អភិបាលក្រុងបាវិត ណែនាំឱ្យអាជ្ញាធរត្រូវតែបង្ក្រាបឱ្យបានក្មេងទំនើងដែលអុកឡុកនៅមូលដ្ឋានរំខានដល់ប្រជាពលរដ្ឋ

លោក លឹម សៀងហេង អភិបាលក្រុងបាវិត បានណែនាំឱ្យអាជ្ញាធរពាក់ព័ន្ធទាំងអស់ ត្រូវតែបង្រ្កាបឱ្យបាននូវក្មេងទំនើងដែលតែងតែអុកឡុកនៅមូលដ្ឋានរំខានការរស់នៅ បង្កអសន្តិសុខ សុវត្ថិភាព និងការប្រកបរបររកស៊ីផ្សេងៗរបស់ប្រជាពលរដ្ឋ។ អភិបាលក្រុងបាវិត បានណែនាំដូច្នេះកាលពីថ្ងៃទី២៩ ខែធ្នូ ឆ្នាំ២០២៤ ក្នុងពិធីសម្ពោធដាក់ឱ្យប្រើប្រាស់កុដិ និងបុណ្យឆ្លងសមិទ្ធផលនានា ស្ថិតនៅវត្តអម្ពវ័ន្ត ភូមិច្រកម្ទេស សង្កាត់ច្រកម្ទេស ក្រុងបាវិត ខេត្តស្វាយរៀង។

លោក លឹម សៀងហេង បានលើកឡើងថា នៅក្រុងបាវិត មានការរីកចម្រើនគួជាទីមោទនៈ ដោយឡែកការប្រតិបត្តិសាសនា នានាក៏មានការរីកលូតលាស់គួរឱ្យកត់សម្គាល់ផងដែរ។ ទាំងនេះបញ្ជាក់យ៉ាងច្បាស់ពីការបើកទូលាយលើសេរីភាពជំនឿសាសនា ក្រោមការដឹកនាំរបស់រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបធី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានចាត់ទុកបញ្ហាសុខដុមនីយកម្មរវាងជាតិសាសន៍ និងសាសនាជាបញ្ហាដ៏មានសារៈសំខាន់ ដើម្បីធានាដល់សុខសន្តិភាព ការបង្រួបបង្រួមជាតិ ក៏ដូចជា ការអភិវឌ្ឍសង្គមជាតិ។

លោកអភិបាលក្រុងបានបន្តថា ទីអារាម ក៏ត្រូវបានចាត់ទុកថាជាផ្នែកមួយដ៏សំខាន់ក្នុងការបន្តអនុវត្តគោលនយោបាយសម្រាប់មនុស្សចាស់ កុមារ និងជនក្រីក្រផងដែរ ទីអារាមបានក្លាយជាទីជម្រកសុវត្ថិភាពសម្រាប់លោកយាយ លោកតាជាកន្លែងសម្រាប់ សុំសីលធ្វើទានកុមារ និងយុវជនមួយចំនួនដែលមិនមានលទ្ធភាព ក៏បានប្រើប្រាស់ទីអារាមនេះ ដោយមួយចំនួនបានបួស ដើម្បីបន្តការសិក្សា និងមួយចំនួនទៀត ក៏បានស្នាក់នៅ ដើម្បីបន្តការសិក្សា។

លោកអភិបាលក្រុងបាវិត ក៏បានសំណូមពរដល់លោកយាយ លោកតា ប្រជាពលរដ្ឋ មេត្តាជួយតាមដាន អប់រំ ណែនាំកូនចៅឲ្យចៀសឆ្ងាយពីគ្រឿងញៀនគ្រប់ប្រភេទ សូមចូលរួមសហការតាមរយៈការជួយផ្ដល់ព័ត៌មានមកសមត្ថកិច្ច ក្នុងករណីបានដឹងថា មានបទល្មើសគ្រឿងញៀនកើតឡើងក្នុងមូលដ្ឋាន។ មួយទៀតសមត្ថកិច្ចក៏ដូចជាអាជ្ញាធរ ត្រូវចូលរួមបង្ក្រាបសកម្មភាពក្មេងទំនើងដែលអុកឡុកនៅមូលដ្ឋានដែលបង្កការរំខានដល់ប្រជាពលរដ្ឋ៕

ដោយ៖ ភក្ដី