ខេត្តមណ្ឌលគិរី៖ សាលាបឋមសិក្សាមួយកន្លែង ដំបូលក៏ធ្លុះធ្លាយ ជញ្ជាំងក៏ពុកផុយ គ្រូ និងសិស្ស ស្នើសុំឱ្យជួយជួសជុល

សាលាបឋមសិក្សាអូរតាំងឡាំង ស្ថិតនៅភូមិអូរតាំងឡាំង ដែលជាភូមិឧបសម្ព័ន្ធចំណុះឱ្យភូមិពូកេះ ឃុំមេម៉ង់ ស្រុកកែវសីមា ខេត្តមណ្ឌលគិរី មានសភាពចាស់ទ្រុឌទ្រោមគួរឱ្យសង្វែក។ ដំបូលប្រក់ស័ង្កសីចាស់ៗមានសភាពធ្លុះធ្លាយ ពេលភ្លៀងម្តងៗបង្កការរំខានយ៉ាងខ្លាំងដល់ការរៀនសូត្ររបស់សិស្សានុសិស្ស និងការបង្រៀនរបស់គ្រូបង្រៀន។ ចំណែក ជញ្ជាំងធ្វើពីឈើមានសភាពចាស់ពុកផុយ រលេះចេញពីគ្នាខ្លះៗទៅហើយ តែកូនសិស្ស និងគ្រូបង្រៀន នៅតែបន្តរៀន និងបង្រៀននៅសាលានេះ ព្រោះគ្មានជម្រើសណាផ្សេង។

បច្ចុប្បន្ននេះ សាលាបឋមសិក្សា អូរតាំងឡាំង មានអគារចំនួន២ខ្នងស្មើនឹង៤បន្ទប់ ចាប់ពីថ្នាក់ទី១ រហូតដល់ ថ្នាក់ទី៦ ហើយមានលោកគ្រូបង្រៀនចំនួន៥រូប​​​​​​​​​​​​​​​​​​​​​កំពុងបង្រៀន និងមានសិស្សសរុប៤៥នាក់ ក្នុងនោះ ស្រី២០នាក់។ ដំបូងឡើយ សាលាបឋមសិក្សានេះ មានតែ១ខ្នងប៉ុណ្ណោះ គឺសាងសង់អំឡុងឆ្នាំ២០០៧ សាងសង់ឡើងដោយសហគមន៍ក្នុងភូមិ រហូតដល់ឆ្នាំ២០១៧ ក៏បានសាងសង់បន្ថែមមួយខ្នងទៀត។ ប៉ុន្តែ មកដល់ពេលបច្ចុប្បន្ននេះ សាលាមានសភាពទ្រុឌទ្រោមទាំង២ខ្នងតែម្តង។

លោកគ្រូ ស៊ីដន ច័ន្ទ នាយកសាលាបឋមសិក្សា អូរតាំងឡាំង បានអះអាងថា កន្លងមក ធ្លាប់មានសប្បុរសជនធ្វើដំណើរមកកាន់សាលានេះ ដើម្បីឧបត្ថម្ភសម្ភារសិក្សាមួយចំនួនទៅដល់សិស្សានុសិស្ស ហើយនៅក្នុងឆ្នាំ២០២២ ក៏មានក្រុមទេសចរផ្សងព្រេង គ្រួសារoffRoadគោព្រៃមណ្ឌលគិរី បានដឹកនាំយកសម្ភារមួយចំនួនផ្តល់ឱ្យសិស្សានុសិស្សដែលមានជីវភាពខ្វះខាត និងដាក់អំពូលសូឡាមួយគ្រឿងទុកបំភ្លឺក្នុងបរិវេណសាលាផងដែរ។ លោកគ្រូ ស៊ីដន ច័ន្ទ បានបន្តថា កាលពីឆ្នាំ២០២៣កន្លងទៅ មានអង្គការ ផ្លេន ដែលជាអង្គការក្រៅរដ្ឋាភិបាល ក៏បានឧបត្ថម្ភបន្ទប់ទឹកចំនួន១ និងអណ្ដូងទឹកចំនួន១ ដល់សាលាបឋមសិក្សាអូរតាំងឡាំង។

ត្បិតថា មានការឧបត្ថម្ភខ្លះៗក៏ដោយ ប៉ុន្តែ វាមិនទាន់គ្រប់គ្រាន់នោះទេ ពិសេសទៀតនោះ គឺនៅពេលនេះ សាលាបឋមសិក្សាអូរតាំងឡាំង មានសភាពចាស់ទ្រុឌទ្រោមទៅហើយ។ ដូច្នេះហើយ ទាំងនាយកសាលា និងលោកគ្រូទាំងអស់នៅសាលាបឋមសិក្សាអូរតាំងឡាំង អំពាវនាវទៅដល់សប្បុរសជន ក៏ដូចជា អង្គការក្រៅរដ្ឋាភិបាល និងថ្នាក់ដឹកនាំ មេត្តាជួយពិនិត្យ និងជួសជុលឡើងវិញ ដើម្បីបង្កការងាយស្រួលដល់សិស្សានុសិស្ស ដែលកំពុងសិក្សានៅសាលាបឋមសិក្សានេះ ព្រោះបច្ចុប្បន្ន សាលាទាំង២ខ្នងនេះ មានសភាពទ្រុឌទ្រោមខ្លាំង ធ្លុះធ្លាយ ស្ទើរទាំងស្រុងទៅហើយ។

