ព័ត៌មានជាតិ

អភិបាលខណ្ឌ ៧ មករា ដាក់ទិសដៅបង្ក្រាបក្រុមក្មេងទំនើង ឲ្យមានប្រសិទ្ធភាពបំផុត

បានផុស

៣ ខែ មុន

នៅ

ថ្ងៃសៅរ៍ ២៨ ធ្នូ ២០២៤

ដោយ

អាជ្ញាធរតាមមូលដ្ឋាន ខណ្ឌ ៧ មករា បានបើកកិច្ចប្រជុំបន្ទាន់ ដើម្បីបន្តដាក់ទិសដៅក្នុងការបង្ក្រាបក្រុមក្មេងទំនើងឲ្យមានប្រសិទ្ធភាពបំផុត តបតាមបទបញ្ជារបស់ប្រមុខរាជរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃទី ២៧ ខែធ្នូ ឆ្នាំ ២០២៤ ម្សិលមិញនេះ រដ្ឋបាលខណ្ឌ ៧ មករា បានបើកកិច្ចប្រជុំគណៈបញ្ជាការឯកភាពរដ្ឋបាលខណ្ឌ ក្រោមវត្តមានដឹកនាំប្រជុំដោយ លោក ថេង សុថុល អភិបាលខណ្ឌ និងមានការចូលរួមពីលោកអភិបាលរងខណ្ឌ លោក លោកស្រី ជាចៅសង្កាត់ , អធិការនគរបាល , មេបញ្ជាការកងរាជអាវុធហត្ថ និងមន្ត្រីពាក់ព័ន្ធជាច្រើនរូបទៀតផងដែរ។

ក្នុងកិច្ចប្រជុំ លោក ថេង សុថុល អភិបាលខណ្ឌ បានដាក់ចេញនូវផែនការគោលសំខាន់ៗ ជាច្រើន លើផែនការងារសន្តិសុខ ពិសេសបញ្ហាក្មេងទំនើង ដែលក្នុងនាមអាជ្ញាធរខណ្ឌ ត្រូវចាំបាច់បង្ការ ទប់ស្កាត់ និងបង្ក្រាប ឲ្យមានប្រសិទ្ធភាពខ្ពស់បំផុត ដោយមិនត្រូវបន្តបណ្ដែតបណ្ដោយឲ្យសកម្មភាពនេះ អាចកើតមានឡើង បង្កអសន្តិសុខក្នុងសង្គមជាតិនោះទេ។

លោកអភិបាល បានសង្កត់ធ្ងន់ថា ក្រុមក្មេងទំនើងទាំងនេះ កើតចេញពីក្មេងទំនេរ ដូច្នេះកម្លាំងប្រដាប់អាវុធត្រូវបង្កើនការយកចិត្តទុកដាក់ ផ្លាស់ប្ដូរវេនល្បាតជាប្រចាំឲ្យបានខ្ពស់ ក្នុងការបង្ការបង្ក្រាបឲ្យមានប្រសិទ្ធភាព។

លោកអភិបាល បញ្ជាក់ថា បញ្ហាក្មេងទំនើងនេះ មិនមែនជាកិច្ចការងារថ្មីសម្រាប់អាជ្ញាធរ និងកម្លាំងប្រដាប់អាវុធនោះទេ ពោល កម្លាំងអាជ្ញាធរតែងធ្វើជាប់ជាប្រចាំមកហើយ ពិសេសនៅពេលមានបទបញ្ជារបស់ប្រមុខថ្នាក់ដឹកនាំ គឺកាន់តែបង្កើនការយកចិត្តទុកដាក់លើការងារនេះកាន់តែខ្ពស់ឡើងបំផុត។

ទាក់ទិននឹងបញ្ហាក្មេងទំនើងនេះដែរ ប្រជាពលរដ្ឋ បង្ហាញការគាំទ្របំផុតចំពោះបទបញ្ជាដ៏ម៉ឺងម៉ាត់ របស់ សម្តេចធិបតី នាយករដ្ឋមន្ត្រី ពិសេសស្នើឲ្យអាជ្ញាធរទាំង ១៤ ខណ្ឌ ក្នុងភូមិសាស្ត្ររាជធានីភ្នំពេញ សូមធ្វើការទប់ស្កាត់ និងបង្ក្រាបឲ្យមានប្រសិទ្ធភាព ដើម្បីធានាសន្តិសុខជូនប្រជាពលរដ្ឋ ក៏ដូចជាសង្គមជាតិទាំងមូលផងដែរ។

ទាក់ទងបញ្ហាក្រុមក្មេងទំនើងនេះដែរ កាលពីពេលថ្មីៗ សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់បទបញ្ជាដល់កងកម្លាំងអាជ្ញាធរមានសមត្ថកិច្ច នៅថ្នាក់រដ្ឋបាលក្រោមជាតិទាំងអស់ ត្រូវបន្តយកចិត្តទុកដាក់ និងពង្រឹងបន្ថែមកាន់តែខ្លាំងជាងមុន លើការបង្ក្រាបសកម្មភាពក្រុមក្មេងទំនើងឲ្យមានប្រសិទ្ធភាពខ្ពស់បំផុត ដោយចាំបាច់ត្រូវតែបង្ក្រាបឲ្យអស់ ដោយមិនត្រូវបណ្ដែតបណ្ដោយឲ្យក្រុមទំនើងមួយក្តាប់តូចធ្វើសកម្មភាពបង្កផលប៉ះពាល់ដល់ប្រជាពលរដ្ឋ និងសង្គមជាតិទាំងមូលនោះឡើយ៕

អត្ថបទ ៖ ម៉េង