសាសន៍គន្លឹះសំខាន់ៗមួយចំនួនដល់ថ្នាក់ដឹកនាំ និងមន្ត្រីដោយត្រូវផ្តោតសំខាន់លើគុណភាពសេវាបឋមគុណភាពសេវាផ្តល់ជូន ដោយត្រូវបង្កើនគុណភាពសេវាបន្ថែមទៀតដើម្បីទាញឱ្យមានការជឿទុកចិត្តពីប្រជាពលរដ្ឋនឹងការព្យាបាលជាពិសេសណែនាំដល់ផ្នែកថែទាំត្រូវផ្តល់ការថែទាំអ្នកជំងឺលាងសម្អាតខ្លួនឱ្យកាន់តែល្អប្រសើរ។ ក្នុងនោះត្រូវពិនិត្យឱ្យបានគ្រប់ជ្រុងជ្រោយ នូវការបែងចែកឱសថដល់មូលដ្ឋានសុខាភិបាល ដើម្បីធានាសមស្របតាមតំរូវការប្រើប្រាស់៕

អត្ថបទ៖ សំអឿន