បើទោះបីមានសភាពយ៉ាប់យ៉ឺនយ៉ាងណាក៏ដោយ ក៏សាលាបឋមសិក្សាអូរតាំងឡាំង នៅតែជាកន្លែងអប់រំដ៏សំខាន់សម្រាប់សិស្សា​នុសិស្សរស់នៅក្នុងមូលដ្ឋាននេះ។ ឪពុក ម្តាយជាជនជាតិដើមភាគតិចព្នងដែលមានកូន២នាក់កំពុងរៀននៅសាលាបឋមសិក្សាអូរតាំងឡាំង បានប្រាប់ឱ្យដឹងថា ពួកគាត់ តែងតែជូនកូនទៅសាលារៀនជារៀងរាល់ថ្ងៃ ហើយមានអារម្មណ៍សង្វេកផង និងបារម្ភផង នៅពេលឃើញទិដ្ឋភាពសាលា មានភាពទ្រុឌទ្រោមពីមួយថ្ងៃទៅមួយថ្ងៃ ជាពិសេស ពេលរដូវវស្សាចូលមកដល់ ភ្លៀងបានសាចពីជញ្ជាំងផង ស្រក់ពីដំបូលលើផង ធ្វើឱ្យកូនរបស់គាត់ និងសិស្សដទៃទៀត ទទឹកសឹងគ្រប់គ្នា។ ដូចនាយក និងគ្រូនៅសាលាបឋមសិក្សាអូរតាំងឡាំងដែរ ឪពុក ម្តាយ និងអាណាព្យាបាលសិស្ស បានស្នើសុំឱ្យថ្នាក់ដឹកនាំ មេត្តាជួយសាងសង់អគារថ្មីសម្រាប់សិស្សានុសិស្សសិក្សា ដើម្បីងាយស្រួលកុំឱ្យរងនូវភាពលំបាក ពេលកំពុងសិក្សាតទៅទៀត។

ឆ្លើយតបនឹងបញ្ហានេះ លោក លី សាមិ ប្រធានមន្ទីរអប់រំ យុវជន និងកីឡា ខេត្តមណ្ឌលគិរី បានអះអាងឱ្យដឹងថា មន្ទីរមានគម្រោងសាងសង់សាលានៅទូទាំងខេត្តមណ្ឌលគិរី ដែលត្រូវសាងសង់ថ្មីមានចំនួន១៧អគារ ស្មើ៨៥ បន្ទប់។ លោកថា កន្លងទៅ មន្ទីរ ក៏ធ្លាប់បានស្វែងរកអង្គការដៃគូអភិវឌ្ឍន៍មួយចំនួន ដើម្បីសាងសង់អគារថ្មីបន្ថែមទៀតនោះដែរ តែដល់ពេលបច្ចុប្បន្ននេះ មន្ទីរមិនទាន់បានឆ្លើយតបតាមការស្នើសុំតាមគម្រោងសាងសង់អគារថ្មីពីអង្គការដៃគូអភិវឌ្ឍន៍ទាំងនោះបាននៅឡើយទេ។ ក៏ប៉ុន្តែ នៅថ្មីៗនេះ មន្ទីរ ទើបបានសាងសង់អគារសិក្សាថ្ម ដែលជាគម្រោងសាងសង់របស់ធនាគារពិភពលោក នៅក្នុងវិទ្យាល័យទួលព្រីង និងអនុវិទ្យាល័យសុខសាន្ត ដែលកំពុងខ្វះខាត ហើយមន្ទីរអប់រំ ក៏កំពុងតែសាងសង់អគារសិក្សាថ្មី១ខ្នងបន្ថែមទៀតមានចំនួន៥បន្ទប់ នៅវិទ្យាល័យមេម៉ង់ដែលជាថវិការបស់មន្ទីរផងដែរ។

ដោយឡែក ចំពោះសាលា៣ដែលរងការទ្រុឌទ្រោមខ្លាំង រួមមាន សាលាអូរតាំងឡាំង សាលាឡង់ណេះ និងសាលាស្រែឈូក ដែលជាសាលាអាទិភាពរបស់ស្រុកកែវសីមា មន្ទីរ ក៏បានដាក់សំណើទៅធនាគារពិភពលោកបន្ថែមទៀត ប៉ុន្តែ លោកមិនទាន់មានការឆ្លើយតបនៅឡើយទេ។ លោកប្រធានមន្ទីរ បានបញ្ជាក់ថា នៅពេលថ្មីៗនេះ មន្ទីរក៏បានដាក់សំណើរទៅអង្គការWWS បន្ថែមទៀត ដើម្បីជួសជុលសាលាដែលរងការទ្រុឌទ្រោមខ្លាំងក្នុងខេត្តមណ្ឌលគិរី ប៉ុន្តែ មិនទាន់មានការឆ្លើយតបទេ ដោយខាងអង្គការ សុំសិក្សាទីតាំងតាមផែនទីជាមុនសិន៕

ដោយ ៖រៀម សុខហេង