ក្រសួងចំនួន២ ដាក់ឱ្យប្រើប្រាស់ឯកសារ ណែនាំកន្លែងផ្តល់សេវាចម្រុះឆ្លើយតបជនរងគ្រោះដោយអំពើហិង្សាទាក់ទងនឹងយេនឌ័រ

ក្រសួងកិច្ចការនារី និងក្រសួងក្រសួងសុខាភិបាល ដោយមានការគាំទ្រពីមូលនិធិសហប្រជាជាតិសម្រាប់ប្រជាជន(UNFPA) តាមរយៈកម្មវិធីACCESS 2 របស់រដ្ឋាភិបាលអូស្រ្តាលី និងអង្គការដៃគូពាក់ព័ន្ធមួយចំនួន បានធ្វើពិធីប្រកាសដាក់ឱ្យប្រើប្រាស់ជាផ្លូវការនូវឯកសារ “គោលការណ៍ណែនាំ ស្តីពីការរៀបចំកន្លែងផ្តល់សេវាចម្រុះឆ្លើយតបចំពោះជនរងគ្រោះដោយអំពើហិង្សាទាក់ទងនឹងយេនឌ័រ”។

ពិធីនេះធ្វើឡើង ក្រោមអធិបតីភាពដ៏ខ្ពង់ខ្ពស់ លោកស្រី អ៊ឹង កន្ថាផាវី រដ្ឋមន្រ្ដីក្រសួងកិច្ចការនារី នៅសណ្ឋាគារ សាន់&មូន រីវើសាយ (SUN and Moon Riverside Hotel) នាថ្ងៃទី២៣ ខែធ្នូ ឆ្នាំ២០២៤។

ពិធីប្រកាសដាក់ឱ្យប្រើប្រាស់ជាផ្លូវការនេះ មានគោលបំណង ដើម្បីផ្សព្វផ្សាយ ដាក់ឱ្យប្រើប្រាស់ និងអនុវត្តគោលការណ៍ណែនាំអំពីការរៀបចំកន្លែងផ្តល់សេវាចម្រុះឆ្លើយតបចំពោះជនរងគ្រោះដោយអំពើហិង្សាទាក់ទងនឹងយេនឌ័រ ដល់ក្រសួង ស្ថាប័នពាក់ព័ន្ធទាំងនៅថ្នាក់ជាតិ និងថ្នាក់ក្រោមជាតិ អង្គការដៃគូ សង្គមស៊ីវិល និងសាធារណជនទូទៅ។

កន្លែងផ្តល់សេវាចម្រុះឆ្លើយតបចំពោះជនរងគ្រោះដោយអំពើហិង្សាទាក់ទងនឹងយេនឌ័រ OSSU គឺជាកន្លែងដ៏មានសារសំខាន់ក្នុងការផ្តល់សេវាជាអាទិភាព ដូចជាសេវាសុខភាព សេវាផ្នែកច្បាប់ សេវាផ្លូវចិត្ត និងជំរកសុវត្ថិភាព ជូនដល់ជនរងគ្រោះដោយអំពើហិង្សាទាក់ទងនឹងយេនឌ័រ ប្រកបដោយសុវត្ថិភាព ភាពទុកចិត្ត និងទាន់ពេលវេលា៕