ព័ត៌មានជាតិ

អាជ្ញាធរមូលដ្ឋាន នៅតែបន្តយកចិត្តទុកដាក់ផ្ដល់សេវាសាធារណៈជូនពលរដ្ឋ លឿន រហ័ស

បានផុស

៣ ខែ មុន

នៅ

ថ្ងៃអង្គារ ២៤ ធ្នូ ២០២៤

ដោយ

អាជ្ញាធរខណ្ឌសែនសុខ នៅតែបន្តផ្ដល់សេវាសាធារណៈជូនប្រជាពលរដ្ឋ លឿន រហ័ស ក្រោមការយកចិត្តទុកដាក់ពី លោក ឃួង ស្រេង អភិបាលរាជធានីភ្នំពេញ ដែលតែងតែជំរុញ និងក្រើនរំលឹកដល់អាជ្ញាធរមូលដ្ឋានទាំង ១៤ ខណ្ឌ ឲ្យបម្រើសេវាសាធារណៈក្នុងមូលដ្ឋានបានល្អប្រសើរ ជាពិសេសការបញ្ជាក់លិខិតបទដ្ឋានគតិយុត្តិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងមូលដ្ឋានខណ្ឌសែនសុខ ដែលមាន លោក ម៉ូវ ម៉ានិត អភិបាល នៃគណៈអភិបាលខណ្ឌ បានទទួលការណែនាំពីរដ្ឋបាលរាជធានីភ្នំពេញ ក៏បានជំរុញដល់មន្ត្រីជំនាញ នៃច្រកចេញចូលតែមួយរបស់រដ្ឋបាលខណ្ឌឲ្យយកចិត្តទុកដាក់បម្រើសេវាសាធារណៈជូនប្រជាពលរដ្ឋ រៀងរាល់ម៉ោងធ្វើការត្រូវមានមន្ត្រីប្រចាំការ ទទួលយកឯកសារនានា ដែលប្រជាពលរដ្ឋមកទទួលយកសេវាសាធារណៈ។

ជាមួយការទទួលយកសេវាសាធារណៈនេះ ប្រជាពលរដ្ឋក្នុងមូលដ្ឋានខណ្ឌសែនសុខទាំងមូល បានសម្ដែងក្តីសប្បាយរីករាយ ប្រកបដោយស្នាមញញឹម ខណៈមន្ត្រីនៅច្រកចេញចូលតែមួយរបស់រដ្ឋបាលខណ្ឌសែនសុខបម្រើប្រជាពលរដ្ឋដោយយកចិត្តទុកដាក់ លឿន ទាន់ពេលវេលា ប្រកបដោយសុជីវធម៌ រួសរាយរាក់ទាក់។

ក្នុងនាម អាជ្ញាធរ រដ្ឋបាលខណ្ឌ ក៏ដូចជាមន្ត្រីជំនាញ នៃច្រកចេញចូលតែមួយ ខណ្ឌសែនសុខ ក៏បានអំពាវនាវដល់ប្រជាពលរដ្ឋ តម្រូវមកទទួលសេវានៅច្រកចេញចូលតែមួយដោយខ្លួនឯង កុំពឹងពាក់តាមរយៈខ្សែបណ្ដាញផ្សេងៗ អាចមានកម្រៃសេវាលើសពីចំនួនកំណត់ និងមានការយឺតយ៉ាវផងដែរ៕

អត្ថបទ ៖ សំណាង