អាជ្ញាធរជាតិប្រយុទ្ធប្រឆាំងគ្រឿងញៀនលើកកម្ពស់ចំណេះដឹងពីបញ្ហាគ្រឿងញៀនដល់ថ្នាក់ដឹកនាំគ្រីស្ទបរិស័ទ

ភ្នំពេញ ៖ អាជ្ញាធរជាតិប្រយុទ្ធប្រឆាំងគ្រឿងញៀន និង គណៈកម្មាធិការត្រួតពិនិត្យគ្រឿងញៀនរាជធានីភ្នំពេញ បើកសិក្ខាសាលាស្តីពីការ លើកកម្ពស់ការយល់ដឹងពីផលប៉ះពាល់នៃការប្រើប្រាស់គ្រឿងញៀន និង ច្បាប់ស្តីពីការត្រួតពិនិត្យគ្រឿងញៀនជូនដល់ថ្នាក់ដឹកនាំគ្រីស្ទបរិស័ទ រាជធានីខេត្ត សរុបចំនួន៧០រូប នៅថ្ងៃទី២៦ ខែធ្នូ ឆ្នាំ២០២៤ នេះ។

លោក អ៊ួង យូហាន ប្រធានក្រុមប្រឹក្សាបណ្តាញព្រះវិហារគ្រីស្ទបរិស័ទកម្ពុជា បានជម្រាបជូនពីគោលបំណងលើកកម្ពស់សមត្ថភាពចំណេះដឹងអំពីបញ្ហាគ្រឿងញៀនដល់ថ្នាក់ដឹកនាំគ្រីស្ទបរិស័ទទាំងអស់ អាចយកចំណេះដឹងទាំងនេះទៅធ្វើការអប់រំ និង ផ្សព្វផ្សាយបន្តជូនដល់បរិស័ទនិងប្រជាពលរដ្ឋនៅតាមមូលដ្ឋានរៀងខ្លួន។

ក្នុងឱកាសនោះ លោក ហ៊ុន សូរិទ្ធី អភិបាលរង និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនរាជធានីភ្នំពេញ បានលើកឡើងពីលទ្ធផលក៏ដូចជាបទពិសោធន៍នានា ពាក់ព័ន្ធនឹងការងារប្រយុទ្ធប្រឆាំងគ្រឿងញៀននៅក្នុងភូមិសាស្ត្ររាជធានីភ្នំពេញ។

លោក​នាយឧត្តមសេនីយ៍ មាស វិរិទ្ធ អគ្គលេខាធិការ និង ឧត្តមសេនីយ៍ឯក លឹម តុងហួត បានសម្ដែងនូវការកោតសរសើរ អរគុណពីលោកសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនចំពោះក្រុមប្រឹក្សាបណ្ដាញព្រះវិហារគ្រីស្ទកម្ពុជា ដែលបានចូលរួមចំណែកការងារប្រយុទ្ធប្រឆាំងគ្រឿងញៀនក្នុងវិស័យសាសនាពិសេសទៅលើការងារផ្សព្វផ្សាយអប់រំពីបញ្ហាគ្រឿងញៀន ដើម្បីចូលរួមធ្វើឱ្យសម្រេចបាននូវឆន្ទៈដ៏មោះមុតរបស់រាជរដ្ឋាភិបាលកម្ពុជា ដឹកនាំដោយសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ការងារប្រឆាំងគ្រឿងញៀនជាការងារអាទិភាព៕