ទំនាក់ទំនងជាង២២ឆ្នាំ កម្ពុជាសម្រេចបង្កើតស្ថានទូតនៅក្នុងប្រទេសទីម័រឡេស្តេ

ក្នុងទំនាក់ទំនងជាង ២២ឆ្នាំ​ កម្ពុជា សម្រេចបង្កើតស្ថានទូតផ្លូវការរបស់ខ្លួនប្រចាំនៅក្នុងប្រទេសទីម័រឡេស្តេតែម្ដង ខណៈបច្ចុប្បន្ន ស្ថានឯកអគ្គរាជទូតកម្ពុជាប្រចាំប្រទេសដែនកោះមួយនេះ មាននិវេសនដ្ឋាន នៅឯទីក្រុងហ្សាកាតា ប្រទេសឥណ្ឌូនេស៊ី។

យោងតាមអនុក្រឹត្យរបស់សម្ដេចធិបតី ហ៊ុន ម៉ាណែត ចុះកាលពីថ្ងៃទី២២ ខែតុលា ឆ្នាំ២០២៤ គឺរាជរដ្ឋាភិបាលកម្ពុជា បានសម្រេចបង្កើតស្ថានឯកអគ្គរាជទូតកម្ពុជាប្រចាំប្រទេសទីម័រឡេស្ដេ មាននិវេសនដ្ឋាន នៅទីក្រុងឌីលី ដែលជារដ្ឋធានីរបស់ប្រទេសនេះ។ ស្ថានឯកអគ្គរាជទូតនេះ ត្រូវដឹកនាំដោយប្រធានបេស​កកម្ម១រូប មាន​ឋានៈ​ជាឯកអគ្គរាជទូតវិសាមញ្ញ និងពេញសមត្ថភាព។ ចំណែក សមាសភាព​មន្ត្រី​ការទូត​ មន្ត្រីបច្ចេកទេស និងបុគ្គលិកសេវា នឹងត្រូវកំណត់តាមតម្រូវការនៃការងារ​ជាក់ស្តែង។

គួរជម្រាបថា ព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យទីម័រឡេស្តេ បានបង្កើតទំនាក់ទំនងនូវការទូត នៅថ្ងៃទី២៩ ខែកក្កដា ឆ្នាំ២០០២ ភ្លាមៗក្រោយទីម័រឡេស្តេបានក្លាយជារដ្ឋឯករាជ្យពេញលេញមួយ នៅថ្ងៃទី២០ ខែឧសភា ឆ្នាំ២០០២។

ក្នុងរយៈពេលប្រមាណ ២២ឆ្នាំមកនេះ ទំនាក់ទំនងការទូតរវាងប្រទេសទាំង២ គឺបានសម្រេចជាផ្លែផ្កាគួរឱ្យកត់សម្គាល់ ក្នុងនាមជាមិត្តភាពដ៏ល្អ និងកិច្ចសហប្រតិបត្តិការទ្វេភាគី ដែលមានការរីកលូតលាស់ពីមួយឆ្នាំទៅមួយឆ្នាំ។ ជាពិសេស តាំងពីឆ្នាំ២០១១ កម្ពុជាបានប្រកាសគំាទ្របេក្ខភាពទីម័រឡេស្តេ ដើម្បីក្លាយជាសមាជិកអាស៊ាន រហូតដល់ឆ្នាំ២០២២ នៅពេលដែលកម្ពុជាធ្វើជាប្រធានអាស៊ាន ក៏បានប្រកាសទទួលស្គាល់ទីម័រឡេស្តេ​ ជាសមាជិកអ្នកសង្កេតការណ៍របស់អាស៊ាន ដែលអាចចូលរួមប្រជុំនៅគ្រប់វេទិការបស់អាស៊ាន ហើយកម្ពុជា នៅតែបន្តរក្សាជំហរគាំទ្របេក្ខភាពរបស់ប្រទេសទីម័រឱ្យក្លាយជាសមាជិកពេញសិទ្ធិអាស៊ាន នាពេលខាងមុខ៕  

អត្ថបទ៖ ធឿន វ៉ាន់សុង