សមត្ថកិច្ចបន្តចុះបង្ក្រាបបទល្មើសនេសាទ នៅបឹងទន្លេសាបបាន៣ទីតាំងទៀត ក្នុងស្រុកឯកភ្នំ

បន្ទាប់ពីបានចុះបង្ក្រាបបទល្មើសនេសាទលើ៣ ទីតាំង ក្នុងស្រុកឯកភ្នំ កាលពីថ្ងៃទី២៦ កន្លងទៅថ្មីៗនេះរួចមក នៅថ្ងៃទី២៧ ខែធ្នូ ឆ្នាំ២០២៤ ដោយអនុវត្តតាម​យោបល់ដឹកនាំរបស់លោក​ឧត្តមសេនីយ៍ទោ​ដាញ់ អេង​ប៊ុន​ចាន់ ​ស្នងការនៃស្នងការដ្ឋាននគរបាលខេត្តបាត់ដំបង​ លោកវរសេនី​យ៍ឯក យី យក់សាន នាយការិយា​ល័​យនគរបាលប្រឆាំងបទល្មើស​សេដ្ឋកិច្ច បានដឹកនាំកម្លាំងបន្តសហ​ការជាមួយកម្លាំងយោធភូមិ​ ភាគទី៥ និងកម្លាំងមន្ត្រី នៃមន្ទីរអធិការកិច្ច ចុះបង្រ្កាបបទល្មើសនេសាទ​ នៅក្នុងតំបន់អភិរក្សអតីតឡូតិ៍​នេ​សាទ លេខ២​ ជាបន្តទៀត ដែលទីតាំងនេះស្ថិតក្នុងភូមិសាស្ត្រស្រុកឯកភ្នំ ខេត្តបាត់​ដំបង។

លទ្ធផលទទួលបានក្នុងកិច្ចប្រតិបត្តិការលើកទី ២នេះ គឺនៅចំនុចបឹងស្នែងក្របី ដល់ចំណុចស្វាហែល បង្ក្រាបបានសាច់មងប្រវែង ៣ ៥០០ម៉ែត្រ ឡុកចំនួន ៥គ្រឿង បង្គោលចំនួន ១៧០០ដើម លែងត្រីចូលបឹងធម្មជាតិវិញចំនួន ២៥០០គីឡូក្រាម និងរឹបអូសកាណូតស្មាច់(ចាស់)ចំនួន ១គ្រឿង យកមករក្សាទុកនៅទី ស្នាក់ការទន្លេសាប តំបន់ប្រតិបត្តិការសឹករងបាត់ដំបង។ រីឯនៅចំនុចបឹងទំលាក់តាមឹម  លទ្ធផលនៃការបង្ក្រាបគឺសាច់មងប្រវែង ២៥០០ម៉ែត្រ ឡុកចំនួន ៣គ្រឿង បង្គោលចំនួន ១៤០០ដើម និង លែងត្រីចូលបឹងធម្មជាតិវិញចំនួន ១៣០០គីឡូក្រាម។ ចំណែកនៅចំនុចបឹងអាឈូក សមត្ថកិច្ចបង្ក្រាបបានសាច់មងប្រវែង ៧០០ម៉ែត្រ ឡុកចំនួន ១គ្រឿង និងបង្គោលចំនួន ៣៥០ដើម។

សរុបរួមនៅក្នុងកិច្ចប្រតិបត្តិការនេះ គឺបានបំផ្លាញសាច់មងប្រវែង ៦ ៧០០ម៉ែត្រ ឡុកចំនួន ៩គ្រឿងបង្គោលចំនួន ៣ ៤៥០ដើម លែងត្រី ៣ ៨០០គីឡូក្រាម និងកាណូតស្មាច់ចំនួន ១គ្រឿង។

ចំពោះវត្ថុតាងខាងលើ ត្រូវបានក្រុមការងារសម្រេចកាប់បំផ្លាញ (ដុតចោលនៅនឹងកន្លែង) ដោយឡែក​មុខសញ្ញាប្រព្រឹត្តិល្មើសសមត្ថកិច្ចជំនាញកំពុងបន្តស្រាវជ្រាវ ដើម្បីចាត់ការតាមច្បាប់៕

ដោយ៖ សោ និយមរ័ត្ន