វិទ្យាល័យតេជោសៀមប៉ាង ខេត្តស្ទឹងត្រែង រៀបចំពិព័រណ៍មគ្គុទ្ទេសក៍អាជីព និងការសិក្សា ដើម្បីតម្រង់ទិសសិស្ស

វិទ្យាល័យតេជោសៀមប៉ាង ស្ថិតនៅខេត្តស្ទឹងត្រែង បានរៀបចំការពិព័រណ៍មគ្គុទ្ទេសក៍អាជីព និងការសិក្សា នៅថ្ងៃទី២៥ ខែធ្នូ ឆ្នាំ២០២៤ ដើម្បីតម្រង់ទិសសិស្សមានឱកាសបានជួបជាមួយស្ថាប័នរដ្ឋ និងឯកជន អាចឱ្យពួកគេសិក្សាស្វែងយល់បានច្រើន ការពិភាក្សានានាដើម្បីងាយស្រួលក្នុងការសម្រេចចិត្តរើសជំនាញសិក្សារបស់ខ្លួន។ នេះបើតាមការផ្សាយរបស់ក្រសួងអប់រំ យុវជន និងកីឡា លើបណ្តាញសង្គមហ្វេសប៊ុក។

បើតាមក្រសួងអប់រំ លោកបណ្ឌិត សំអោ អង្គារតន៍ អគ្គនាយករងគោលនយោបាយនិងផែនការ នៃក្រសួងអប់រំ យុវជន និងកីឡា បានលើកឡើងថា គោលបំណងនៃការរៀបចំពិព័រណ៍នេះ គឺជាព្រឹត្តិការណ៍អប់រំតម្រង់ទិសវិជ្ជាជីវៈ ដល់សិស្សានុសិស្សតាមរយៈការបង្កលក្ខណៈជួបគ្នាដោយផ្ទាល់ជាមួយតំណាងក្រុមហ៊ុន ស្ថាប័នរដ្ឋ និងឯកជន ដើម្បីផ្ដល់ឱកាសដល់សិស្ស បានសិក្សាស្វែងយល់អំពីតម្រូវការជំនាញ និងការត្រៀមលក្ខណៈសម្បត្តិផ្ទាល់ខ្លួនបានច្បាស់លាស់ មុននឹងសម្រេចចិត្តជ្រើសរើសមុខជំនាញសិក្សា និងការរៀបចំផែនការសិក្សា នាពេលខាងមុខ។ ជាមួយគ្នានេះ កម្មវិធីពិព័រណ៍នៅកម្រិតសាលារៀន ក៏ជាផ្នែកមួយនៃការអនុវត្តស្ដង់ដាសាលារៀនគំរូ ដែលក្រសួងអប់រំ បាននិងកំពុងផ្ដោតការយកចិត្តទុកដាក់ ក្នុងការជំរុញការអនុវត្តនៅកម្រិតសាលារៀនផងដែរ។

នាយកដ្ឋានតម្រង់ទិសវិជ្ជាជីវៈ ក្រោមការគាំទ្ររបស់អង្គការភ្លែនអន្ដរជាតិកម្ពុជា បានរៀបចំ “ពិព័រណ៍មគ្គុទ្ទេសក៍អាជីព និងការសិក្សា” នៅវិទ្យាល័យតេជោសៀមប៉ាង ខេត្តស្ទឹងត្រែង នេះឡើង ដោយមានការចូលរួមដាក់ស្ដង់បញ្ជរផ្សព្វផ្សាយពីសំណាក់ស្ថាប័នដៃគូចំនួន ៥ស្ថាប័ន និងបញ្ជរស្ដង់ស្នាដៃសិស្សចំនួន ១២។ ជាមួយគ្នានេះ ក៏មានការចូលរួមពីសិស្សានុសិស្ស គណៈគ្រប់គ្រង រួមទាំងអាណាព្យាបាល និងភាគីពាក់ព័ន្ធផ្សេងទៀតជាង ១,១០០នាក់ ស្រី ៥៦០នាក់។

ចំពោះ លោក ផាន់ យុត អភិបាលស្រុកសៀមប៉ាង បានលើកទឹកចិត្តមាតាបិតាសិស្សានុសិស្សទាំងអស់ ឱ្យមានការចូលរួមជំរុញការសិក្សារបស់កូនៗឱ្យទទួលបានលទ្ធផលកាន់តែល្អប្រសើរ ដើម្បីក្លាយជាធនធានកម្លាំងពលកម្មដ៏មានសក្ដានុពលរបស់កម្ពុជា។

ក្រសួងអប់រំបញ្ជាក់ថា ឆ្នាំសិក្សា២០២៤-២០២៥ អង្គការភ្លែនអន្ដរជាតិកម្ពុជា បានផ្ដល់ការគាំទ្រដល់នាយកដ្ឋានតម្រង់ទិសវិជ្ជាជីវៈ ក្នុងការរៀបចំព្រឹត្តិការណ៍់ពិព័រណ៍មគ្គុទ្ទេសក៍អាជីព និងការផ្ដល់ប្រឹក្សា នៅតាមគ្រឹះស្ថានមធ្យមសិក្សាគោលដៅសរុបចំនួន ១៨សាលារៀន ដែលស្ថិតក្នុងខេត្តសៀមរាប ខេត្តស្ទឹងត្រែង និងខេត្តរតនគិរី។ វិទ្យាល័យតេជោសៀមប៉ាង ជាគោលដៅទី១ ក្នុងខេត្តស្ទឹងត្រែង ដែលត្រូវទទួលការគាំទ្រក្នុងការរៀបចំព្រឹត្តិការណ៍ពិព័រណ៍ក្នុងឆ្នាំសិក្សាថ្មីនេះ៕