រដ្ឋមន្ត្រីជំរុញមន្ទីរពេទ្យថ្នាក់ជាតិទាំងអស់រួមគ្នាលើកកម្ពស់ការផ្តល់សេវាជូនអ្នកជំងឺប្រកបដោយប្រសិទ្ធភាពខ្ពស់

លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលបានជំរុញឱ្យថ្នាក់ដឹកនាំ និងមន្ត្រីរាជការមន្ទីរពេទ្យថ្នាក់ជាតិ
ទាំងអស់ត្រូវយកចិត្តទុកដាក់សហការគ្នាដើម្បីលើកកម្ពស់ការផ្តល់សេវាជូនអ្នកជំងឺប្រកបដោយគុណភាព និងប្រសិទ្ធភាពខ្ពស់។

ក្នុងឱកាសអញ្ជើញធ្វើបាឋកថា ស្តីពី «ភាពជាអ្នកដឹកនាំនិងកិច្ចសហការរបស់ថ្នាក់ដឹកនាំ មន្រ្តីរាជការបុគ្គលិកមន្ទីរពេទ្យថ្នាក់ជាតិ» កាលពីរសៀលថ្ងៃទី២៥ធ្នូ លោករដ្ឋមន្ត្រីបានលើកឡើងពីចំណុចសំខាន់ៗដែលពាក់ព័ន្ធនឹងប្រសិទ្ធភាពនៃការបម្រើសេវាព្យាបាលជូនអ្នកជំងឺឱ្យមានប្រសិទ្ធភាពដោយត្រូវធ្វើការសហការគ្នាគ្រប់ផ្នែក រវាងមន្ទីរពេទ្យ និងមន្ទីរពេទ្យ
ក្នុងនោះត្រូវធ្វើការខិតខំក្នុងការសង្រ្គោះនៅនឹងកន្លែងអោយបានគ្រប់ជ្រុងជ្រោយដោយក្រុមការងារពហុជំនាញ និងឯកទេស មុននឹងពិចារណាបញ្ជូនបន្ត និងដោយទាន់ពេលវេលា ជាមួយទំនាក់ទំនងបន្តឥតដាច់ពីមូលដ្ឋានសុខាភិបាលមួយទៅមូលដ្ឋានសុខាភិបាលមួយទៀត។

ជាមួយគ្នានេះដែរលោករដ្ឋមន្រ្តីបានគូសរំលេចប្រសាសន៍សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីដែលលោកបានសង្កត់ធ្ងន់លើសារៈសំខាន់នៃការទទួលខុសត្រូវពីដើមដល់ចប់លើការបញ្ជូនអ្នកជំងឺពីមូលដ្ឋានឯកជន មកសាធារណៈ និងការខិតខំព្យាបាលអ្នកជំងឺដោយប្រើអស់សមត្ថភាពនៅហ្នឹងកន្លែងនីមួយៗ។

លោករដ្ឋមន្ត្រីបានលើកឡើងជាអនុសាសន៍គន្លឹះៗ ដល់ថ្នាក់ដឹកនាំមន្ទីរពេទ្យជាតិដោយត្រូវអនុវត្តឱ្យបានកាន់តែប្រសើរ និងកាន់តែល្អបំផុត ក្នុងនាមជាអ្នកដឹកនាំ គឺត្រូវតែជាគំរូលើគ្រប់ទិដ្ឋភាព ទាំងការដឹកនាំលើស្មារតី បច្ចេកទេស រដ្ឋបាលនិងគ្រប់គ្រងទូទៅជារួម។ ដើម្បីកាន់តែធ្វើឲ្យប្រសើរឡើងនូវសមត្ថភាពជាអ្នកដឹកនាំអ្នកដឹកនាំមិនត្រូវលាយឡំបុគ្គលភាព
ជាមួយភាពជាអ្នកដឹកនាំទទួលខុសត្រូវចំពោះមុខអង្គភាពនោះទេ។

លោករដ្ឋមន្រ្តី មានជំនឿជាក់ថា ថ្នាក់ដឹកនាំ មន្រ្តីរាជការ និងបុគ្គលិកសុខាភិបាលទាំងអស់មានភាពស្មោះត្រង់ ស្មារតីទទួលខុសត្រូវសុចរិតភាពពីបេះដូង លើការងារដឹកនាំ លើការសម្រេចចិត្តកិច្ចការទំនាក់ទំនងគ្នាដោយការគោរព សំដៅលទ្ធផលពិតប្រាកដដែលជាប្រយោជន៍រួម ប្រយោជន៍សាធារណៈ ដែលនោះកាន់តែពង្រឹងទំនុកចិត្ត និងស្មារតីប្រកបដោយគុណធម៌ មេត្តា ករុណាដល់គ្រប់ៗគ្នានៃអង្គភាពទាំងអស់ក្នុងវិស័យសុខាភិបាល៕

អត្ថបទ៖ សំអឿន